1 Timothy 4

Dolöea mala dofä dibe amo gadola made säla olelelo neala säi amo

Godeïe Gesamia ulufadigila fädäla sähalea, hobea udia dolö odoaea Godeïe mala dïgïla moholömelë. Dïgïla awälahilä, ilia dahila nelo mugabege, mugabeïe mala säla oleleloge nabala bëgëla moholömelë. Asigi fea negela wäfalï sälo amolia mala amo gadoi säla olelelomelë. Nuloea gobei baho dibea ami badililo amo gadola, ilile asigi badili nea. Dolö amo gadoi amolia säla olelesaleada, dolöea udia nimabiolage, molö odoa made mualolage, säla olelelo nea. Godea udia dolöea nesegelahilä molö muäia hamoi amoda ilia muabiola sälo. Ado dofä amo dawadigi asigi afädë negei nefolalebe amoliada molö dialea. Nelebo sulubadela Godea hedabimu hamoi dibe amoligida afädë fisimolöi mademelë. Nilïa Godema nesegelahilä nimolö dialea. Mida, Godea ado säla negei ameage, amase, nilïa ema adose ameage, Godea amoda hedabi gabula sämolömelë.

Dimodi dida Gelesoïe hamoi hamolo hedabi gowe gadoi namolö galeala säi amo

Dia ado amoli didoolalima säla ïalahilä, Godeïe ado mala dofä säla negei dibe amoge, mala hedabola säla olelei amo gaula mogosa neebe goge, gesami gelomäiaïe molö amo dia nahamu aligiseda, Geleso Yesuïe hamoi hamolo hedabi di namolömelë. Dia fädäi nagadaiaïe sibalo galone made amoli baagi ïala auaula neada, asigi gelomäia Godea säi dibe amomu bëgëla hamosa namialo. Domalo gelomäia oodo bibila hamoseda, amoda holöbö ugila negemolö gaso, asigi gelomäia Godeïe ado oodo bibisa aligiseda, amoda nelebo sulubadela hamose amo ugila negemolö. Walio neebeweïege, hobea namolöi namolö amoïege, ugila negemolömelë. Ado dofäfalï nilïa nabaha maadei dibe amoda amo. 10 Ado amo helësëlahilä, nilïa hamoi baagi sëi edefade hamosamu neebewemelë. Mida, nilïa Gode namolöi neebe amoma asigia sisiläfüsa nea. Eada udia dolö sulubadelaïe damula aulo nea. Ea amala hamolo neada, ema dofä asigi afädë negei neebe amoli hä, damula aulo nea.

11 Dia udia dolöma mala amoli säla olelesaleada, hamomalola gelola säla ïaha namialo. 12 Udia dolöea di gafodo gähe gabula bealahilä, di memalä gadoi hamoloea, dia ado sämolöge, mala hamomolöge, boba hamomolöge, asigi afädë negela neebe goge, asigi gagadelai namolöge, Geleso sosogo nefolalebe amolia di bealahilä, ilige di neebe go gadoi namiäia namialo. 13 Ne misiäia beaha neada, Godeïe bebagi ado säla dëdëla negei dibe amo udia dolöea nabuäia nidelahilä, mala amo säla ïadigi, säla oleleladigisa namialo. 14 Dolö dafidi nelo nefolalo amolia dima naabo negesisolo amo gala, afädëa bea säi ameada, Gesamiïe galu dima ï amo gaula nebegoda fisimabio.

15 Udia dolö sulubadelaea mala amoli dima bäusebego bimäia, dia mala amoli oodo beala hamosa namolöïe, dihïdi gelolahilä hamosa namialo. 16 Dihïdige, amase, dia mala olelesebegoge, hedabola idihë namialo. Fisila made, amala gelola hamosa aligiseda, dihïdige, dia mala olelesegi nabaha neebe amolige damula aulo gaula namolömelë.

Copyright information for `ETR