Mark 5

Yesuea dolö afädëma mugabe fedai nesiladigi

(Madiu 8.28-34, Ulugu 8.26-39)

Ili oeabo edefade amo dëgëla agesu näiado alämadi awäla Gelasa fii mosöa beselagalai. E ödä du ami dïgïla awäha nebegi, dolö afädë mugabe fedai igi äbägi baagoi bausidola maaha nebegi gausiala digai. Dolö amoda baagoi bausia amimu aligilo. Dolö afädëa ïe naabo emoge gaula nafodomolöi made. Igi ëfëage nafodomolöi made nelo. Segeyo yafiegi ilia ïe naabo emoge igi ëfëa nafodosamu nelo gaso, igi ëfëa naabo nafodoi amo hësäladigilahilä emo nafodoi amo damudasila hësäla sadia gaha aligilo ameada dolö afädëa e gaumolöi made nelo. Dolö amoda gasi esoage baagoi bausiale segebidaialemu nawesa aligilo. Ea üalala gaula nawesamu neada hïle domalo igia dagabosamu aligilo. Amala hamosamu aligilo amo Yesu wagadi made maase amo beala e baluluia awälahilä Yesuïe emo mia gumusula diadigai. Gumusula dialea gelola üalalahilä sähalea, Gode ilibia edefademalä neebe amoïe malö Yesu, dia nema abilia hamomolöïe misi. Na dima Godeïe ëi nabasewegida dia ne së ïmabiola säi. Ado amala gelola säi amoda Yesuea ema dida mugabe, dia dolö go dïgïla mosöla säsebegi amala säla obëgëi. Yesuea ema nabahalea, Dïe ëida nowëla nabi. Ea säla obëgësalea, Nïe ëida yafie, amai nilïda maleimelëla säi. 10 Amala sälahilä ea Yesuma gelolafalï sähalea, Segeweda dïgïla mosalola sämabiola säi. 11 Amo gaalu, sugua yafie gau domala moosa nefolalo. 12 Mugabe amolia Yesuma gelolafalï sähalea, Nilï sugua nefolalebe gagowelima fedamolö mosöla sämola säi. 13 Yesuea amala mosöla säsebegi, dolö amo dïgïla mugabe amoli sugua nefolalo amolima fedai. Amala nogila fedalahilä gau mogobogi amogi baluluia digafulahilä ödägi digafula sugua amoli sulubadela ödäea mai. Sugua amoli gegedolada dausini äudä gadoi ödäea mai. 14 Amo hamoi amo bealahilä sugua sigi aligilo amoli fisäla awälahilä gaamu dibea amige mosö gägäwila asi dibea amige säsäla awäha nelo. Säi amo nabalahilä udia dolö nefolalo amolia abilia hamoi walebelela fädäla bea asi. 15 Ili Yesu neebea awälahilä beahamelebe dolö dafidi mugabe yafie fedai nelo amo fagulo salugala e asigi hedabi sebe amo bealahilä ili bedäi. 16 Odoaea melï amolia udia dolö misi neebe amea nabuäia mugabe yafie nesiladigi amoge sugua ödäea mai amoge odoama fädäla säla ï. 17 Amala säla ïasebegi, ilia Yesuma sähalea, Dida nilïle segewe dïgïla mosalola säi. 18 Amala sälebe Yesu e ödä dudaia fimolö awäsebegi, dolö mugabe yafie fedai nelo dafidi nesiladigi amea nabahalea, Di awäsebe go gadola ne mudulela nabi. 19 Amala nabasebegi, Yesuea dolö amoma säla obëgësalea, Nebalä moholö made. Dafidilo Geloia dima hamoi amoïege bobasëi amoïege dïe sosogoma säla ïmolö dihï mosöa mosalola säi. 20 Amala säsebegi, dolö amea Gaamu Nabülasi dibeamadi awälahilä Yesuea ema hamoi amo udia dolö nefolalo amolima säla ïasebegi, ilile asigigi fudugi.

Yaulusiïe idiwige, udia Yesuïe fagulogi diigisebegi wahii amoge

(Madiu 9.18-26, Ulugu 8.40-56)

21 Yesuea ödä dudaia fila oeabo edefademalä amo dëgëla obëgëla agesua nebegi, udia dolö yafie mafula gegedoi. 22 Amala gedosebe amo gaalu, gedolo mosö beaha aligilo afädëïe ëida Yaulusi maala Yesu beagolelahilä ïe emo mia gumusula dia idogolahilä 23 ema gelola sähalea, Nïe nidiwi holöböda baagomolö ga madefalï dialea. Dofä dia naaboea diigisegi made baagola wahimäia awähadula säi. 24 Amala säsebegi, ebalä asi.

Udia dolö yafie nefolalo amoliage e bëgëla awähalea dedelela negegila aligi awäha nelo.
25 Awäha nebegi, udia afädë gäheo i nabülasi afädëïe odoai äudä heale olo olosamu aligilo amoge asi. 26 Udia ameada e wahimäiala alögoda yafie neebea ami aulo gaso, së edefade melï. Alögoda amolima muni ïaha maadelo gaso, olo amo wahila made neala edesa aligilo. 27 Amala salea Yesuea hamolo mala säi amo ea nabalahilä udia dolö Yesu e bëgëla asi amolibalä awälahilä e baagido maala ïe fagulogi diigi. 28 Hïdo asigia helësësalea, na ïe fagulogi diigiseda, neda wahimolöla helësëi. 29 Ea Yesuïe fagulogi diigisebegi, heale oloi amo fodolofalï hogosa helelahilä e wahimolöi wahii gabula helësëi. 30 Amala hamosebegi, fodolofalï Yesu ïe wahilasilo geloi awäsebe amo helësëlahilä besula nea nabahalea, Nïe fagulogi diigi amo nowëala nabi. 31 Amala nabasebegi, ïe bëgëla aulo amolia ema sähalea, Udia dolö dibalä dedelela negegila neebewe dia melï amo edoïe ne nowëa diigila nabahala säi. 32 Amala säsebegi, e nowëa diigi walebelela sidawewela hogoi. 33 Udia amea ema hamoi amo helësëlahilä bedäla emo gigisëla Yesu neebea maala ïe emo mia gumusula dialea. Sulubadela hamoi amo säla ïaha maadei. 34 Amala säla ïasebegi, Yesuea ema sähalea, Nïe nidiwie, dia Godema asigi afädë negei amea di wahigomelë. Dalulo gaula mosalo. Dima olo dilo amo fisimelëla säla ï. 35 Yesuea ado säla ïaha nebegimu dolö odoa gedolo mosö beaha aligilo Yaulusiïe mosöala misi. Maalahilä ilia ema sähalea, Dïe didiwi amo hä hame fidila asimelë. Yöi odoa olelelo dolö goma ïasebego edoïela säi. 36 Ilia Amala säsebegi, Yesuea auaulahilä gedolo mosö beaha aligilo amoma sähalea, Fudugimabu. Godema asigi afädë negemalola säi. 37 Amala sälahilä udia dolö odoa nefolalo amolima dili moholö mademelëla sälahilä Fida Yemese ïe edoo Yonela ohodoa ilimu ebalä asi. 38 Gedolo mosö beaha aligilo amoïe mosöa malïgahamelebe udia dolö yafie gegedola gualösalea didigaola osa dibe melï. 39 Beala e mumuso isogi digalahilä ea ilima sähalea, Dili edogi didigaola gualösa dialea. Udia malö holöbö goda baagoi made. Süwia adi dialeamelëla säla ï. 40 Amala säsebegi, ilia Yesubalä öi. Amasebegi, ea ili sulubadela segea nesiladigilahilä udia malö amoïe eedo emelela dolö ebalä misi amola ilimu hogoli afädëgi udia malö dusugala negei dibea ami asi. 41 Yesuea udia malö amo naabogi neawela nea ema sähalea, |iDalida gumi|r. Nilïle ado sälada, Udia malö holöbö, nowemola säi. 42 Amala säi amole udia malö amo fodolofalï nowela asi. Udia malö amoïe gäheo ida nabülasi afädëïe odoai äudä. Amala hamosebegi, udia dolö nefolalo amolia bealahilä edefademalä bedäla fudugi. 43 Yesuea ilima gelolafalï sähalea, Na walio hamoi amoda udia dolö odoama säla ïmabiola sälahilä udia malö go molö muäia ïmola säi.

Copyright information for `ETR