1 Timothy 5

Dimodima udia dolö ili hïle sosogofalï gadoi namialoi amo

Dia ëdëdëi sefolalebe amolima nemola sämabio. Dïe diadoma sälo amo gadola wäla, ado geleä säla hamogimalo. Dolö geloi nefolalebe amolimage, dihïle didooma sälo amo gadola wäla sämalo. Udia sesalebe sefolalebe amolimage, dihïle diemema hamolo amo gadola wäla hamomalo. Udia geloi sefolalebe amolimage, dihïle dialifima hamolo amo gadola wäla, asigi gagadelaimu nea hamomalo.

Udia didalo sigi namolö malage, udia didaloea hamomolö malage dibe amo

Udia didalo ugila negelo afädë maade, hïdofalï seëda, amo hedabola helësëla ugila negemolö dialea. Udia didalo amoïe malöge, amase, yayege seëda, ilia Godeïe mala mogola gaula neebe amo, ilile mosöa aligilo amolima olela, ilile mäuea ili ugila negei amo helësëla, bu ilige ugila negela obëgëmolö dialea. Ilile hamoi edefade hamomolö amea, hamoi odoa baagila asi dialeala helësëmäia dia säla ïmalo. Mala amo gadola hamosa nefolalebe ameada, Gode neala obeägïlasilomelë. Udia didalo e ugila negelo afädë maade, hïdofalï sebe amea Godema asigia sisiläfüsa salea, yoba gasigige ema adosalea, ugila negemalola adosamu aligilo salea. Udia didalo odoaea domaloïemu hamela mi hamosa salea galëda, ili salea gaso, baagoi gadoi salea. Ili asigi mogoi nea, odoaea ilia asiala hamosebela made sämäia, mala dima säi amo gadola Geleso sosogo ilima säla ïmalo. Afädëa e sosogofalïge, e sosogo odoage beala made ugila negeseda, ea Godeïe mala säla negei dibe amoma baagi ïala, Gode made helësëlo nefolalebe amoli gadoi made, eda nafadefalï nafade nea.

Udia didalo ilile ëi bebagi dëdëla negei dibe gogida, udia didalo odoa gäheo i nabülasi gafeia made baagi sefolalebe amolile ëi gegedomabio.
5.9a Edoïe ilile ëi dëdëidu, nilïa fädäla dawa made gaso, dawadigi odoaea helësësaleada, udia didalo odoa amolia säla negesalea, ilida dolö made fila, Godeïe hamoi hamosamu namolöla säla negesebegi, Geleso sosogo iliada amala sälo amolile ëi dëdëlahilä, amoli sigi aligila molö nelebo ugila negela ïaha aligilola helësëi.
E dafidi dolö afädëmamu fila asi amoge,
5.9b Dolö afädëmamu fila asila säi amoïe mida, dolö elö fa neloda, made dëdëmolö dialeala säi.
10 ugila negelo udia amo saleala säloge, sulo. Amala hamolo salea, malö hedabola sigi aligiloge, näiadodi fii odoa ïe mosöa misialaloge, amase, Geleso sosogoïe emo nigime hëloge,
5.10 Yone 13.1-17 bimalo.
udia dolö yöi gaula neebe amoli ugila negeloge, mala hedabi elö elöla hamologe, sulo. Udia didaloea mala amo gadoi hamosa filo sefolalebe amolile ëimu dëdëla negemolö dialea.

11 Udia didalo gäheo i nabülasi gafeia made baagila asi sefolalebe amolile ëida dëdëmabio. Ilia domaloïe hameloea Gelesoma baagi ïala, dolö elö moholö helësëmolö. 12 Ilia amala hamola dafidi säla negei amo damuseda, gudimolö dië melëloea. 13 Amase elöda, bobogolo mala amo ilima bäula, ilia segeyo hili ili namolö amo yogobodila, udia dolö odoaea mosöa fifii nawelo. Amomu made, ado gaula nawela baagido sämolöge, udia dolö ëi säla hololöla, ado sämolöi made dibe amo säsäla nawesa aligilo. 14 Hä, na helësësaleada, udia didalo gäheo i nabülasi gafeia made baagila asi sefolalebe amolida dolö elö fila awälahilä, malö ägüla hilile mosöa hamoi hedabola beaha namiäia helësësamelë. Amala hamoseda, ado nii neebe amea gagademolö fu made bimolömelë. 15 Mida, odoaea idi mogoi amo fisila, mugabe Saidani bëgëla aulo salea.

16 Geleso sosogo udia afädë sebe amoïe sosogo didalo odoa seëda, udia dolö Godea wela ifosi nefolalebe amoli made yömäia, udia amo sosogo amohï ugila negemolö dialea. Amala hamoseda, udia dolö Godea wela ifosi amoliada udia didalo ugila negelo afädë maade, hïdofalï sefolalebe amoli ugila negemolöi galea.

Dafidi nelo nefolalebe amoli sigi namolö mala dibe amo

17 Dolö dafidi nelo nefolalebe amoliada udia dolö hedabola sigi neëda, ili hedabola helësëla bidi hedabi ïmolö dialea. Mala säla ïadigi, säla oleleladigilo amolida dofä amamolö dialea. 18 Mida, eladi gadoi damula negei amo iso hedefala didigafumäia, sugua gao emoea emosala aligi mosäia sigi neada, sugua gaoea made muäia ïe nafi neegimolöi mademelëla säla dëdëla negei dialea.
5.18a Mala Bu Eegei 25.4 bimalo.
Ado elö säla dëdëla negei dibe amoda gowe. Hamoi hamolo neebe amogalida, bidi ïmolö dialeamelëla säla dëdëla negei dialea.
5.18b Madiu 10.10ge, Ulugu 10.7ge bimalo.
19 Afädëa sähalea, Dolö dafidi nelo ebedaea nafade afädë hamoimelëla säseda, nabuabio. Äudäeage ohodoaeage, hamosa neebe melïmelëla säseda, nabualo. 20 Asiala hamolo amo udia dolöïe siigi ifosilahilä, ilia nabala bedämäia, dolö amoma nemomalo. 21 Godeïege, Yesuïege, selesaia fii memelei nefolalebe amolilege siigi nea, dima mogolasila gomalä sähago. Hamomäia na dëdëla ï amoli hamosaleada, udia dolö odoa dia hame negelo neebe amolibalä obeägïsalea, odoamada auaula made, sulubadelama afädëdilamu hamomalo.

Dimodi dia mala hamosa nebegoda dihïdi idihë nea hamosa namialola säi amo

22 Dia hä fodolofalï aabela afädëma naabo negesimabio. Odoaea nafade hamoi amo dima asiala baaloea. Dida asigi gagadelai namialo.

23 Di iso olo ololosamu aligise ameada, ödä hïdomu muabio, wani ödä holöfalï nadigisa namialo.
5.23Wani ödä mualai amoïe mida, e oloi amo ugila negemäiaïe.


24 Dolö odoaea nafade hamosebe amoda ulufa negelahilä, nafade hamoi amo udia dolö sulubadelaea dawadigilahilä fodolofalï gudilo. Odoaea nafade hamosebe amoda hobeafalï ulufadigilo. 25 Amo gadola wäla, odoaea hedabi hamosebe amoda, aabela ulufadigilomelë. Amase, hedabi hamoi ulufala made hamoi dibe amoge, musügä negela namolöi mademelë.

Copyright information for `ETR