Mark 2

Yesuea dolö afädë fii si wahilasi

(Madiu 9.1-8, Ulugu 5.17-26)

Segeyo odoa ami nelolahilä Yesu e Gabaniama obëgëi. Obëgëla misi nebegi udia dolö nefolalo amolia Yesu mosöa obëgëla misi neala säi amo sulubadelaea nabaha maadei. Nabaha maadelahilä udia dolö yafie Yesu neebea ami sulubadela gegedosalea mosö isogige idilibage negegila fisila odoa namolö fufu made dibegi Yesuea ado mala säla ïaha nelo. Amala säla ïaha nebegi, ilia dolö afädë fii si sulo amo Yesu neebea ami dolö biyidiaea iwasala gaula misi. Udia dolö yafie fila negegi sebegi, ilia dolö amo Yesu neebea ami gaula moholöi made beala mosö fïgïdabodo fedalahilä Yesu neebe amo gaalula mosö fïgï dusuia galahilä dolö iwasala gaula misi amo fëola ïa idogoi. Ilia asigi afädë negei nea hamosebe amo bealahilä Yesuea dolö fii si amoma sähalea, Nïe malö, dia nafade hamoi amoli hësa maadeimelëla säi.

Amala säsebegi, mala dawadigi dolö odoa sefolalo amolia asigiamu helësësalea, Dolö gowea ado säsebego mi edoïe sähadu. Eada Gode gagadesa neamelë. Godea hïdofalïamu udia dolöea nafade hamoi amo hëmolöi neala helësësa sefolalo. Ilia amala helësësa dibe amo asigia fodolofalï bealahilä, Yesuea ilima sähalea, Dilia go helësësa dibegoda edoïe. Na dolö fii si gowema sämolö ado aabeida abodo. Dia nafade hamoi amoli hësa maadeila sämolö amo aabei gabule ma, di nowelahilä dïe fëo gaula nawesa namiëla sämolö amo aabei gabule. 10 Amaimo, Dolöïe Malö amea nagadaia wi nea, udia dolöea nafade hamoi amo hëladigimolöïe geloi gaula neebe amo dilia helësëmäia olesagomelëla säla ïalahilä dolö fii si amoma sähalea, 11 Dima sähago. Nowemo. Dïe fëo neala gaula dihï mosöa hä mosöla säi. 12 Amala säsebegi, dolö amo fodolofalï ïe fëo amo gaula udia dolö sidaia nowela segea awäsebe amo melï. Amala hamosebegi, ili sefolalo amoli sulubadelaea asigigi fudugilahilä Godeïe ëi gauia adala sähalea, Gowe hamosebe gowe gadoi nilïa melëlo madela sulubadelaea säla didigai.

Yesuea Ilibai wei

(Madiu 9.9-13, Ulugu 5.27-32)

13 Yesu e Galili oeabo edefade dibe nali amogi bu elö asi. Awäla nebegi, udia dolö sulubadela Yesu neebea ami gegedosebegi, ea ado mala olelesa nelo. 14 Amala olelelahilä, awäha nebegi, dolö afädë, Alibiasaïe malö Ilibai e dagisi muni nelo mosöa ami sebegi bealahilä, Yesuea sähalea, Ne awäsebewe gadola bëgëla misiëla säi. Amala säsebegi, Ilibai e Yesu bëgëla asi.

15 Yesu e Ilibaia mosöa molö naha sebegi, dolö yafie dagisi muni nelo amolige mala nafade hamolo amolige Yesula ïe bëgëla aulo amolibalä gedola molö naha sefolalo. Dolö yafie amo gadola nawei amoliada Yesu awäse amo gadola bëgëla awähamu nelo. 16 Dolö odoa mala dawadigige Felesi dolöge amolia beahamelebe Yesu e dagisi muni neloge mala nafade hamologe amolibalä molö naha sebe melï. Bealahilä Yesuïe bëgëla aulo amolima nabahalea, Mala nafade hamologe dagisi muni neloge ili ebalä gedola molö naha sebegoda edoïela nabi. 17 Amala säi amo nabalahilä Yesuea ilima säla obëgësalea, Udia dolö oloi made nefolalebe amolida alögoda neebea aulo mademelë. Oloi sefolalebe amolimu alögoda neebea aulo. Ne misi amoda udia dolö hedabi neebe amo wemolö misi made, udia dolö nafade hamolo neebe amo wemolö misimelëla säla ï.

Molö naala made aligiloïe mala negei

(Madiu 9.14-17, Ulugu 5.33-39)

18 Segeyo afädëgi ödägi gelo Yoneïe bëgëla aulo amoliage Felesi dolö amoliage molö made naala aiyala nelo. Ili Yesu neebea maalahilä ema sähalea, Yoneïe bëgëla aulo amoliage Felesi dolöïe bëgëla aulo amoliage molö made naala nefolaleamelë. Dïe bëgëla aulo golia molö aiyalo segeyo gogi molö naha nebego mi edoïela nabi. 19 Amala nabasebegi, Yesuea ilima säla obëgësalea, Dolö afädëa udia neahalea, e damelë molö molö gedoi amolima dili molö madela sämolöi gabule. Amala sämolöi mademelë. Dolöea udia neaseda, e dilibalä gedola salea molö molö dialea. 20 Amaimo, hobeala dolö amo odoaea e sigi gaula asibua dilida molö made naala namolömelëla säi.

21 Amala sälahilä Yesuea ado elö sähalea, Afädëa fagulo gofogi fagulo gähea damula baala nedëmelo mademelë. Amala hamoseda, fagulo gähe ameada gofo amo nulimolömelë. Amalahilä dafidi nuli amo gadola made bu edela nulimolömelë. 22 Amo gadolamu afädëa wani ödä gähe dibe amo ödä i sugua gafodoea siiba hamoi sibai amogida oselo mademelë. Afädëa wani ödä gähe amo sibaigi osaseda, i amoge wani ödäge dusula digala nafademolömelë. Amala hamoloea wani ödä gähe dibe amo ödä i sugua gafodoea hamoi gähegi oselomelëla säi.

Segeyo Sabada gafegi hamoi hamolo made negei

(Madiu 12.1-8, Ulugu 6.1-5)

23 Segeyo Sabada gafegi Yesu, ïe bëgëla aulobalä helebe guläia gadoi ëi widi sagaido afiaha dilo. Afiaha dialea ïe bëgëla aulo amolia widi amoïe gägä fafaila awäha nelo. 24 Amala hamosa nebegi, Felesi dolö nefolalo amolia bealahilä Yesuma sähalea, Nilïle mala säla negei dibe ameada segeyo Sabada gafegi made hamolo negei amo dïe bëgëla aulo golia damula hamosa nebego bimola säi. 25 Amala säsebegi, Yesuea ilima säla obëgëla sähalea, Debidige dolö odoa ebalä nefolalo amola ili molö madela sïdëa baagosebegi, Debidia hamoi dëdëla negei dibe amo dilia made melï neale. 26 Dolö ëi Abiada eda gobela ïlo Busa Edefade nelo amo nebegi, Debidia Godeïe mosöa nogila digalahilä beledi Godegali odala ï dibe amo molö nii. Beledi amo odoaeada nulö made. Gobela ïlo amoliamu nulö negei amo ea nalahilä odoa ebalä nelo amoli muäia neala gaula awäla ïmelëla säi. 27 Amalahilä ea ilima sähalea, Godeada udia dolö ugila negemäia segeyo Sabada gafe hamolasi. Udia dolöea segeyo Sabada gafe ugila negemäia hamoi mademelë. 28 Amala negei ameada Dolöïe Malö amo hï eda segeyo Sabada gafeïe Dafidilo neala säla ï.

Copyright information for `ETR