a4:1Ga 3:6-9; Je 2:14,20-24
b4:2Lo 3:27; 1 Ko 1:31
c4:3Jen 15:6; Lo 4:9,22; Ga 3:6; Je 2:23
d4:4Lo 11:6
e4:5Lo 3:22
f4:7-8Wee 32:1-2
g4:9Lo 4:3
h4:11Jen 17:10-11; Jo 7:22; Lo 3:22,30; Ga 3:7
i4:12Mt 3:9
j4:13Jen 12:7, 17:4-6, 22:17-18; Ga 3:16-18,29
k4:14Ga 3:18
l4:15Lo 3:20, 5:13, 7:7-8
m4:16Ga 3:7
n4:17Jen 17:5; Dit 32:29; Ais 48:13; Jo 5:21; 2 Ko 1:9; Ip 11:19; Pa 4:11
o4:18Jen 15:5; Ip 11:1
p4:19Jen 17:1,17, 18:11; Ip 11:11-12
q4:20Mk 9:23
r4:21Jet 32:17; Lu 1:37
s4:22Jen 15:6; Lo 4:3
t4:24Lo 1:4, 15:4; 1 Ko 9:10, 10:11; 1 Pi 1:21
u4:25Ais 53:4-5; Lo 8:32; 1 Ko 15:17

Romans 4

Apotakame kateamo dokonya makande doko

Dopana, a  naimame naimanya yumbange Apotakame doko kandao aipa latamape? Baame aipa pia-pyaape? Baame b  kalai dupa auu pyoo piamosa Goteme baa tolataena leali kandao doko, baa tange lalyepenge jiali. Dopaka doko baa Gotenya enomba dokonya tange lalyepenge nanjia-pyaa. Doko, c  Gotenya pii pepa pyapae dokonya aipa lapae silyape? “Goteme kiningi lelyamona lao Apotakameme masoo miniamo dokonya Goteme baa tolatae lea-pyaana,” lapae silymo. Endakali d  mendeme kalai mende petala yole nyilyamo doko naimame mee nyilyamona lao masala naenya, baame kalai pilyamo dokonya nyilyamona lao masingi. Dopaka e  doko, endakali mendeme kalai pyaa naenya, Gote maita maiyoo koo kalai pyoo katenge endakali dupa kandao tolataena lenge Gote doko lao masoo minao kalyamo dokonya, Goteme baa tolataena lenge. Tenge dokonyaka Dapitimi apata lao pituu endakali mendeme kalai mende napilyamopa Goteme mee tolataena lenge doko mona yaepasetaena lao dapa lea-pyaa:

“Endakali f  dupame mana setapae yalenge yanu dupa kunanya nepakamaiyoo, koo pingi dupa sanga pyakamaiya pyatae kalyamino dupa, mona yaepasetae katengema.
Endakali mendeme koo pingi dokonya yanu nyetana lao Kamongome itaki etete nasakamailyamo endakali doko, mona yaepasetae katengena,” Dapitimi lea-pyaa.
“Mona g  yaepasetae katengena,” leamo doko, akali elya pingi kambu kepapae dupa iki kandao lea-pyaape? Daa, elya pingi kambu kepala naenge dupa apataka lao lea-pyaa. Doko naimame pii pepa pyapae sipumu doko kandatala, “Apotakameme masoo miniamo dokonya Goteme baa tolatae lea-pyaana,” lelyamano. 10 Gii andukupa Goteme Apotakame tolataena lea-pyaape? Baa elya pingi kambu kepapaesa lea-pyaape, pande kepala naengesa lea-pyaape? Elya pingi kambu kepala naengesa wambao tolataena lea-pyaa. 11 Maitakao h  Apotakame elya pingi kambu kepeamo dokome, baa elya pingi kambu kepala naengesa masoo miningi dokonya Goteme baa tolataena leamo doko kiningina lao kongali pyoo kepea-pyaa. Dopana elya pingi kambu kepala naenge masoo miningi endakali Goteme tolataena lenge dupa pitakanya Apotakame baa takange. 12 Dee i  baa elya pingi kambu kepapae dupanya apata takangeaka. Dupame elya pingi kambu iki kepala naenya, naimanya takange Apotakame elya pingi kambu kepala naengesa masoo minao payamoli pyoo masoo minao paengema.

Goteme epe maitona leamo doko masoo miningi dokonya-kaita nyingina leamo doko

13 Goteme j  Apotakamepi dee baanya mandipapenya mandipae paliuu patamo dupapi dupame yuu pitaka moya joo nyetamina lea-pyaa. Baame dopa leamo doko, baanya mana seteamo dupa Apotakameme watao miniamosa maitona lao laa naya-pyaa. Daa, masoo miningi dokonya-kaita baa tolatae joo kateamosa lea-pyaa. 14 Mana k  setapae dupa watao minatala auu pyoo katamana lao masingi endakali dupame Goteme epe maitona leamo doko nyepenge pyali kandao doko, masoo miningi doko angi mende nanjipumopa Goteme epe maitona leamo pii doko mee jipyali. 15 Doko, l  mana setapae dupanya-kaita Gotenya imbutongo mandenge doko endakali dupa-kisa epenge. Mana setapae nasingi pyali kandao doko, yalala nayapimili.

16 Dopana, m, n  Goteme epe maitona leamo doko mona epe palyoo mee maitoana latala masoo miningi dokonya-kaita maingi. Apotakamenya mandipaenya mandipae palitamino dupa pitakame Goteme epe maitona leamo doko kapa pao nyetamana lao masina lao dopa pingi. Masoo miningi Juta dupame iki nyina lao dopa pyaa naenge. Daa, Apotakameme masoo miniamoli pyoo masoo miningi endakali tata waka dupame apata nyinaka lao pingi. Pii pepa pyapae singi dokonya, “Nambame emba endakali tata longo dupanya takange joo kataseteona,” lapae silyamo. Dopa lapae silyamoli pyoo kini Apotakame baa naima masoo miningi dupa pitakanya takange. Endakali kumapae dupa lete katasoo opale nasilyamo dupa sina lenge Gote dokonya enombasa Apotakameme pii doko kiningina lao masoo minao katea-pyaa.

18 Wamba o  Goteme Apotakame lamaiyoo, “Kaitinya bui kalyamoli pyoo emba tata dupa palitamina,” leamo pii doko kiningi jetana lao Apotakameme masala nayapenge lyangasaka doko, Goteme kiningi lelyamona lao baame masoo minao malisoo katea-pyaa. Dopa piamo dokonya Goteme leamoli pyoo baa endakali tata longo dupanya takange jia-pyaa. 19 Apotakameme p  ee kana andate mendai joapi mende katapala, “Nambanya yonge doko kuii latelyamo, dee Setanya ingi pyakilyetaena,” lao masiamoaka doko, baanya masoo miningi doko tambo laa naya-pyaa. 20 Goteme q  Apotakame epe maitona leamo doko mona lapo palyoo yakinala nayao kyoto joo masoo minao Gote lalyoo katea-pyaa. 21 Goteme r  baa lamaiyamoli pyoo kapa pao pitana lao baame masokondape pyoo masoo katea-pyaa. 22 Tenge s  dokonya minao Goteme baa tolataena lea-pyaa.

23 Goteme t  Apotakame kandao, “tolataena leana,” lao pii pepa pyapae singi doko baa iki kandao daa, naima apataka. Naimanya Kamongo Jisasa malunya sakatasiamo Gote doko lao masoo minilyamano endakali dupa apata kiningi etete baame tolataena lengeaka. 25 Naimanya u  koo pingi tenge dupanya Goteme baa kumikena lao epena latala, baame naima tolataena laanya Jisasa malunya sakatasekea.

Copyright information for `ENQ