a4:1Ip 2:18, 4:15
b4:2Eke 24:18, 34:28; 1 Kiŋ 19:8
c4:3Jen 3:1-7
d4:4Dit 8:3
e4:5Nia 11:1; Dan 9:24; Mt 27:53; Pa 21:10
f4:6Wee 91:11-12
g4:7Dit 6:16
h4:10Dit 6:13; Mt 16:23; Mk 8:33
i4:11Mt 26:53; Lu 22:43; Ip 1:6,14
j4:12Mt 14:3; Mk 6:17; Lu 3:19-20
k4:13Jo 2:12
l4:15-16Ais 9:1-2; Jo 8:12
m4:17Dan 7:14; Mt 3:2, 10:7; Mk 1:15; Lu 17:20
n4:18Jo 1:35-42
o4:19Mt 13:47-50; Lu 5:1-11; Jo 21:3
p4:20Mt 8:19-22, 19:27
q4:23Mt 9:35; Mk 1:39, 3:7-8; Lu 4:15,44; Ap 10:38
r4:24Mk 6:55
s4:25Mk 3:7-8

Matthew 4

Sataneme Jisasa minao makande piamo doko

(Mk 1:12-13; Lu 4:1-13)

Gii a  dokopa Sataneme Jisasa minao makande pina lao Oli Sipitisa dokome baa laminao endakali napalenge yuu mendasa pea-pyaa. Pupala b  dosa Jisasame kuka kotakapi gii kingi ita kitomende nee nanao Gote lao masoo mee katea-pyaa. Dopa petala maitakao baa lopo kaya-pyaa. Dokopa c  makande pingi akali dokome baa kateasa ipupala lao pituu, “Emba Gote Ikiningi tamo kandao doko, embame kana silyamo datupa kapilyetala nee jina laa!” lea-pyaa. Dopa d  leamoaka doko, Jisasame baanya pii yanu pyakamaiyoo lao pituu, “‘Endakali mende nee nenge tenge dokonya iki saka nakatenge. Daa, Gotenya kaimbu dokonya pii lapae epenge dupa pitakame endakali saka katasingina,’ dopa lao pepa pyapae silyamona,” lea-pyaa.

Dopa e  lateamopa Sataneme baa laminao yuu taono etete epe Jetusaleme dokonya pupala, losuu anda andake kame etete ketae dokonya katena lea-pyaa. Dopa f  latala baame Jisasa lamaiyoo, “Pii mende dapa lao pepa pyapae silyamo: ‘Goteme emba lao masetala baanya enjele dupa lamaiyapomona,’ dee, ‘Aopyoo latala kaname embanya mokopi mende koyatame lao enjele dupame emba kopyoo nyalamino.’ Dopana, emba Gote Ikiningi tamo kandao doko, ketae dokonya katao isa manga!” lea-pyaa. Dokopa g  Jisasame baa lamaiyoo, “‘Embame embanya Kamongo Gote doko minao makande napipi,’ lao pepa pyapae silyamoakana,” lea-pyaa.

Sataneme Jisasa deaka laminao yuu manda etete ketae mendenya pupala isa yuu dake pitakapi dupanya auu pipae dupapi dupa baa laitaka pia-pyaa. Dopa petala baame Jisasa lamaiyoo, “Embame luma lakapala namba tama pitino kandao doko, oapi datupa pitaka nambame emba ditoana,” lea-pyaa. 10 Dopa h  leamopa Jisasame baa lamaiyoo, “Satane, emba puu! ‘Embame embanya Kamongo Gote doko tama pyoo baanya iki kalai pyakamaiyoo katape!’ lao pepa pyapae silyamona,” lea-pyaa. 11 Dokopa i  Sataneme Jisasa yakinatala pea-pyaa. Dopa peteamopa enjele mendapuame ipupala Jisasa nisiami-pyaa.

Jisasame Galili yuu dokonya tee pyao kalai piamo doko

(Mk 1:14-15; Lu 4:14-15)

12 Jone j  anjetelyaminona lapae doko Jisasame sepala dokopa, baa Galili yuu dokonya pilyia-pyaa. 13 Pilyetala k  Nasatete yuu dokonya kuki katapala yuu taono Kapaneame dokonya pao katea-pyaa. Yuu taono Kapaneame doko endaki Galili Pete dokonya lembatena singi-pyaa. Yuu taono Kapaneame doko, akali tata Sepyulanepa Napatalaipanya yuu dokonya sia-pyaa. 14 Dopa piamo dokome potopesa Aisayame pii mende dapa leamo doko angi jia-pyaa:

15 “Sepyulanemanya l  yuupi, Napatalaimanya yuupi, endaki pete lembapi, endaki Jotanenya yangi-kaitapi,
endakali tata waka dupanya yuu Galili dokonyapi,
endakali iminjetaenya katatamino dupame tii pipae andake doko kandatami.
Endakali kumapenge yuu iminjetae dokonya katatamino dupa tii pipae dokome tii pisetana,” Aisayame dopa lea-pyaa.
17 Gii m  dokopa pituu, Jisasame baanya pii doko tee pyao dapa lao panao lamaiya-pyaa: “Kaitinya Katenge dokome isingi doko tengesa petelyamona, nyakama mona kapilyalapa!” lao lamaiya-pyaa.

Jisasame wapaka nyingi akali kitomende epena leamo doko

(Mk 1:16-20; Lu 5:1-11)

18 Jisasa n  Galili Pete lemba dokaita payao pituu, baame akali nyalambo kaiminingipa mendalapo, Saimone, kenge mende Pita lengema dokopa baanya kaiminingi Endutu dokopa dolapo kandea-pyaa. Dolapome wapaka nyalanya wapaka nyingi mandi mende endaki pete dokonya pyandao kateambi-pyaa. Akali dolapome wapaka nyoo pisinisa pingimba-pyaa. 19 Baame o  akali dolapo lamaiyoo, “Nambame nyalambo endakali lanyingi injisotona, namba watao ipupa,” lea-pyaa. 20 Gii p  dokopaka akali dolapome wapaka nyingi mandi dupa yakinatala baa watao peambi-pyaa.

21 Baa dee kuki ulipisale pupala nyalambo kaiminingipa waka mendalapo, Sepete ikiningi Jemesa dokopa baanya kaiminingi Jone dokopa dolapo kandea-pyaa. Dolapo nyalambonya takange Sepete doko-pipa sipi mendenya pituu nyakamanya wapaka nyingi mandi dupa wasoo petami-pyaa. Dopa piaminopa Jisasame akali dolapo epena lea-pyaa. 22 Gii dokopaka akali dolapome sipi doko nyalambonya takange doko-pipa yakinatala, baa watao peambi-pyaa.

Jisasame endakali dupa mana lamaita pii lamaita mee injiseta piamo doko

(Lu 6:17-19)

23 Jisasame q  Galili yuu doko pitakanya awali lao paya-pyaa. Dopa pyoo baame endakali dupa nyakamanya losuu anda dupanya mana lamaita, Kaitinya Katenge dokome isingi dokonya lao Wai Pii Epe doko lamaita pia-pyaa. Dee baame endakalipi yaina tata tatame pyapae dupapi papa tambotae dupapi dupa pitaka mee injisoo katea-pyaa. 24 Baame r  piamo dupanya pii doko Sitia yuu doko pitakanya taya-pyaa. Dopa piamopa endakali dupame yaina tata tatame pyapae dupapi, tanda koo nengepi, enjele koo paletapi, mandipaeme nyingipi, papa tambotaepi dupa pitaka laminao epeami-pyaa. Dopa piaminopa Jisasame dupa mee injisia-pyaa. 25 Endakali s  kambu longo mendapuame yuu Galili Dekapolisapi, Jetusalemepi, Jutiapi, endaki Jotane yangi-kaitapi, dupanya katao Jisasa watao payata piami-pyaa.

Copyright information for `ENQ