bSegelaea 13.7

Mark 14

Yesu baagomäia nufulöïe didiäha dilo

(Madiu 26.1-5, Ulugu 22.1-2, Yone 11.45-53)

Segeyo äudä nelolahilä, osodagi Baagila Asi Segeyo amoïege, Segeyo Edefadegi beledi edelo yidila made gobela molö amoïege molö molö amo beselagalamolö gabulahilä,
14.1Baagila Asi Segeyola säi amoda, Isilaleïe malö made nufudala, baagila awäla, Isibiïe dolö malö abulümi amoli nufudaha maadei amoïe helësëla obëgëlo segeyola säi.
gobela ïlo busa nefolalo amola, mala dawadigi nefolalo amolalia didiähalea, Geleä musügä abeahämola awälahilä e gaula nufulödula didiäha difolalo.
Ilia sähalea, Amamolö gaso, Segeyo Edegi gedosolo amo gala made, udia dolöea gelola üala dodogöla säloeala säi.

Udia afädëa Yesuïe busagia susu gadoi weli söga negei

(Madiu 26.6-15, Yone 12.1-8)

Yesu e Bedani segea ami gudubu hamoi Saimonoea mosöa molö naha sulo. Sebegi, udia afädë maalahilä, weli hedabi gafisigäi hïdo elöi, amoïe ëida nada gaula misi. Weli muni edefadea nelo amo ödä i igia hamoigi osala negei dilo amo, ea dusulahilä weli amo Yesuïe busagia söga negei. Amala hamosebegi, udia dolö odoa sefolalo amolia habobalahilä, ilia hilidomu sähalea, Weli hedabi gafisigäi amo faeagasebegoda edoïe. Weli gafisigäi hedabi goda gina hädali ohodoaea nimolö dilo amo, nii galebeda dolö busadäoi nefolalebe amoligali neala ïalabio gabula sälahilä, ilia udia amoma nemosa dilo. Amala nemosebegi, Yesuea sähalea, Nemomabu. Edoïe dilia ema yösa. Udia gowea hamoi amoda nema hedabi hamoimelë. Udia dolö busadäoi nefolalebe amolida dilibalä namolöi namolömelë. Ili ugila negemolö helësëseda, ugila negemolöi galea. Neda dihilibalä namolöi namolö mademelë. Udia amea hamomolöi beala hamoimelë. Hobea ne baumolö amoïe, nïe domalo dafidi hëimelë. Na dilima dofä sähago. Ado Mala Hedabi sege föi sulubadelagi säla oleleseda, e helësëlahilä, ea hamoi amoge säla ïmolömelëla säi.

Yudasaea Yesu hololömolöïe asi

(Madiu 26.14-16, Ulugu 22.3-6)

10 Amalahilä bëgëla aulo giwilasi nelo amogi Yudasa Isagaliadaea gobela ïlo busa neebea ami awäla ilia Yesu nufuäia hololöla asi. 11 Ea säi amo nabala obeägïlahilä, ilia egali muni ïmolömelëla säla negei. Amalebe ea Yesu hololölahilä gaula ïmolöïe fu hogosa nelo.

Yesu, ïe bëgëla aulobalä Baagila Asi Segeyo amoïe molö mai

(Madiu 26.17-25, Ulugu 22.7-14,21,23, Yone 13.21-30)

12 Segeyo agegi beledi edelo yidila made gobela molö amoïe molö segeyo amo gala, Baagila Asi Segeyo amoïe sugua sibi malö nufidelo. Amala nufidelo segeyo amo gala, ïe bëgëla aulo amolia ema nabahalea, Baagila Asi Segeyo amoïe molö molö amoïe, nilïa abidi daiamäia hamesebela nabi. 13 Amala nabasebegi, ea ïe bëgëla aulo äudä mosalalahilä sähalea, Ali awäla gaamu edefadegi beselagalahamelebe, dolö afädëa ödä iigi usi gaui maaha neëgi, gausiala digamolömelë. Alige dolö amo awäse amo gadola mosalo. 14 Alia beahamelë, dolö amo mosöa nogila digaseda, mosö eedo amoma gomalä säla ïmalo. Säla Olelelo neebe amea dima nabahalea, Baagila Asi Segeyo amoïe molö nïe bëgëla aulo amolibalä nilï abidi molödula nabimelëla sämalo. 15 Amala säseda, ea hogoli afädë ilibia nelebo daiala negesa maadei dilo amo olemolömelë. Ami nilï molö molö daiamalola säi. 16 Amala säi amo nabalahilä, ïe bëgëla aulo äudä amole awäla, gaamu edefadegi beselagalalahilä beahamelebe, ea säi amo gadola sulubadela gausiala digasebegi, elea Baagila Asi Segeyo amoïe molö molö daiai.

17 Eso digalahilä deadisebegi, Yesu e giwilasi amolibalä misi. 18 Maalahilä ili molö naha sefolalea Yesuea sähalea, Na dilima dofä sähago. Dili sebegogi afädëa ne hololömolömelë. Amoda nebalä molö naha saleala säi. 19 Amala säsebegi, ilia asigia yölahilä, ema hïdo hïdolaea dafidi säladigi hobea säladigisalea sähalea, Nale ma, nalela säla didigai. 20 Amala säla didigasebegi, Yesuea ilima säla obëgësalea, Dili giwilasi sebegogi afädëa nebalä falo afädëdaia beledi ua negela naha sebe ameamelë. 21 Dolöïe Malö amoda ïe dëdëla negei dibe amo gadola baagomolömelë. Gaso, Dolöïe Malö e hololöla odoaïe naabogi gausise dolö amo, asigii gabumelë. E emea made neegela ägüi galebeda, e hedabi aligilabiomelëla säi.

Dafidilo Geloiïe molö mai

(Madiu 26.26-30, Ulugu 22.14-20, Golïdi 11.23-25)

22 Ili molö naha sefolalea, Yesuea beledi afädë neala gaula nea, Godema nesegela beledi dagabodasilahilä, ïe bëgëla aulo amoligali ïa gogosalea sähalea, Nimo. Nïe domalo gomelëla säla ï. 23 Amalahilä, ea wani ödä usi amo neala gaula nea, Godema nesegelahilä iligali ïasebegi, ili sulubadelaea mai. 24 Ea ilima sähalea, Goda nïe healemelë. Asialo made ado elöi säla negemolöïe healemelë. Udia dolö yafiegali besigahawe. 25 Na dilima dofä sähago. Ne wani ödä bu elö made naala nelolahilä, Godea Beaha Maadela Sigi Neebea ami nea, bu elö gähe molömelëla säi. 26 Amala sälahilä, ilia gë afädë udälahilä, Olibebia asi.

Fida, dia ne dawa madela sämolömelëla säi

(Madiu 26.31-35, Ulugu 22.31-34, Yone 13.36-38)

27 Yesuea ilima sähalea, Dili sulubadelaea bedälahilä nema habomolömelë. Ado säla dëdëla negei dibe amea sähalea,

Na sugua sibi sigi aligilo neebe amo nufulömelë. Amaseda sugua sibi nefolalebe amoli fisäla dusudasila afufumolömelëla
säla dëdëla negei dialea. b 

28 Amaimo, ne neala nowelasisegida, dili baagila nedale Galili moholömelëla säi. 29 Amala säsebegi, Fidaea ema säla obëgësalea, Ili sulubadelaea bedälahilä dima haboseda, na made amamolömelëla säi. 30 Amala säsebegi, Yesuea ema säla obëgësalea, Dima na dofä sähawe, Walio gasigi haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säla ï. 31 Amala säsebegi, ea gelolafalï säla obëgësalea, Neda dibalä baagomolö nea galëda, na di dawa madela dofä made sämolömelëla säi. Ili sulubadelaea amo gadolamu säi.

Yesu e Gesemani awälahilä Godebalä adosa sulo

(Madiu 26.36-46, Ulugu 22.39-46)

32 Yesu, ïe bëgëla aulo amolali sege afädë ëi Gesemani dibea ami afialahilä nea, ea ïe bëgëla aulo amolima sähalea, Ne Godema adose gaalu, dili wi sefolamialola säi. 33 Amala sälahilä, Fida Yemese Yonela ilimu sigi awälahilä, ïe asigigi fudugila yöla säosäomolö mi gäwila beselagalai. 34 Amalahilä ea ilima sähalea, Nïe iso asigigi edefademalä yösalea, ne baagomolö gabumelë. Dili idihë nea gui sefolamialola säi. 35 Amala sälahilä e holöbö aliga galahilä, nagadaia gumusula dia idogolahilä sähalea, Asiamolö fu galëda, nema walio hamomolö amoda asiamalola säi. 36 Ea sähalea, Aba, Nado, dia nelebo sulubadela hamosa maademolöi nebego. Nema ödä iigi usi dibe amo dia neala gaula mosalo. Amai gaso, na helësësewe gadola made, dia helësëse amo gadolamu hamomalola säi. 37 Amala sälahilä obëgësamelebe, ili süwia adidi dibe amo bealahilä ea Fidama sähalea, Saimono, adi dialeale. Dia holöfalï idihë namolö ulïsebele. 38 Nafadea dili digalasiloea, idihë nea Godema adosa namialo. Asigia hamomolö helësësa neago gaso, domalo wäbëai nebegola säi. 39 Amala säsila e bu awälahilä, dafidi säi amo gadola säha sulo. 40 Amala sälahilä e bu obëgësamelebe, ili adidimu dibe melï. Mida, süwiaea si gafodo gadugisalea amai. Ilia ema edo säla obëgëmolödula asusugai. 41 E bu osoda obëgëlahilä ilima sähalea, Dili hele aligisalea adi dialeafa. Amo dofea. Fu hä beselagalai. Bimo. Dolöïe Malö amo nafade hamolo amolima gaula ïasebego. 42 Nowemo. Nilïa gausiala afiadi. Ne gaumäia hololölo amoda ga made misi nebego bimola säi.

Yesu gaui

(Madiu 26.47-56, Ulugu 22.47-53)

43 Yesuea ado amo aso, säha nebegi, ïe bëgëla aulo giwilasi amoligi Yudasa e dolö maleibalä fodolofalï misi. Ilia helebe baialage gagaula ebalä misi. Gobela ïlo busa amoliage, mala dawadigi amoliage, dolö dafidilo amoliage ili mosalola säi. 44 Yesu gaumäia hololölo amea ilima dafidi daiala säla ïahalea, Na gomalä hamoseda, amo gabula helësëmalo. Dolö na mimila nödöseda, amo gaula hedabola sigi mosalola säla ï. 45 E beselagalala, Yesu neebea fodolofalï maala sähalea, Säla Olelelola sälahilä, Yesu mimila nödöi. 46 Mimila nödösebegi, ilia hä e gaula fëdöi. 47 Amala hamosebe amo gaalu, dolö afädë ami nelo amea helebe besela nealahilä, gobela ïlo Busa Edefade amoïe hamoi hamolasilo neebe amoïe gëhe dagala sali. 48 Yesuea ilima sähalea, Fa nelo gaumolöïe mulo amo gadola, helebe baialage gagaulahilä ne gaumolö misile. 49 Segeyo yafie ne dilibalä nea gobela ïlo mosöa ado mala olelesa nelo amogi ne dilia made gaui amo. Amai gaso, ado säla dëdëla negei dibe amo gadola hamomäiala säi. 50 Amala hamosa nebegi, ili sulubadela e dïgïla fisäla awäha maadei. 51 Malïsä afädë fagulo bulula gäi e bëgëla asi amo ilia e gaui 52 gaso, fagulo bulula gäi amo ilima gila amilahilä e hodomu dudugimu fisäla asimelë.

Galïsolö dolö amolibalä gudimolöïe Yesu sigi asi

(Madiu 26.57-68, Ulugu 22.54-55, 63, Yone 18.13-14, 19-24)

53 Ilia Yesu sigi gaula gobela ïlo Busa Edefade sebea ami asi. Gobela ïlo busa amolige, dafidilo amolige, mala dawadigi amolige gegedola ami sulo. 54 Fida e holöbö hobeala Yesu bëbëgëla awäha nelolahilä, gobela ïlo Busa Edefade amoïe mosö yala isogi nogila digalahilä, idihë aligilo amolibalä nulo gobei dibea ami hëgïmäia hausa sulo. 55 Gobela ïlo busa amoliage, Galïsolö dolö amoli sulubadelaeage dolö odoa misialolahilä, Yesuea asiala hamosa nawese melëlo amea fädäla sämalai. Ilia e nufuäia asiala hamoi walebelela hogosamelebe, afädë made melï. 56 Dolö yafiea ilima ea made hamoi amo babala säi gaso, ado afädëdi made melï. 57 Odoaea nowela aligilahilä, ea made hamoi amo babala säla sähalea, 58 Nilïada ea gomalä säi amo nabimelë. Godeïe mosö dolöïe naaboea hamoi amo, na hailadigila, segeyo ohodoa nelolahilä dolöïe naaboea made, bu elö ulimolömelëla säimelëla säi. 59 Amala säi amoge afädëdi made melï. 60 Amala säsebegi, gobela ïlo Busa Edefade amea dolö sefolalebe amoïe mogogi nowela aligilahilä Yesuma nabahalea, Dia ado afädë säla made obëgëmolöle. Dia asiala hamoila ilia säi amo edo hamoila nabi. 61 Amala nabasebegi, ea nafi dagala, ado afädë säla obëgëla made nebegi, gobela ïlo Busa Edefade amea ema bu elö nabahalea, Godea Afädë Memeleila säi amo, hï e hedabifalïïe malö dihïdilela nabi. 62 Amala nabasebegi, Yesuea sähalea, Ä, nemelë. Dolöïe Malö amo e Geloi Edefade neebe amoïe naabo dafädimadi filahilä, baidiligi maala neë, dilia siia bimolömelëla säi. 63 Amala säsebegi, gobela ïlo Busa Edefade amea nabalahilä, hïle fagulo nulilahilä ilima sähalea, Odoaea ea hamoi amo nalï made sämalo. 64 Ea Gode gagadese amo nabi amomelë. Dilia abilia helësësebela nabi. Amala nabasebegi, ili sulubadelaea sähalea, Ea asiala hamoi amoïeda e baagomäia nufulö dialeala säla didigai. 65 Amala sälahilä odoaea e gofedela galalahilä, ilia ïe si usulala nufudalahilä, nowëa amasiola sämola säi. Amalahilä idihë aligilo amolia e neawelahilä nufudala ïalalei.

Fidaea, na Yesu dawa madela säi

(Madiu 26.69-75, Ulugu 22.56-62, Yone 18.15-18, 25-27)

66 Fida e yala isogi nogila digai sebegi, gobela ïlo Busa Edefade amoïe hamoi hamolasilo dolïsä afädë maalahilä 67 beahamelebe, Fida e hëgïmäia hausa sebe amo fädäla bealahilä sähalea, Dige Nasalese dolö Yesubalä nawesa aligilo amo gabula säi. 68 Amala säsebegi, ea ne madela sälahilä sähalea, Na dawa made. Dia säsebegoda na made helësësebemelëla säi. Amala sälahilä e yala baagido idi dagaboimadi awäha nelo. 69 Hamoi hamolo dolïsä amea e bealahilä, dolö nefolalo amolima bu sähalea, Dolö goda amoligimelëla säi. 70 Amala säsebegi, ea bu elö ne mademelëla säi. Holöfalï nelolahilä dolö nefolalo amolia Fidama bu elö sähalea, Dofä. Dida amoligi. Dige Galili dolömelëla säi. 71 Amala säsebegi, Fidaea, na we wäfalï säseda, dofä ne Godea së ïmäiala sälahilä, gabulo wäla gabula migalïa diigila sähalea, Dolö ëi säse goda na dofä dawa mademelëla säi. 72 Ea ado amo säia gai amole haea gagalugo gawalia nafi bu äudä gäi. Fidaea amo nabalahilä dafidi Yesuea, Haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säi amo helësëla obëgëi. Amo helësëlahilä dïisa nelo.

Copyright information for `ETR