a5:2Mk 1:23
b5:7Mk 1:24; Ap 16:17; Ip 7:1
c5:10Mt 12:45; Lu 11:26, 8:2
d5:19Mk 1:34
e5:20Mt 4:25; Mk 7:31
f5:21Mk 2:13
g5:22Lu 13:14; Ap 13:15, 18:8-17
h5:23Mt 8:3; Mk 6:5, 7:32, 8:23; Ap 9:17, 28:8
i5:27Mk 6:56
j5:28Mt 14:36
k5:30Lu 5:17, 6:19
l5:34Mt 8:10; Mk 10:52; Lu 7:50, 17:19
m5:36Mt 8:10
n5:37Mk 9:2, 13:3
o5:39Jo 11:11; Ap 20:10
p5:41Lu 7:14; Ap 9:40
q5:43Mk 1:34,43-44, 7:36

Mark 5

Jisasame akali mendenya enjele koo watao pyakamaiyamo doko

(Mt 8:28-34; Lu 8:26-39)

Dokopa dokaita endaki pete dokonya omotena pupala Getasa tangemanya yuu dokonya peami-pyaa. Jisasa a  baa sipi doko yakinatala peamopa akali enjele koo paleta mendeme endakali malu kananda dupanya katao ipao baa kandanyulu pia-pyaa. Baa endakali malu dupanya palenge-pyaa. Endakali mendaipi mendeme kapa pao baa anjala naengema-pyaa. Nili kendepi kapa daaka-pyaa. Paa longosa dupame baa kingipi mokopi dupa ŋili kendepi anengapupi dupame anjeta pilyaminopa anengapu dupa pindanya nepatala ŋili kende dupa takyoo nepenge-pyaa. Dopa pilyamopa endakali mendaipi mendeme kapa pao baa minao tambo lasapenge nanjingi-pyaa. Kuka kotakapi koteaka lao baa endakali malupi yuu mandapi dupanyaka paliuu katenge-pyaa. Baame puu lao ae lao katao baanya yonge doko tange kaname konjeta pingi-pyaa.

Jisasa londatili kateamopa baame kandatala alo pyao ipupala baa kateamo dosa luma lakea-pyaa. Dopa b  petala baame puu lao ae latala, “Jisasa emba Gote Etete Ketae Katenge dokonya Ikiningi, embame namba aipa pitipi? Nambame Gotenya kenge doko lao embame namba tanda andake nandipoko,” lea-pyaa. Doko, Jisasame baa lamaiyoo, “Enjele koo, embame akali dake yakinatala kamanda ipu,” leamosa dopa lea-pyaa.

Dokopa Jisasame baa pisoo, “Emba kenge apipi?” lea-pyaa. Dopa leamopa akali dokome yanu pyao, “Naima longo dokonya nambanya kenge Longo lengena,” lea-pyaa. 10 Dopa c  latala Jisasame enjele koo dutupame yuu dake yakinatala pena laa naena lao baame kongo lea-pyaa.

11 Mena elyambu mende yuu manda kilikili dokonya nao kateami-pyaa. 12 Dokopa enjele koo dupame Jisasa kandao, “Naima mena dupanya koko landa pyamana dupa kalyamino dokonya pupa lapoko,” leami-pyaa. 13 Dopa leaminopa Jisasame pena kaya-pyaa. Dokopa enjele koo dupame akali doko yakinatala mena dupa-kisa pao landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa. Mena dupa taosene lapoma jowapi mende-pyaa. 14 Dopa piamopa mena setao katenge akali dupa paka pupala yuu taono dokonyapi mee yuupi dupanya pao lamaiyami-pyaa. Dokopa endakali dupame piamo doko kanja epeami-pyaa. 15 Dupa Jisasa kateamo dokonya ipupala kandeaminopa wamba enjele koo longo paleta katenge akali doko indupa yonge pee dupa pyoo mona paliuu peteamo kandatala paka kayami-pyaa. 16 Piamo doko lengeme kandeamino endakali dupame enjele koo paleta akali doko-kisa piamo dokonya lawapi dee mena dupanya lawapi endakali epeamino dupa lamaiyami-pyaa. 17 Dokopa dupame Jisasa baa nyakamanya yuu doko yakinatala pena lao kongo leami-pyaa. 18 Dopa leaminopa baa sipi ongonya pyakalyiamopa wamba enjele koo paleta kateamo dokome baa apata buaako lea-pyaa. 19 Dopa d  leamopa Jisasame ongonya ŋee nalea-pyaa. Nee nalenya baa lamaiyoo, “Embame embanya andaka emba palu dupa katatamisa puu. Pupala Kamongo dokome embanya pyakalamo dupapi dee emba kondo kayalamo dokopi dutupa dupa lamaipina,” lea-pyaa. 20 Dopa e  leamopa akali dokome pupala baa-kisa Jisasame piamo dupa pitaka Dekapolisa yuu dokonya panao lamaiya-pyaa. Dopa piamopa endakali dupa pitakame sepala mona andeami-pyaa.

Jaitasa wanengepa Jisasanya yonge peenya watandeamo enda dokopa

(Mt 9:18-26; Lu 8:40-56)

21 Jisasa f  baa sipi dokonya pituu endaki pete dokonya yangitena dee pilyia-pyaa. Endaki pete lemba dokonya endakali kambu andake mendeme ipao baa kateasa limbiami-pyaa. 22 Dokopa g  Jutamanya losuu anda isingi akali dupanya mende Jaitasa lenge doko epea-pyaa. Ipao Jisasa kandatala baanya moko kateamo dosa tombauli sepala, kyoto joo dapa lao Jisasa-kisa tee lea-pyaa: “Nambanya wanenge doko kumalanya pilyamona, baa mee jetala saka pena embame ipao baa kingimi watandatalena,” lea-pyaa. 23 Dopa h  leamopa Jisasa baa-pipa awapa peambi-pyaa.

24 Dopa piaminopa endakali longome baa watao pupala katao tambukiniami-pyaa. 25 Enda mende ee kana kingi ita mende-kisa dee lapoma dupanya andaka nao paliti-paliti singi mende katea-pyaa. 26 Enda dokome dokosaa longo dupa-kisa tanda longo nao muni akipi dupa pitaka nepeamoaka doko, kuki yaka nanjoo etete koyamopa petea-pyaa. 27 Enda i  dokome Jisasanya lao pii doko sepala endakali kambu dokonya Jisasanya maita-kaita ipupala baanya yonge pee dokonya kingimi watandea-pyaa. 28 Enda j  dokome, “Nambame baanya yonge peenya iki watandato kandao doko, nambanya yaina doko mee jakalapomona,” lao masetala dopa pia-pyaa. 29 Kinina dokopa lee mendai enda dokonya andaka nao paliti-paliti singi doko yatu lea-pyaa. Dopa piamopa enda dokome baanya yaina doko etalumu lao masia-pyaa. 30 Dokopa k  awapa Jisasame baanya pupu lapae mendapua puumu lao sepala endakali kambu kateamino dupa kandapilyetala, “Apimi nambanya yonge peenya kingimi watandelyape?” lea-pyaa. 31 Baanya disaipele dupame yanu pyao, “Emba katao tambukinelyamino endakali kambu doko emba tangeme kandao pituu embame, ‘Apimi namba kingimi watandelyape?’ leepe?” leami-pyaa. 32 Dopa leaminopa apimi pyaape lao kanjanya Jisasame kandayoko lea-pyaa. 33 Dopa piamopa enda dokome baa-kisa piamo dutupa pitaka masetala paka kayao walu lao ipao Jisasanya moko kateamo dosa tombauli sepala baame piamo dupa pitaka panao baa lamaiya-pyaa. 34 Dokopa l  baame enda doko lamaiyoo, “Wanaku, embame masoo minapino dokome emba mee injisetelyamo. Embanya yaina doko mee jilyamona emba mona yaepatala puu,” lea-pyaa.

35 Dopa lao kateamopa Jutamanya losuu anda isingi akali dokonya andaka katao akali mendapuame ipupala, “Embanya wanaku doko kumatalamona, aipa lao Mana Lenge Akali doko minao dee kenda pisetepe?” leami-pyaa. 36 Dopa m  leamino doko Jisasame soo nasili petala losuu anda isingi akali doko lamaiyoo, “Embame paka nakaenya masoo minao katape,” lea-pyaa. 37 Dopa n  latala baame endakali pitaka baa watao naepena latala Pitapi, Jemesapi, Jemesa kaiminingi Jonepi dutupa-pipa iki peami-pyaa. 38 Pao losuu anda isingi akali dokonya andaka kolandeami-pyaa. Jisasame kandeamopa endakali dupame pii longo lao ee lao yako lao kateamino kandea-pyaa. 39 Dopa o  petala baame andaka kolandatala dokaita lamaiyoo, “Aipuma nyakama pii longo lao ee lao kalyamipi? Wanaku doko kumala nayalamo. Baa luu palelyamona,” lea-pyaa.

40 Dopa leamopa endakali dupame baa kilya kandao gii kayami-pyaa. Dopaka doko, baame dokaita pitaka watao kamanda pyalyetala wanaku dokonya endangi takangepapi dee baa-pipa tole payamino dutupapi dutupa-pipa iki wanaku kumapae doko siamo palo dokonya peami-pyaa. 41 Pupala p  wanaku dokonya kinginya minatala baa lamaiyoo, “Talita kumu,” lea-pyaa. Pii doko kapilyoo, “Wanaku, emba nambame sakata lelyona,” lea-pyaa. 42 Dopa leamo dokopa wanaku doko sakatatala paya-pyaa. Dopa piamopa dupame doko kandatala etete walu lao mona andeami-pyaa. Wanaku doko ee kana kingi ita mende-kisa dee lapoma patae-pyaa. 43 Dokopa q  Jisasame dokaita lamaiyoo, “Endakali mendeme doko setana lamaiya nayalapape,” lao etete kyoto joo lamaiya-pyaa. Dopa latala, “Nyakamame nee mendapua nena maiyepa,” lea-pyaa.

Copyright information for `ENQ