a4:1Lu 10:21
b4:2Dit 9:9; 1 Kiŋ 19:8
c4:4Dit 8:3
d4:6Jet 27:5; Mt 28:18; 1 Jo 5:19
e4:8Dit 6:13
f4:10Wee 91:11
g4:11Wee 91:12
h4:12Dit 6:16; 1 Ko 10:9
i4:13Lu 22:3,28,53; Jo 13:2,27; Ip 2:18, 4:15
j4:14Mt 3:16, 9:26; Mk 1:39; Lu 4:37, 5:15
k4:15Mt 4:23, 9:35, 11:1; Lu 4:44
l4:16Lu 2:39,51; Ap 13:14-16
m4:18Sep 2:3
n4:18-19Ais 61:1-2
o4:22Lu 2:47, 3:23, 4:15; Jo 6:42, 7:15,46
p4:23Mt 4:13; Mk 1:21, 2:1; Jo 2:12
q4:24Jo 4:44
r4:251 Kiŋ 17:1,7, 18:1; Je 5:17-18
s4:261 Kiŋ 17:8-16
t4:272 Kiŋ 5:1-14
u4:28Jo 7:30
v4:29Nam 15:35; Ap 7:58
w4:30Je 8:59, 10:39
x4:31Lu 4:23
y4:32Mt 7:28-29, 13:54, 22:23; Mk 11:18; Jo 7:46; Ap 13:12
z4:33Mt 8:29
aa4:34Mt 2:23; Mk 1:24; Lu 8:28; Jo 6:69; Ap 3:14
ab4:37Mt 9:26; Lu 4:14; 5:15
ac4:40Mt 8:16; Lu 13:13; 1 Ti 4:14
ad4:41Mt 8:29; Mk 1:34, 3:11-12
ae4:43Lu 8:1; Ap 10:36
af4:44Mt 4:23, 9:35; Lu 4:15, 23:5

Luke 4

Sataneme Jisasa minao makande piamo doko

(Mt 4:1-11; Mk 1:12-13)

Joneme a  baanya kaimbu doko pyatakamaiyamopa Jisasame endaki Jotane doko yakinea-pyaa. Dokopa Oli Sipitisa dokome baa-kisa tumbatala laminao endakali napalenge yuu mendasa pea-pyaa. Yuu b  gii kingi ita kitomende endakali napalenge yuu dosa kateamopa, Sataneme baa minao makande peta pia-pyaa. Gii dutupa Jisasa baa nee mendaipi mende nanao katapala lopo kaya-pyaa.

Dokopa Sataneme baa lamaiyoo, “Emba Gote Ikiningi tamo kandao doko, embame kana dake kapilyetala nee jina laa!” lea-pyaa. Dopa c  leamopa Jisasame baanya pii yanu pyakamaiyoo, “‘Endakali mende nee nenge tenge dokonya iki saka nakatengena,’ lao pepa pyapae silyamona,” lea-pyaa.

Dokopa Sataneme baa kaiti ketaele laminao pyakalyetala isa yuu dake pitaka lee mendai kandena lao laitaka pia-pyaa. Laitaka d  petala Sataneme Jisasa lamaiyoo, “Dupanya isepenge kalaipi dee kalai dupanya kenge singipi dupa pitaka namba-kisa sepelyamona emba ditoana, nambame masingili pyoo mokosepenge. Dopana, embame namba lao tama pyoo luma lakatenopa, kalaipi oapi dupa pitaka embanya joo setana,” lea-pyaa. Dokopa e  Jisasame baanya pii doko yanu pyakamaiyoo, “Pii mende dapa lao pepa pyapae silyamo: ‘Embame embanya Kamongo Gote doko tama pyoo baanya iki kalai pyakamaiyoo katape!’ lapae silyamona,” lea-pyaa.

Dopa f, g  lateamopa Sataneme Jisasa laminao Jetusaleme pupala losuu anda andake kame etete ketae dokonya katena lea-pyaa. Dopa latala baame Jisasa lamaiyoo, “Pii mende dapa lao pepa pyapae silyamo:

‘Goteme baanya enjele dupame emba isokondape pina laapomona,’
dee ‘Aopyoo latala kaname embanya mokopi mende koyatame lao
enjele dupame emba kopyoo nyalamino.’
Dopana, emba Gote Ikiningi tamo kandao doko, ketae dokonya katao isa manga!” lea-pyaa.
12 Dopa h  leamopa Jisasame baa lamaiyoo, “‘Embame embanya Kamongo Gote doko minao makande napipi!’ lapae silyamona,” lea-pyaa. 13 Dokopa i  Sataneme baanya makande dupa pitaka pyoo etapala gii waka mendepa baa makande pyaanya malisoo Jisasa yakinea-pyaa.

Jisasame Galili yuu dokonya kalai tee pyao piamo doko

(Mt 4:12-17; Mk 1:14-15)

14 Dokopa j  Oli Sipitisa dokome Jisasa pupu lasoo kateamopa, Galili yuu dokonya pilyoo pea-pyaa. Dokome baanya lao pii lapae mende Galili yuu doko pitakanya taya-pyaa. 15 Baame k  nyakamanya losuu anda dupanya mana lamaiyamopa endakali pitakame baa lao tama piami-pyaa.

Nasatete tange dupame Jisasa kandao mona koo palyiamino doko

(Mt 13:53-58; Mk 6:1-6)

16 Dokopa l  endangi takangepame baa wane kolesa wambao isiambino yuu Nasatete dokonya dee pilyia-pyaa. Pilyetala koto Sambasa dii lao Jutamanya losuu andaka pengeli pyoo baame losuu anda dokonya pao kolandatala Gotenya pii dupa itaki pyao lamaiyanya toya katea-pyaa. 17 Dokopa dokaitame potopesa Aisayanya pepa pyapae doko baa maiyaminopa baame pepa doko tata lapala pii dokonya mende kutao kandatala dapa lao itaki pia-pyaa:

18 “Kamongo m, n  dokonya Oli Sipitisa dokome namba isilyamo.
Nambame endakali tipya dupa Wai Pii Epe doko lamaipi lao baame yapao nyia.
Baame namba puu lao pituu:
‘Endakali anjetae palenge dupa
Goteme mokao nyepelyamona,
endakali lenge koo dupa
Goteme lenge tasetekelyamona lao pii lamaiya puu lea.
Dee endakali kenda pipaenya anjetae joo katenge dupa
nambame mokao nyala puu lea.
19 Kamongo dokome baanya endakali dupa pyoo nyotona lao
gii seteamo doko lao panala puu leana,’” lao Jisasame itaki pia-pyaa.
20 Itaki pyatala pepa doko lakao yaki petala isingi akali doko maiya-pyaa. Maitala peteamopa endakali losuu andaka peteamino dupa pitakame baa iki kandokondape piami-pyaa. 21 Dokopa baame pii waipa soo dupa lamaiyoo, “Nambame pii itaki pyao lapupa salamino gii dakepa pii doko kiningi jetelyamona,” lea-pyaa. 22 Dopa o  leamopa baanya pii tende pipae dupa soo mona andapala baanya iki lakamaiyoo, “Akali dake Josepenyaka ikiningi daa kandamuape?” leami-pyaa. 23 Dokopa p  baame dokaita lamaiyoo, “Nyakamame namba kandao pii mana dapa lao kapa pao laapimino: ‘Dokosaa, embame emba tangenya yaina doko mee injisepe,’ laapimino. Dee nyakamame Kapaneame yuu dokonya kalai tata wamba sakateamo dupanya atome pii dupa sepala namba kandao, ‘Dopaka pyoo embanya yuu tenge dakenya pipi!’ latamina,” lea-pyaa. 24 Dopa q  latala baame lao pituu, “Nambame nyakama kiningi langilyona, potopesa mendeme baanya yuu tenge dokonya katao pii lao panelyamopa dokaitame baa lanyala naengema. 25 Nambame r  kiningi etete nyakama langilyona, wamba akali Ilainja kateamo gii dokopa Isataele yuu dupa pitakanya ee kana tepoma-kisa dee kana tokange dupanya aiyuu naipao painaka piamopa lopo andake mende sia-pyaa. Yuu dokonya enda walyakae longo peteami-pyaa. 26 Peteaminoaka s  doko, Goteme akali Ilainja doko enda dupanya mendaipi mende-kisa pena laa naya-pyaa. Goteme baa Saitone yuu yakane Satepata yuu dokonya enda walyakae mende peteamo dokonya pena lea-pyaa. 27 Dee t  potopesa Ilaisa kateamo gii dokopaka Isataele yuu dokonya endakali kopetali longo kateamino dupanya mendaipi mendenya kopetali doko mee nanjiamopa, Sitia tange akali Nemane lenge dokonya yonge doko iki Goteme mee injisia-pyaana,” Jisasame dopa lea-pyaa. 28 Dopa u  leamopa losuu anda dokonya endakali peteamino dupa pitakame pii dutupa sepala moname imbumi kumiami-pyaa. 29 Imbu v  kayao, sakatatala yuu taono dokonya Jisasa watao netesa nepalanya soo tuu lao peami-pyaa. Yuu taono doko yuu manda mendenya siamopa dokonya nete papatale menda-kaita laminao pao soo pyale lamana lao masiami-pyaa. 30 Dopa w  lao masiaminoaka doko, Jisasame dupanya kainanya langate petala pea-pyaa.

Akali enjele koo paleta doko

(Mk 1:21-28)

31 Jisasa x  Galili yuu dokonya taono Kapaneame lenge dokonya pupala, Sambasa gii dupanya baame endakali dupa mana lamaiyoo katea-pyaa. 32 Jisasame y  mana lamaiyamo dupa endakali dupame sepala, baanya pii doko pupu lapae joo leamosa walu lao paka kayami-pyaa. 33 Dokopa z  akali enjele koo paleta mende losuu andaka peteamo dokome puu lao ae lao dapa lea-pyaa: 34 “Kanau, aa  Nasatete tange Jisasa, emba Gotenya akali epe etete doko kalyeno nambame kandengena, embame naima aipa pyaa epepe? Embame naima minao koyasala epepe?” lea-pyaa. 35 Dokopa Jisasame baa pyalanya lao, “Embame embanya nengekaita lyokatala akali dake yakinatala puu!” lea-pyaa. Dopa leamopa enjele koo dokome endakali kateamino kaina dokonya akali doko lombanya setapala baa pateamopa akali doko koyala naya-pyaa. 36 Dokopa endakali pitakame mona andapala mende lamai lamai pyoo, “Baame enjele koo palenge dupa isoo pii pupu lao pena lamailyamoli pyoo dokaitame endakali dupa yakinatala pengema lamo doko baanya pii dake aipale mende laa kanjemape?” leami-pyaa. 37 Baame ab  dopa piamo dokonya atome pii doko yuu dosa tange dupa pitakame siami-pyaa.

Jisasame endakali yaina pyapae longo saka nyiamo doko

(Mt 8:14-17; Mk 1:29-34)

38 Dokopa Jisasame losuu anda doko yakinatala akali Saimonenya andaka pea-pyaa. Saimonenya enda imange doko yaina nyepala yonge etete itaita koo piamo siamopa, “Jisasa, embame enda doko nisetepe?” lao endakali dupame pisiami-pyaa. 39 Dokopa Jisasame enda doko siamo tengesa dosa ipao katapala, yaina itaita piamo doko kandao pii puu lao, “Mee jaa!” leamopa enda dokonya yaina doko mee jia-pyaa. Gii dokopaka enda dokome yapa sakatatala dokaitanya nee yangakamaiya-pyaa.

40 Niki ac  landa pyalanya piamopa endakali dupa pitakame nyakamanya palu dupanya yaina tata wakale wakale paleta dupa laminao epeaminopa baame baanya kingi doko endakali dokaita pitaka-kisa setapa piamopa dokaita pitaka auu pipae jeta piami-pyaa. 41 Dopaka ad  pyoo enjele koo endakali longo mendapua-kisa palenge dupame endakali dupa yakinatala pao pituu, ae lalya lana pyoo, “Emba Gote Ikiningina,” leami-pyaa. Enjele koo dokaitame baa Kataisa dokona lao masetala panala naena lao baame kyoto joo dokaita lamaiyoo, “Pii kayalapa!” lea-pyaa.

Jutia yuu dokonya Jisasame wai pii lamaiyamo doko

(Mk 1:35-39)

42 Yuu yongatala niki pyakayamopa Jisasa kamanda ipupala endakali napalenge yuu mendenya pea-pyaa. Dokopa endakali dupame baa kutao ipupala baa mendasa patame latala kaita lyokalanya pyoo kateami-pyaa. 43 Dopa ae  pyoo kateaminoaka doko, baame dokaita lamaiyoo, “Goteme isilyamona lapae Wai Pii Epe dake nambame yuu taono waka tange dupa apata lamaipengeaka. Tenge dokonya baame namba puu leana,” lea-pyaa. 44 Dopa af  latala baame Jutia yuu dokonya losuu anda dupanya pii lamaita pyoo katea-pyaa.

Copyright information for `ENQ