a12:1Jo 4:24; Lo 1:9, 6:11,13,16,19; 1 Te 4:1; 1 Pi 2:5
b12:2Lo 8:14-16,26-27; Ep 4:23, 5:10,17; 1 Jo 2:15
c12:31 Ko 12:9,11, 13:2; Ep 4:7; Pl 2:3
d12:41 Ko 12:12-14; Ep 4:4,16
e12:51 Ko 10:17, 12:20,27; Ep 4:25
f12:6-81 Ko 7:7, 12:4-12,28-30; Ep 4:7-11; 1 Pi 4:10-11
g12:82 Ko 9:7
h12:9Emo 5:15; 1 Ti 1:5; 1 Pi 1:22
i12:10Jo 13:34; 1 Ko 13:13; Pl 2:3; 2 Pi 1:7
j12:11Ap 18:25; Pa 3:15
k12:12Mk 6:4; Ap 1:14; Kl 4:2; 1 Te 5:17
l12:13Ip 13:2
m12:14Lu 6:28; Ap 7:66; 1 Ko 4:12, 12:26
n12:14-21Mt 5:38-48
o12:15Wee 35:13
p12:16Pot 3:7, 26:12; Ais 5:21; Lo 11:20,25, 15:5; 1 Ko 1:10; 2 Ko 13:11; Pl 2:2, 4:2
q12:17Pot 3:4, 20:22; 2 Ko 8:21; 1 Te 5:15
r12:18Mk 9:50; Lo 14:19; 1 Ko 6:6-7; Ip 12:14
s12:19Lep 19:18; Dit 32:35; Mt 5:39; Lo 13:4; 2 Te 1:6-7; Ip 10:30
t12:20Pot 25:21-22; Mt 5:44; Lu 6:27

Romans 12

Nyakama tange itata Gote maitae kalyepapena leamo doko

Dopana, a  kaimia paluma, Goteme naima kondo kaenge dokonya nambame nyakama langyakondape pyoo langilyona, baa lao opale mende saka kundi maipenge etete epe dopale joo nyakamame nyakama tange itata Gote maiyepape. Dopa pingi mana doko baame auu kaenge. Dee mana doko nyakamanya Gote tama pipenge mana angi. Nyakamame b  isa yuu angenya mana dupa watao payala naenya, Goteme nyakamanya masingi doko enenge injisekena lao kayatala aloo petae endakali joo kalyepape. Dopa petala Goteme pipimili lao masingi doko nyakamame kapa pao kandatami. Kini, nyakamame epe dupapi, baame auu kaenge dupapi, angi dupapi dupa kandatami.

Goteme c  aposele kalai namba diamo dokonya nambame nyakama pitaka kandao lelyona, nyakamame endakali yango dupa ita minao alyasale joo kalyamanona lao masetala epao luiyala nayalapape. Dopa napinya, Goteme nyakama mendai mendai lao masoo miningi doko ditamoli pyoo nyakama mona palipala namba dopa pyoo kalyona lao masalapape. Naimanya d  yonge mendai dokonya kingipi mokopi dopale dupa longo katenge. Longo dupa pitakame kalai wakale wakale pingi. Mendai e  dopaka pyoo naima endakali longo kalyamanoaka doko, Kataisapa pakatae yonge mendai joo katao mendenya jaa jaa pyoo kalyamano. Goteme f  mona epe palyoo diamoli pyoo epe wakale wakale dupa nyepeama. Epe nyiamano doko Gotenya pii panao lamaipenge doko tamo kandao doko, naimame masoo miningili pyoo,ju panao lamaimana. Epe nyiamano doko Gotenya kalai pyakamaipenge doko tamo kandao doko, pyakamaimana. Mana lamaipenge doko tamo kandao doko, mana lamaimana. Dee g  endakali yango dupanya mona sakatasakamaipenge doko tamo kandao doko, mona sakatasakamaimana. Endakali mendeme opale apalepi mokosoo endakali mende maitamo dokome epao maina. Endakali mendeme kalai mende isoo pitamo dokome kalai doko kyoto joo isoo pina. Dee endakali mendeme endakali mende kondo kayapala nisetamo dokome mona yaepao nisina.

Nyakamame h  endakali mende auu kayatamino doko kiningi auu kayalapape. Mana koo dupa maita maitala epe dupa minokondape pyoo minao kalyepape. 10 Nyakama i  Kataisapa pakatae kaiminingi joo katao moname mende auu kaya kaya pyoo kalyepape. Dee nyakamame putiti kayao mende andanda saa saa pyoo kalyepapeaka. 11 Nyakamame j  maka-maka nakaenya kalai kyoto joo pyoo kalyepape. Nyakamanya masingi sakatatae katao Kamongonya kalai pyakamaiyoo kalyepape. 12 Masoo k  malisoo kalyamino doko lao masetala mona yaepao kalyepape. Nyakama-kisa kenda pipae ipatamo dupanya kyoto joaka kalyepape. Dee koteaka lao lomaka soo kalyepape. 13 Opale l  apalepi nyakama-kisa setamo dupanya mokosoo Gotenya endakali mende daa joo katatamo doko maiyepape. Opone minao kalyepapeaka.

14 Nyakama m, n  watao pyatamino endakali dupa Goteme auu pisina laapape. Kini, auu pisina laapape. Baame pina lao tee nalalapape. 15 Endakalin o  mona yaepao katatamino dupa-pipa mona yaepalapape. Ee lao katatamino dupa-pipa ee laapape. 16 Nyakamalapo p  mona mendai palyoo kalyepape. Nyakama etete andake joo katapumali lao masala naenya, endakali mee meele dupa-pipa tole pyao kalyepape. Nyakama masepaena lao masala nayalapape.

17 Endakali q  mendeme nyakama koo pingia kandeno doko, itingi koaka pimaiya naenya, endakali dupa pitakame kapana lao masingi mana epe dupa watao minao kalyepape. 18 Endakali r  dupa pitaka-pipa mona setao katamana lao masetala, nyakamame pipenge jetamo dupa pitaka pyepape. 19 Nambanya s  mona setenge paluma, koo pingyatamino dupanya nyakamame yanu nyala naenya, Goteme imbutongo mandipala yanu nyina kayalapape. Doko pii pepa pyapae singi dokonya, “Yanu nyingi doko nambana, nambame yanu nyotona,” Kamongo dokome dopa lelyamo. 20 Kini t  nyakamame yanu nyala naenya, pii pepa pyapae silyamoli pyoo, “Embanya yandapipi doko lopo kaya kandeno doko, nee maipi. Endaki nanu kaya kandeno doko, endaki maipi. Dopa pitino dokome baa elya andake nyepala baanya mana koo miningi dupa yapa yakinatana,” lapae silyamo. 21 Mana koo dupame nyakama ita minina lao kayala naenya, nyakamame mana epe dupa minao mana koo dupa ita minalapape.

Copyright information for `ENQ