Mark 15

Yesu Bailadi neebea sigi asi

(Madiu 27.1-2,11-14, Ulugu 23.1-5, Yone 18.28-38)

Yosefalï gobela ïlo busa amolige, dolö dafidilo amolige, mala dawadigi amolige, Galïsolö dolö sulubadela amolia ado didiäha difolalahilä, ilia Yesu nafodolahilä Bailadi neebea sigi gaula asi. Sigi gaula maasebegi, Bailadia Yesuma nabahalea, Yu udia dolöïe beaha aligilo ginida dilela nabi. Amala nabasebegi, ea säla obëgësalea, Dia säse gomelëla säi. Gobela ïlo busa amolia sähalea, Ea nafade yafie hamoimelëla säi. Ilia Amala säsebegi, Bailadia ema bu elö nabahalea, Dia ado afädë säla made obëgëmolöle. Dia nafade yafie hamoila ilia säi amo nabilela nabi. Amala nabi amogi Yesuea ado elö made säla obëgëi amea, Bailadi e fudugisa nelo.

Yesu i fügäigi baala negemalola säi

(Madiu 27.15-26, Ulugu 23.13-25, Yone 18.39-19.16)

Segeyo Ede amoïe molö molö amo galada, Bailadia galabaia negei afädë fisigähamu aligilo. Udia dolöea fisigämola säse amo gadola fisigälo. Dolö odoaea gamanebalä nudusebegi nafodola negei amoligi afädë ëi Balabasa nelo. Ilia gamanebalä nudusolo amo gala dolö odoa nufudala baagoi. Udia dolö gegedoi amolia Bailadi neebea maalahilä ema sähalea, Dia nilïma hamolo amo gadola walio hamomäiamelëla säi. Ea ilima säla obëgësalea, Yu udia dolöïe beaha aligilo gini dihilima fisigämäiala helësësebelela nabi. 10 Amala säi amoïe mida, gobela ïlo busa amolia Yesuma mudialahilä e sigi gaula misi gabula Bailadia amala helësëlahilä säi. 11 Amai gaso, gobela ïlo busa amolia, udia dolö gegedoi amolia Bailadima gelolafalï Balabasa hilima fisigämäiala sämäiala si nigilasi. 12 Amalahilä Bailadia ilima bu elö nabahalea, Dilia Yu udia dolöïe Ginila sälo neebe goma na abilia hamomolödula nabi. 13 Amala nabasebegi, ilia bu elö gelola säla obëgësalea, Eda i fügäigi baala negemalola säi. 14 Amala säsebegi, Bailadia ilima sähalea, Mida edogi. Ea edo nafade hamoi gabiola nabi. Amala nabasebegi, ilia gelolafalï sähalea, I fügäigi baala negemalola säi. 15 Amala säsebegi, Bailadia, udia dolö gegedoi amolia obeägïmäia, Balabasa hilima fisigälahilä, ea odoama Yesu fëgämalolahilä, i fügäigi baala negemolö sigi mosalai.

Ami dolö amolia Yesu gadiaboi

(Madiu 27.27-31, Yone 19.2-3)

16 Ami dolö amolia Yesu sigi gaula gamane sigi aligiloïe mosö yala isogi nogila digai. (Mosö amoïe ëida Beledoliama.) Ami dolö odoage misialolahilä gegedoi. 17 Gedolahilä ilia fagulo sedade bëi gadoi Yesuma salugasilahilä, ëfë äyo gägäi amalela nasigïla Giniïe busa gadoi hamolahilä ïe busagia salugasi. 18 Amala hamolasilahilä ilia naabo sögö diigilahilä sähalea, Yu udia dolöïe beaha aligilo gini, namolöi namiäiala säi. 19 Amala sälahilä, ilia ïe busagia i gilia nufudalahilä, gofedela gagalalahilä, emo gumu sasagala fila digafulahilä gugusämäia hamolo wäla hamoi. 20 Ilia ema amala gagadiabosa nelolahilä, fagulo bëi gadoi amo hololahilä hïle fagulofalï amo salugasi. Salugasilahilä ilia e i fügäigi baala negemolöïe segea sigi asi.

Yesu i fügäigi baala negei

(Madiu 27.32-44, Ulugu 23.26-43, Yone 19.17-27)

21 Awäha nebegi, Salinia fii dolö afädë, Saimono, Alegisäda Ulufasalele eedo amo, sagaiala maasebegi e gausiala digalahilä, ilia e nealahilä Yesuïe i fügäi gaumalala eegei. 22 Ilia Yesu sigi gaula sege ëi Gologoda asi. (Gologodada nilïle ado adolada Busa Giwi Sege.) 23 Afialahilä ilia wani ödäge i afädëïe ödä muwege gegoalahilä egali muäia ï gaso, ea made mai. 24 Amala hamolahilä, ilia e i fügäigi baala negei. Amalahilä, ïe fagulo nowëa nimabelela, ilia sadu dahila, ïe fagulo amala mogei. 25 E i fügäigi baala negei amoda, yose eso neela udigisa nebegi, baala negei. 26 Ea nafade hamoila säi amo dëdëla negei amoda gomalä säi. Yu udia dolöïe beaha aligilo Ginila säi. 27 Amala hamolahilä, Yesu baala negei amo gaalu, fa nelo dolö äudä, elö ïe naabo dafädimadi, elö ïe naabo fefeädimadila, i fügäigi baala negei. 29 Udia dolö e dibeadi baagila afu mafusaleada, Yesuma busa dugagiladigi gagadiabola sähalea, Ëhehe. Godeïe mosö hailadigilahilä, segeyo ohodoagi ulimolöeai amo, 30 dihïmu damula awäla i fügäia adogoila digamola säla baagiladigisa nelo. 31 Gobela ïlo busa amolia, mala dawadigi amolibalä, amo gadola hilidomu Yesu gagadiabola sähalea, Udia dolö odoa damula aulo. Amo gadola, hïmu damula moholöi made. 32 Afädë Memelei, Isilale udia dolöïe Gini neebe amo, i fügäia adogoilahilä digamäia. Nilïa amo bealahilä, asigi afädë negedeläla säi. E i fügäigi baala negei gaalu, i fügäigi baala negei äudä amoleage e gadiabola amo gadolamu säi.

Yesu hame doala asi

(Madiu 27.45-56, Ulugu 23.44-49, Yone 19.28-30)

33 Eso mogogila eso bëgise gaaluge, sege sulubadela gasilasimu dilo. 34 Eso bëgise gaalu, Yesuea gelolafalï säia adahalea, Eloi, Eloi, lama sabagadanila säi. Nilïle ado adolada, Nïe Gode, nïe Gode, abisigi ne dïgïla asila säi. 35 Amala säi amo nabalahilä, udia dolö odoa ami nefolalo amolia sähalea, Nabuö. Ea Elaia wesebegola säi. 36 Afädë baluluia awälahilä, nelebo afädë dahudu gadoi wani ödä gamogai dibea ami gelahilä, i bidigi yaala, egali muäia ïalahilä sähalea, Aso. Elaiaea e i fügäigi dibea adogoi fisigämolö maasebelela beaha aligidila säi. 37 Yesuea gelola uualahilä hame doala asi. 38 Amasebegi, gobela ïlo mosöa fagulo edefade negei dilo amo, gadogola gadelala digalahilä, elö eamu eamula negesi. 39 Ami dolö hädali afädë beaha aligilo dolö amea sida adogola beahamelebe, Yesu amala hame doala asi amo bealahilä sähalea, Dolö goda dofä Godeïe malö gabula säi. 40 Amo gaalu, udiafalï holöbö wagadi madela nea, sida gala nefolalo amoligi Magadala udia Melige, Yosese ïe ëo Yemeselele eme Melige, Salomege nelo. 41 Dafidi Yesu e Galili neëgida, ilia e awäse amo gadola awälahilä, e ugila negesa filo. Udia odoa yafie ebalä Yalusaleme misi amolige nefolalo.

Yesu baui

(Madiu 27.57-61, Ulugu 23.50-56, Yone 19.38-42)

42 Segeyo amoda nelebo daialo segeyo. Deadise gaalu, segeyo Sabada aiyo namolö gabula helësëlahilä, 43 Alimadia dolö Yosebe Bailadi neebea awälahilä, bedälo made mumulasi amea, Yesuïe domalo nimolö audulela nabi. Dolö amoda Galïsolö amoligi asigi hedabi negei nea, Godea Beaha Maadela Sigi Neebe amo beaha nelo. 44 Amala nabasebegi, Bailadia e aabela baagoi gabula fudugilahilä, ami dolö hädali afädë beaha aligilo amo welahilä e hä baagoilela nabi. 45 Amala nabasebegi, Bailadima ami beaha aligilo amea e hä baagoimelëla säi amo nabalahilä, Yosebema ïe domalo nimolö dofeala säi. 46 Amala sälebegi Yosebea fagulo falei hedabi afädë nealahilä, ïe domalo i fügäidaia dibe amo neala gaula digalahilä, fagulo amea usulala gaulahilä, igi äbä dafidi hamola negei diloa ami baumolö gaula asi. Bausilahilä, igi edefademalä afädë bebugula gaula maalahilä amea idi gasi. 47 Amala bausi dibe amo Magadala udia Meli Yoseseïe eme Melilea melï.

Copyright information for `ETR