a10:2Ap 22:3
b10:2-3Lo 9:31
c10:3Mt 5:20; Lo 1:17; Pl 3:9
d10:4Mt 5:17; Jo 3:18; Ap 24:14; Lo 3:21-22, 7:1-4, 8:4, 9:30-31; 2 Ko 3:14; Ga 3:24
e10:5Lep 18:5; Ese 20:11,13,21
f10:6Lo 9:30
g10:6-8Dit 30:12-14
h10:71 Pi 3:19
i10:9Mt 10:32; Lu 12:8; Ap 2:36, 16:31; Lo 1:4; 1 Ko 12:3
j10:11Ais 28:16; Lo 9:33
k10:12Ap 10:36, 15:9; Lo 1:16, 3:22,29; Ga 3:28; Kl 3:11
l10:13Joe 2:32; Ap 2:21
m10:14Ap 8:31; Ip 11:6
n10:15Ais 52:7
o10:16Ais 53:1; Jo 12:38; Lo 1:5
p10:17Jo 17:20
q10:18Wee 19:4; Mt 24:14; Kl 1:6,23
r10:19Dit 32:21; Lo 11:11,14
s10:20Ais 65:1; Lo 9:30
t10:21Ais 65:2

Romans 10

Kaimia paluma, nambame nambanya mona doko pitakame nambanya tata mendai Isataele dupa pyoo nyepae katapimi laka lao masetala, dupa nisoo Gote kongo lao loma singi. Nambame a, b  dupanya pingima dupa lakamailyona, dupame etete kyoto joo Gote watao minamana lao masingima. Dopa pingimaka doko, masala nayao pingima. Goteme c  aipa pyoo endakali dupa baanya enomba dokonya tolatae injisingipi lao masala nayao katao, nyakama tangeme tange tolatae jemana latala kalai pyoo kateami. Dopa pyoo katao dupame nyakama Goteme endakali dupa tolataena lengeli pina lao kayala nayami. Dopaka d  doko, Kataisame mana setapae dupa etasetea dokonya baa lao masoo minilyamino endakali dupa pitaka Goteme tolataena lenge.

Masoo minilyamino endakali dupa pitaka Goteme pyoo nyingina leamo doko

Gotenya e  enombanya tolatae jemana latala mana setapae watao miningi dokonya Moseseme lao pituu, “Mana setapae dupa watao minatatamo endakali doko, baa dokonya lete katatana,” lao pii pepa pia-pyaa. Dopaka f, g  doko, masoo miningi dokonya-kaita tolatae joo katenge dokonya pii dake silyamo: “Embame embanya mona dokome, (Kataisa laminao isa ipanya) ‘Api kaiti-kisa patape?’ lao masala nayape. Dee, h  (Kataisa laminao ketae pyakalyalanya) ‘Api yuu koko patape?’ lao masala nayapeaka.” Dopaka doko, pii dake silyamoaka: “Gotenya pii lapae doko emba tengesa sepelyamo. Pii doko embanya kambupa monapa dolaponya silyamona,” lapae silyamo. Masoo miningi dokonya lao pii dokoaka naimame endakali dupa lamailyamano. Embame i  embanya kambu dokome, “Jisasa baa Kamongo dokona,” lao lao panawapi, embanya mona dokome baa Goteme malunya sakatasiana lao masoo minawapi pitino kandao doko, emba pyoo nyepae katate. 10 Doko, embanya moname masoo minilinopa Goteme emba tolataena lenge. Dee embame embanya masoo miningi doko kambumi lao panelenopa Goteme emba pyoo nyingi. 11 Gotenya j  pii pepa pyapae dokonya, “Baa lao masoo minatamino endakali dupanya mendaipi mende elya nakayatana,” lapae silyamo. 12 Pii k  doko endakali dupa pitaka kandao lapae silyamo. Doko Jutapi tata waka dupapi tata dolaponya mende mendepale daa. Gote mendai doko naima pitakanya Kamongo. Baame opale epe dupa longo lao baa lao tee lenge endakali dupa maingi. 13 Doko, l  “Kamongo lao kee latamino endakali dupa pitaka pyoo nyepae katatamina,” lapae silyamo.

14 Dopaka m  doko, dupame baa lao masoo minala nayatamino kandao doko, aipa petala baa lao kee latamipi? Dee dupame baanya lao pii doko nasetamino kandao doko, aipa petala baa lao masoo minatamipi? Dee endakali mendeme dupa pii lamaiya nayatamo kandao doko, aipa petala setamipi? 15 Dee n  endakali mendapuame pii lamaiya pena nalatamino kandao doko, aipa petala dupame pii lamaitamipi? Gotenya pii pepa pyapae dokonya, “Endakali dupame wai epe mende langyanya minao epelyami dupa kandao taeme ipamini lamo lao tama pingina,” lapae silyamo. 16 Dopaka o  doko, endakali dupa pitakame Wai Pii Epe doko watao minala nayami. Dokonya Aisayame lao pituu, “Kamongo, naimame pii lamaiyamanopa siamino doko apimi masoo minao kalyapena?” lea-pyaana lapae silyamo. 17 Dopana, p  pii singi dokonya masoo miningi doko pyakalyingi. Dee pii singi doko Kataisanya lao pii lamaingi dokonya singi.

18 Dopaka q  doko, nambame lelyona, kini dupame pii lapae doko sala nayamipi? Sepeami daape!

“Dupame pii lamaiyami dokonya pii poponge doko yuu dupa pitakanya taya.
Dupame pii lamaiyami doko pao yuu pitakanya nete dupanya lita piana,” lapae silyamo.
19 Nambame r  deaka lelyona, Isataele endakali dupame Gotenya pii doko masala nayao kateamipi? Masoo kateami daape! Moseseme kandasoo leamo dokonya,

“Endakali namba tata daa dupa nambame lanyotosa nyakamame dupa tilya maitami.
Endakali masala naenge mana nakandenge dupa nambame lanyoo nyakama imbu pisotona,” Goteme lea-pyaana lapae silyamo.
20 Dee s  Aisayame paka nakayao Gotenya pii doko lao paneamo dokonya,

“Endakali namba kutala naenge dupame namba kutao kandatami.
Endakali namba kandapuma laka lao masala naenge dupame namba kandena lao panatona,” lea-pyaana lapae silyamo.
21 Dopaka t  doko, dee baame Isataele endakali dupa kandao leamo dokonya,

“Kuka kotaka lao pii nepao tanga lenge endakali dupa nambame ipupa lao kiango piona,” lea-pyaana lapae silyamo.
Copyright information for `ENQ