2 Timothy 4

Dimodima Godeïe ado mala gelola säla ïaha namialola säi amo

Udia dolö nefolalebe welibaläge, baagoi amolibaläge gudi mogelo Geleso Yesuïe siigige, Godeïe siigige, amase, Geleso Yesu e obëgësalea, ïe Beaha Maadela Sigi Neebe amo moholöla helësëla, na dima gelola sähago. Ado mala säla ïahaleada, gelola säla ïahamu namialo. Udia dolöea nabasege, made nabasege, aso madelahilä gelola nea, säla ïmolöïe daiahamu namialo. Dia ado mala säla ïahaleada, nemolage, mala halowei dibe amo hamogilage, asigi neala gelolasilage, sämolö dibe amo gadola, dofä hame negela, fologola made nea, säla olelesamu namialo. Mida, hobeada udia dolöea ado mala dofä amo nabulö habobalahilä, hili hamese amo gadoi hamola, ado elö gëhea nabulöila helësëlahilä, ili neebea ami mala odoa olelelo yafie nefolalebe amoli mafula gegedomolömelë. Ado mala dofä amo nabulö habobala baagi ïalahilä, mäuïe sibalo dibe amoli nabulö helësëla hamesa namolömelë. Amaimo, dia segeyo sulubadelagi asigi sigi neamu, së molö diëda, aso madelahilä, naha namialo. Ado Mala Hedabi säla ïloïe hamoi hamomalo. Godeïe hamoi hamolo nea, hamoi sulubadela hamosa maadesa namialo.

Foloïe hamoi hä hamola wagamolö dilo amo

Amase, ne baagomolöda, hä walio ga made dialeamelë. Wani ödä Godema odala ïala söga salelo amo gadola, nïe namolö amoda hä, söga salasebemelë. Na nudusaleada, gelola nudui. Na balulusaleada, nofe amo hä, baagila asi. Godema asigi afädë negei amoda, fisila made, negesimu neawemelë. Hä, walio asigi mogoi neebe amoïe gini habuga gadoi bidida, nïe negesi dialeamelë. Dafidilo Geloi mogelo mogoi neebe amea segeyo daiala negei beselagalasolo amo gala, bidi dibe amoda nihïma ïmolömelë. Amoda nemamu made, udia dolöea Dafidilo Geloi obëgëmäiala helësëla beaha nefolalebe amolimage, ilile bidi dibe amoge hilima ïmolömelë.

Dimodi e Folo neebea fodolofalï misialoi amo

Dihï idi hogola, ne neebea hä fodolofalï maala, beselagalamolö helësëmalo. 10 Mida, Demasa eada nagadaia galu nelebo dibe amo boba hamolahilä, ne dïgïla Desalonaiga awäsio. Amase, Gelesenese eda Galesia bolobinisigi asigo. Daidasa eda Disiligi Dalamesia asimelë. 11 Amase, Ulugu emuda nebalä neamelë. Magaeada nïe hamoi ugila negemolöi neebe ameada, dia e bea awälahilä haligila misialo. 12 Digigasada, na Ebesa mosaloimelë. 13 Di maahaleada, nïe fagulo daia salugalo gii Doloasa gaamugi ami Gabasaïe mosöa negesiä misi amoge, amase, beba amoge neala gaula misialo. Beba odoa sugua gafodo gadoia hamoi difolalebe amo galone geloi edefademelë, elaboloeo, neala gaumalo. 14 Alegisäda eada igi ëi gabaea nelebo hamolo neebe amea ne edefademalä neala nafadelasisio. Amala hamoi amoïeda, Dafidilo Geloia e bidi dofea ïmolömelë. 15 Nilïa ado säi amogida, ea edefademalä bafuäla ado neaha nelo amea, dige ebalä idihë namialo.

16 Dafidi nebalä gudisolo amo gala, na säla obëgësebegida, dolö afädë nemadida maade. Sulubadelaea ne dïgïla awäha maadei gabio. Ilia amala hamoi ameada, Godea ilibalä bidi made negemäia hamesa. 17 Amai gaso, Dafidilo Geloi e nebalä nea, udia dolö fii odoa nefolalebe amoli sulubadelaea nabuäia, na ado mala säla ïaha maademäia, ea ne neala gelolasisio. Ilaba busi edefade gadoi, ëida laeono, ïe nafigila, ne damula awäsio. 18 Dafidilo Geloia nafade sulubadela dibea amila ne nea neahamu nelolahilä, selesaia mosöa hï Beaha Maadela Sigi Neebea ami ne sigi moholömelë. Ïe ëi gauia adamolö amoda diamolöi diamiäia helësësa neawe. Amala hamomäiamelë.

19 Bilisilale Aguilalege, amase, Onesifolusige ïe mosöa aligilo amolige, na ilima hawioila säila säla ïmalo. 20 Elasadasa eda Golïdi ami aligisisio. Amase, Dolofimasa eda olosebegi, gaamu Miledusa ami dïgïla asimelë. 21 I bäu gisalea gögï mulo segeyo amoli made maala neebe amogi, ne neebea moholö, dihï idi hogola, beselagalamolö helësëmalo. Yubulasaeage, Budeneseage, Ilinasaeage, Golodiaeage, Geleso sosogo sulubadelaeage di hawiosebego.

22 Dafidilo Geloi eda dïe gesamibalä namiäia. Godeïe ugila negelo dilibalä diamolöi diamiäia hamesa neawe.

Hä amo.

Copyright information for `ETR