a13:2Mk 14:58, 15:29; Lu 19:44; Jo 2:19; Ap 6:14
b13:3Mk 1:29, 5:37, 9:2
c13:4Lu 17:20
d13:6Jo 8:24; 1 Jo 2:18
e13:72 Te 2:2
f13:82 Ktl 15:6; Ais 19:2
g13:9-13Mt 10:17-22
h13:11Lu 12:11-12; Jo 14:26, 16:7-11
i13:13Jo 15:21
j13:14Dan 9:27, 11:31, 12:11
k13:15Lu 17:31
l13:17Lu 23:29
m13:19Dan 12:1; Joe 2:2; Pa 7:14, 16:18
n13:21Lu 17:23
o13:22Dit 13:1-3; Mt 7:15; Jo 4:48; Pa 13:13
p13:23Jo 16:4
q13:24Ais 13:10; Ese 32:7; Joe 2:10,31, 3:15; Pa 6:12, 8:12
r13:25Ais 34:4; Joe 2:10; Pa 6:13
s13:26Dan 7:13-14; Mt 10:23; Mk 14:62; Pa 1:7
t13:30Mk 9:1
u13:31Mt 5:18; Lu 16:17
v13:32Ap 1:7
w13:33Mt 25:13; Ep 6:18; Kl 4:2; Pa 3:3
x13:33-37Lu 12:35-40
y13:34Mt 25:14; Lu 19:12-13

Mark 13

Losuu anda andake doko kalunya nepatamina Jisasame leamo doko

(Mt 24:1-2; Lu 21:5-6)

Jisasame losuu anda andake kame doko yakinatala peamopa baanya disaipele dupanya mendeme baa lamaiyoo, “Mana Lenge Akali, kana yale domopapi anda yale petae kalyamo domopapi kanda!” lea-pyaa. Dopa a  leamopa Jisasame baa lamaiyoo, “Anda yale dupa embame kandelepe? Ae kaname petae kalyamo datupanya mendaipi mende kalyamoli petae katena lao kayala nayao, pitaka kalunya nepatamina,” lea-pyaa.

Kenda pipae longo dupa ipatana Jisasame leamo doko

(Mt 24:3-14; Lu 21:7-19)

Jisasa b  baa Olipimanda yuu dokonya losuu anda andake doko katenge dokaita-kaita kandatae petea-pyaa. Dopa piamopa Pitapi, Jemesapi, Jonepi, Endutupi dutupame elyakao baa dapa lao pisiami-pyaa: Embame c  laleno dutupa andukupa pitana lao lalepe? Kongali aki mende pitamopa naimame kandatala dutupa pitaka angi jalanya tengesa petelyamona lao masetama laape? Embame naima langi,” leami-pyaa.

Dopa leaminopa Jisasame yanu pyao dokaita lamaiyoo, “Endakali mendeme nyakama minao kyakasetana kandao kalyepape. Endakali d  longome namba epele lao ipupala, ‘Namba akali dokona,’ lao endakali longo minao kyakasetami. Yanda e  andake dupa pitaminopa kiikau latapi, yanda andake dupa pilyamino lapaepi dupa nyakamame setami. Sepala nyakama paka nakayalapape. Dopale dupa ipupengeaka doko, yuu etenge gii doko dokopa ipatala nayata. Akali f  tata mendeme tata mende yanda pimaita, kiŋi mendenya isingi tata mendeme kiŋi mendenya isingi tata mende yanda pimaita pitami. Dee yuu wakale wakale dupanya titiwali dupa minata lopo andake dupa sepa pita. Dutupa pitamo doko enda wane maita pyalanya tee pingi dopale joo pita. Dopaka g  doko, nyakamame nyakama tange kandao kalyepape. Endakali dupame nyakama anjoo soo kanjole dupa-kisa kosimi laa patami. Dee nyakama losuu anda dupanya pyatamiaka. Nyakamame namba watao payataminosa endakali dupame nyakama kapomane isingi akali andakepi kiŋipi dupanya enombasa laminao pupala katasetaminopa nyakamame dupa nambanya lao pii lamaitami. 10 Wambao Wai Pii Epe doko endakali tata dupa pitaka lamaipenge. 11 Endakali h  dupame nyakama anjetala laminao kosa anda ongonya pataminopa nyakamame aipa lamanape lao wambao nea nakayalapape. Kosa lapenge gii ongopa Goteme nyakama pii ditali pyoo laapape. Nyakamame latamino doko nyakama tangeme laa nayatamina, Oli Sipitisame lata. 12 Akali mendapuame nyakamanya kaiminingi etete dupa enge nyepala pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala nyakamanya endangi takangepi dupa pyao kumasina lao maitamiaka. 13 Nyakamame i  namba watao payataminosa endakali dupa pitakame nyakama kandao etete imbu kaengitami. Dopaka doko, endakali mendeme kyoto joaka katao baa etatamo doko pyoo nyepae katata.

Kenda pipae andake ipatamopa lekeleke tatamina leamo doko

(Mt 24:15-28; Lu 21:20-24)

14 “Koyasingi j  aii pyapae doko baa nakatapenge panda dokonya katatamo nyakamame kandatami. (Pii dake itaki pyatamo endakali dokome tenge doko masepenge.) Kandatala dokopa Jutia yuu dokonya katatamino endakali dupa yuu manda dupanya paka pyakao pupenge jeta. 15 Endakali k  mende baanya anda patakisa katatamo dokome baanya oapi andakote setamo dupa kolandao nyalanya napupenge jeta. 16 Dee endakali mende eesa katatamo dokome baanya yonge pee ketae pingi doko nyalanya pilyala nayapenge jeta. 17 Enda l  wane tongatapi enda wane andu nengepi dupa gii dokopa etete kondo pita! 18 Kenda pipae dutupa koo kana palitamo dokopa naepena lao loma soo kalyepape. 19 Gii m  dokopa kenda pipae ipatamo dokome yuupi kaitipi tee piamo dokopa pituu indupa tuu lao kenda pipae epea dupa pitaka ita minata. Dee kenda pipae dopale mende tenda tendapi etete naipataka. 20 Kamongome yuu gii dupa kaketala nayali kandao doko, endakali mendaipi mende nakatatama jipyali. Dopaka doko, baame baanya yapao nyepae endakali dupa lao masetala yuu gii dupa kaketatea-pyaa.

21 “Gii n  dokopa endakali mendeme nyakama langyoo, ‘Kataisa doko asa kalyamo kanjepa! Amasa kalyamo kanjepa!’ lea kandeno doko, baame kiningi lelyamona lao nyakamame masala nayalapape. 22 Doko, o  sambo mesayapi sambo potopesapi dupa ipupala kongalipi kalai paka pipaepi dupa pitami. Dupame Gotenya yapao nyepae endakali dupa kapa pao minao kyakasepenge jipyali kandao doko kyakasimili. 23 Dopaka p  doko, nyakama kandao kalyepape. Nambame nyakama pitaka ene pimopa langitilyo.

Endakalinya Ikiningi doko dee ipata dokonya Jisasame leamo doko

(Mt 24:29-31; Lu 21:25-28)

24 “Kenda q, r  pipae ipatamo dupa etapatamopa niki doko iminjoo, kana doko tii napyoo, kaiti-kisa bui katenge dupa kondao isa ipao, kaitinya kuingi dupa ema-ema pyoo pita. 26 Dutupa s  petatamopa Endakalinya Ikiningi doko etete pupu lao tii pyoo kopa tambetambe ipatamo endakali dupame kandatami. 27 Dokopa baame enjele dupame baanya yapao nyepae endakali yuunya lita yangi yangipi dupanya katenge dupa nyoo elyambu pyaa pena lata. Dokopa dupame yuu lita ongonya pituu yuu lita yangi-kaita tuu lao nyoo elyambu pitami.

Piki ita dupanya makande doko

(Mt 24:32-35; Lu 21:29-33)

28 “Nyakamame piki ita dupanya makande doko masalapape. Mange dupa kanga latala yoko ŋaŋa pyakalyilyamo doko kandatala nyakamame aiyuu kana palyanya pilyamona lao masingima. 29 Dokotekee joo pitamo dutupa pitaka nyakamame kandatala yuu etalanya tengesa petelyamona lao masalapape. 30 Nambame t  nyakama kiningi langilyo, endakali indupa palelyamino dupa kumao etapala nayataminopa dutupa pitaka pita. 31 Yuupi u  kaitipi dupa kapa pao alu pitamoaka doko, nambanya pii dupa kapa pao alu napita.

Depa latae kalyepape leamo doko

(Mt 24:36-44)

32 “Endakali v  mendaipi mendeme yuu etenge gii doko andukupa ipatape kiloko gii andukunya ipatape lao masala naengema. Enjele kaiti-kisa katenge dupame masala naengema. Ikiningi dokome apata masala naengeaka. Takange dokome iki masingi. 33 Nyakama w, x  kandao isoo kalyepape. Doko, gii doko andukupa ipatape lao nyakamame nakandengema. 34 Doko, y  akali mendeme baanya anda doko yakinatala yuu waka mendenya pao katenge dopale. Baame baanya kendemane dupame anda doko isoo katekena latala dutupa kalai wakale wakale mokosoo maingi. Dopa petala akali lome kambu isoo katenge dokome lome kambu doko isokondape pyoo katekena latala baa penge. 35 Nyakamame anda tange doko alemandi kone yuu pumbuti yuu pitamopa ipatape, kuka andatombe ipatape, yuu yongalanya mona sakatamopa ipatape, yongama ipatape lao masala naelyamino. Baa yapa ipupala nyakama luu paliuu katatamino kandatana nyakama kandao isoo kalyepape. 37 Nambame nyakama langilyo doko, endakali pitaka kandao lelyona, kandao kalyepapena,” lea-pyaa.

Copyright information for `ENQ