Mark 6

Nasalese udia dolöea Yesu hamei made nelo

(Madiu 13.53-58, Ulugu 4.16-30)

Yesu e sege amo dïgïla hï e ëdëi gaamugi awäsebegi, ïe bëgëla aulo amolige e bëgëla asi. Segeyo Sabada gafegi Yesuea gedolo mosöa ado mala olelesa nelo. Ea mala olelei amo nabalahilä udia dolö yafie gedolo mosöa sefolalo amoli asigigi fudugilahilä ilia sähalea, Dolö gowea ado säsebe goweda abidi niidu. Asigi edefade ema ï dibewe edodu. Ea geloi melëlo made gadoi hamosa neebe. Eda mosö olelo dolö, Meliïe malö nea madele. Eda Yemese Yosese Yudasa Saimonola ilile edoo madele. Ïe elefila ilida nilïbalä salea madele. Ilia amala sälahilä ema bimolö habobaha nelo. Amala säsebegi, Yesuea ilima sähalea, Bea sälo neebe amoda fii elö elöi neebe amolia ïe ëi gauia adala aligilomelë. Hïle segea fii afädë sosogo neebe amoliada ïe ëi gauia adala aligilo mademelëla säi. Ea dolöea hamomolöi made gadoi hamolo amo gadola segea ami hamomolöi made beala nelo. Ea udia dolö afädë afädëlamu oloi amo naaboea diigila wahilasisa nelo. Amala hamosebe amo beala ili asigi afädë made negela neebe amogi e fudugisa nelo.

Yesuea giwilasi amolima mala olelela afufumola säi

(Madiu 10.5-15, Ulugu 9.1-6)

Amalahilä eda udia dolö nefolalebeadi ado mala olelela aligi nawesa nelo.
Yesuea ïe bëgëla aulo giwilasi amoli misiëlahilä ilima sähalea, Äudä äudäla afufumalola sälahilä udia dolö mugabe fedai nefolalebe amoli nesiladigimäia ea ilima geloi ï. Ea ilima sähalea, Dili afiahaleada galiamomu gaula mosalo. Nelegei odoa gaula mosabio. Molöge aduge muni salelogi salalage gaula mosabio. Emo usililo salugamalo. Fagulo äudä salugamabiola säi. 10 Ea ilima sähamu nea sähalea, Sege afädëgi beselagalalahilä mosö afädëgi nogila digase amogimu nelolahilä dili bahïla awähalea dïgïla mosalo. 11 Sege afädëgi beselagalahamelë. Amo fii amolia mosö fu made ïalahilä dilia säse amoge made nabaseda, sege amo dïgïla mosalo. Dïgïla awähaleada, dilile emogi dao baai dibe amo fëfëla salalahilä, mosalo. Amala hamoseda, nilïa asiala hamoi amea amasebela helësëmolömelëla säi. 12 Amala säi amo nabala ili afialahilä udia dolö amolima dili asigi besumalola säla ïïa nawesa nelo. 13 Ilia amala säsäla nawesa nea udia dolö yafie mugabe fedai nefolalo amoli nesiladigiladigi. Udia dolö yafie olola nowei difolalo amoge ilia weli söga negesebegi, wahisa maadei.

Ödägi gelo Yone baagoi

(Madiu 14.1-12, Ulugu 9.7-9)

14 Udia dolöea Yesuïe ëi säsäi asi ameada beaha aligilo Gini Heledoea nabi. Odoaea sähalea, Ödägi gelo Yone dafidi baagoi amo bu nowelahilä obëgëla misi amea geloi melëlo made gadoi hamosa neamelëla säha nelo. 15 Odoaea sähalea, Eda Elaia neala säi. Odoaea sähalea, Eda bea sälo siiba nelo amo gadoi gabula säi. 16 Heledoea ado amo nabalahilä sähalea, Yoneda na muugi damui amo bu obëgëla maala neagowalea gabula säi. 17 Helodiasa eda dafidi Heledoïe edoo Filibiïe udia sulo amo hobeala Heledoea fedela nii. Amala hamosebegi, Yonea Heledoma sähalea, Dia didooïe udia fedela neala dibalä sebego dofea made hamoimelëla säi. Amala säsebegi, Heledoea ami dolö nefolalo amolima sähalea, Yone gaumolö mosalola säi. Amalebe ilia e nafodolahilä galabaia mosöa negei. Heledoea ïe udia Helodiasa obeägïmäia amala hamoi. 19 Ïe udia Helodiasaea Yonema habobalahilä e baagomäia abilia nufulödula helësësa sulo. Amai gaso, nufulö fu made melï. 20 Amasebegi, Heledoea Yoneda dolö hedabi, Godea hïle nafolai neebe amo helësëla bedälahilä idihë nelo. Ea Yonea ado säi amo nabalahilä obeägïlo amogi e asigi säosäola helësësa nelo. 21 Heledo e ägüla misi segeyo beala gamane sigi aligilo nefolalo amolimage ami sigi aligilo nefolalo amolimage Galili segeïe dafidilo nefolalo amolimage ea sähalea, Molö nudulä gegedomalola säi. Amala sälahilä molö giasolo amo gala Helodiasaea Yone nufulö dibe fu beagolei. 22 Segeyo amo gala udia Helodiasa hïle idiwi amo maalahilä sigoi. Ea sigoi amo bealahilä Heledoeage dolö odoaeage hedabola obeägï. Obeägïsa maadesebegi, Heledoea dolïsä amoma sähalea, Sigosegoïe nelebo afädë ïmose amo gadoi ïmolömelëla säi. 23 Ea naabo migalïa diigisalea dolïsä amoma sähalea, Nelebo afädë ïmoseda, na sege edefade beaha neebe amogi mogogi nofela ïmolömelëla säi. 24 Amala säsebegi, dolïsä amo segea doadigila awälahilä emema nabahalea, Ne edo ïmola sämolödula nabi. Amala nabasebegi, emea sähalea, Ödägi gelo Yoneïe busa damula ïmola sämalola säi. 25 Amala säsebegi, dolïsä amo Heledo neebea fodolofalï baluluia obëgëla awälahilä ema sähalea, Ödägi gelo Yoneïe busa damula falodaia gaula maala walio ïmäia hamesamelëla säi. 26 Amala säi amo nabalahilä Heledoea edefademalä bobasëla asigii gaso, dolö molö molö mofiai amoli sidaia migalïa diigila säi amo fisimola sämolöi made gabula helësëi. 27 Amala helësëlahilä Heledoea fodolofalï idihë aligilo afädëma sähalea, Yoneïe busa damula gaula obëgëmolö mosöla säi. Amala säsebegi, ea galabaia mosöa awälahilä Yoneïe busa damula 28 falodaia negela gaula obëgëlahilä dolïsä amoma ï. Ïasebegi, dolïsä amea emema ï. 29 Amala hamoila säi amo nabalahilä ïe bëgëla aulo amolia ïe domalo neala gaula awäla igi äbägi negei.

Udia dolö yafiea molö mai

(Madiu 14.13-21, Ulugu 9.10-17, Yone 6-14)

30 Abosolo dolö amoli Yesu neebea obëgëlahilä ilia hamoi amoge mala olelei amoge sulubadela ema säla ïaha nelo. 31 Udia dolö afu mafusalea ili molö molö fu made beasebegi, Yesuea ilima sähalea, Udia dolö madeido dihilido hele namolö mofiamalola säi. 32 Amala säsebegi, hilido ödä dudaia filahilä udia dolö madeido afiai. 33 Ili awäha nebegi, udia dolö yafiea bealahilä ili awäha gabula helësëi. Amala awäha gabula helësëlahilä ili gaamu elögi elögila nagadabodo baluluia awälahilä ili moholö awäsebea ami ilidale dafidi awäla beselagalai. 34 Ili awäla e ödä agesua aliga alogolahilä beahamelebe udia dolö yafie nefolalebe melï. Ili sugua sibi sigi aligilo madesalea hilido aligilo amo gadola neebe amo bealahilä ili bobasëi. Amalebe ea ado mala yafie ilima olelesa nelo. 35 Segeyo amo gala deadisebegi, ïe bëgëla aulo amolia e neebea maalahilä ema sähalea, Sege udia dolö maadeiawi nebegimu hä deadifalï gabumelë. 36 Udia dolö nefolalebe goli afialahilä hili molö bidia nimolö sagai mosö dibea amige gaamu holöfalï dibea amige hogola afiamalamola säi. 37 Amala säsebegi, ea ilima säla obëgësalea, Ili molö muäia dilia ïmalola säi. Amala säsebegi, ilia ema säla obëgësalea, Muni gina hädali äudäea beledi ili muäia neala ïmolö afiadulela nabi. 38 Ea ilima sähalea, Beledi aboläia ägüi walebelela bea mosöla säi. Bea awälahilä ilia ema sähalea, Beledi bia seme äudäla amomu ägülubela säi. 39 Amala säsebegi, ea ilima sähalea, Udia dolö giisidaia gegedola fifigimalamalola säi. 40 Ili odoada hädali afädë, amase, odoada nabülasi bia amoli gegedola fifigisa maadei. 41 Amala fifigi dibegi ea beledi bia amoge seme äudä amoge naaboea gaula nea selesaia mosöa sida adogola nea Godema nesegelahilä ïe bëgëla aulo amolia udia dolögali sogomäia beledi dagabodasila ï. Amala hamolahilä ea seme äudä amo dagabodasilahilä ili sulubadelagali mogela ï. 42 Udia dolö sefolalo amoli dofea naha maadei. 43 Amala hamolahilä ilia beledi semege nahalea fea digai amo neala adu giwilasi amogi salala nobala negei. 44 Dolö ami beledi mai amolimuda dausini bia.

Yesu ödädabodo asi

(Madiu 14.22-23, Yone 6.15-21)

45 Fodolofalï Yesuea ïe bëgëla aulo amolima sähalea, Dilidale dafidi ödä dudaia fila oeabo dëgëla alogodi sege ëi Bedesaida mosöla säi. Amala sälahilä udia dolö gegedoi amolima sähalea, Dili mosöa dusula afiamalola säi. 46 Dili hawio afiamalolahilä eda segebidaia ami Godebalä adomolö asi. 47 Ïe bëgëla aulo amolimu ödä dudaia fila asi oeabo mogogi gasise amo gaalu, Yesu e hïdo segea ami nelo. 48 Yesuea ami nea beahamelebe fo du busamadila maase amea ödä adelo i amea gelola adimolö ïliawasebe melï. Haea gämolö amo gaalu, e ödädabodo ili neebea moholö asi. Ili amilahilä baagila äudulä awäsebe 49 amo gaalu, ilia beahamelebe e ödädabodo maasebe amo melï. Bealahilä mugabeledula helësëlahilä üalai. 50 Ili sulubadelaea bealahilä edefademalä bedäsebegi, ea ilima fodolofalï sähalea, Asigi gelomalo. Nemelë. Bedämabiola säi. 51 E maala ilibalä ödä dudaia fii amole fo made maala damula negei. Amala hamosebegi, ilile asigigi edefademalä fudugi. 52 Iliada beledi ï amoïe mida fädäla made helësëi nelo amea fudugi. Ilile iso asigi galadigi nelo.

Yesuea Genesaledi ami udia dolö oloi difolalo wahilasi

(Madiu 14.34-36)

53 Amalahilä ili oeabo amo dëgëla alämadi sege ëi Genesaledi beselagalalahilä ödä du amo ëfëa begela agesua negesi. 54 Du negesilahilä maaha nebegi, udia dolö nefolalo amolia e aabela bealahilä Yesu gabula helësëi. 55 Amala helësëlahilä ili fodolofalï baluluia mosö dibeadi amogi afufui. Sege Yesu misi neala säi nabi amoliada Yesu neebea amimu oloi difolalo amoli dafudaia iwasala gaula mafui. 56 Mosö afädë afädëla neebea amige mosö yafie dibea amige sagai dibea amige e awäla beselagalasebea amida udia dolö nefolalo amolia oloi difolalo amo gaula mafula magaia gaamugi negesisilo. Gaula mafula negesisebegi, ilia Yesu hamelahilä sähalea, Dïe fagulo bidigimu diigimäiamelëla säi. Oloi amolia amala diigisebegi, wahisa maadei.

Copyright information for `ETR