Matthew 11

Ödägi gelo Yonea ïe bëgëla aulo amoli Yesu neebea mosaloi

(Ulugu 7.18-35)

Yesuea ïe bëgëla aulo giwilasi amolima säla olelela wagalahilä, amila awäla, ilile gaamu difolalebe amoligi nawesa nea, udia dolö ilima ado mala säla ïadigi, säla oleleladigisa namolö asi.

Yone e galabaia mosöa nea, Gelesoea hamoi hamosa neamelëla säi amo nabalahilä, Yonea ïe bëgëla aulo amolima sähalea, Yesuma ado gomalä nabulö mosalola säi. Amala säsebegi, ili Yesu neebea awälahilä, ema nabahalea, Afädë moholömelëla säi amoda dile, ma, nilïa elö beaha namolöledula nabi. Amala nabasebegi, Yesuea säla obëgësalea, Dili obëgëlahilä, ado nabi amoge, siia melï amoge, Yonema säla ïmalo. Sähaleada, Si golai nefolalo amoli siia beaha maadela, emo nafadei nefolalo amoli emosala nawela, amase, gudubu hamoi sefolalo amoli wahisa maadela, gëhe gai sefolalo amoli hä, nabaha maadela, amalahilä, udia dolö busadäoi nefolalebe amolima Ado Mala Hedabi säla ïaha neebeola säla ïmolö mosalo.
11.5 Godea Isilale udia dolö ugila negemolöïe nelebo amo gadola hamomolömelëla Aisaeaea bea säla negei. Aisaea 35.1-7, 61.1-4 bimalo.
Udia dolöea ne bealahilä, ilile asigi afädë negei made digasebe amoliada, obeägïsa neamelëla säi.

Amala säsebegi, dolö misi amoli awäse amo gaalu, Yesuea udia dolö gegedola nefolalo amolima Yoneïe helësëla sähalea, Sege nafadeia udia dolö aligilo made dibea ami afiai amoda, dilia edo bimolö afiai. Giisi sedade foea fologosebe amo bimolö afiaile. Dili afiai amoda edo bimolö afiai. Dolöea fagulo hedabifalïmu salugai neebe amo bimolö afiaile. Nabuö. Fagulo hedabifalï amo gadoi salugalo amolida beaha aligilo giniïe mosöa dilo nea. Dili afiai amoda edo bimolö afiai. Bea sälo afädë neebe amo bimolö afiaile. Ee. Amai galëda, na dilima sähago. Bea sälo odoa nefolalebe amoli holöbö gidogolahilä, eda ilibia neebe amo dilia melïgomelë. 10 Ïe helësëla, gomalä dëdëla negei dialea.

Nïe ado säla ïlo amo, dïe dafidila, mosalamolömelë. Di e baagia emosala nawemolöïe, ea dïe idi fodolasimolömelëla
säla dëdëla negei dialea.
11 Na dilima dofä sähago. Udiaea neegela ägüi amoli sulubadelagida, afädë ödägi gelo Yone neebe amo gadoi maade, ilida holöbö gidogo. Amai gaso, dolö afädë Hebeni Beaha Maadela Sigi Neebea ami holöbö gidogofalï neebe ameada, Yone baagila asi neamelë. 12 Ödägi gelo Yonea mi gäwila mala säla ïaha neloa amila maala, hä, walio wegida, odoaea Hebeni Beaha Maadela Sigi Neebe amogi ilile geloia digaha nea, amase, dolö nefolalebe amolile geloia gausa nea.
11.12 Damo gowegi dibe amoda Giligi adoea ulufala fädäla made säi. Be, dolö odoaea helësësaleada, Yesuea säi amoda sosogo odoa ilia Olomo ilibalä nudulahilä fisigämolö gabu. Nelebo amala hamose ameada, Hebeni Beaha Maadela Sigi Neebe amo nagadaia digamäia, Gode hï idi hamogimolö gabula helësëi.
13 Amaimo, bea sälo sulubadela nefolalo amoliage, amase, Mosesea Ado säla negei ameage, bea säsäla maaha nelolahilä, Yone neebea ami beselagalai. 14 Amaimo, dilia nabala asigi afädë negemolö galëda, Elaia moholömelëla säla dëdëla negei amoda, Yone e gabumelë. 15 Afädë gëhe galea galëda, hä nabulö dialea.

16 Udia dolö walio neebe weli ado abodo gadoima oodo beala sämolödu. Ilida malësäea magaia gaamugi salea, malësä odoama uuala säia gala sähalea,

17 Nilïa dilile bäidama dülasilebeda, dilia gosala made aligisio.
Amase, nilïa oböla dilile bobasëi gë udälasilebege, amogige dilia bobasëla dïila made nelomelëla
sälo amo gadoida ili nea.
18 Amaimo, Yone e maala neada, molö made naalage, wani ödäge made naala nebegi, ilia eda mugabe fedai neala sälomelë. 19 Amalahilä, Dolöïe Malö amo maala neada, ea molöge wani ödäge naha nebegi, ilia sähalea, Dolö neebe goweada molöge badoia nulö, wani ödäge edefade nulö nea. Amaimo, e dagisi muni neloge, amase, mala nafade hamolo nefolalebe amolibaläge damelë hamola aligilo neebe gowe bimola sälomelë. Amalo gaso, Godeïe asigi falagasei ulufadigisebe ameada dofä dibe amo ulufadigimolömelëla säla ï.

Gaamu odoagi udia dolöea asigi afädë negela made nelo

(Ulugu 10.13-15)

20 Yesuea gaamu odoagi nea geloi melëlo made gadoi yafie hamoi gaso, udia dolö ami nefolalo amolia asigi besula made nelo. Amala hamosebegi, Yesuea ilima nemola sähalea, 21 Golasini udia dolö dili, asigii gabu. Amase, Bedesaida udia dolö dilige, asigii gabu. Mida, dili nefolalebea ami geloi melëlo made gadoi hamoi amo, Daiale Saidonolemadi dafidi hamoi galebeda, ilia siiba asigi besusa maadeimelëla olela hewala fagulo gäla, nisibu uii filabio. 22 Amalabio gaso, na dilima säla ïahago. Memelela gudimolö segeyo beselagalasolo amo gala, Daia ilibaläge Saidono ilibaläge memelela gudimolö amo gadola made, dofä baagila awäla, dilibalä gelolafalï memelela gudimolömelë. 23 Amase, Gabaniama dilige, dilia selesaia mosöa moholöïe dihili dili gauia adogosa nefolaleale. Ai, dilida Heli segea sogobala sadia idogomolömelë. Dili nefolalebea ami geloi melëlo made gadoi hamoi amo Sodomo ami dafidi hamoi galebeda, Sodomo gaamu amoda aso, walio diëgi amalabio. 24 Amalabio gaso, na dilima säla ïahago. Memelela gudimolö segeyo beselagalasolo amo gala, Sodomo ilibalä memelela gudimolö amo gadola made, dofä baagila awäla, dilibalä gelolafalï memelela gudimolömelëla säla ï.

Yesuea dili ne neebea hele namolö mofiamola säi

(Ulugu 10.21-22)

25 Segeyo amo gala, Yesuea sähalea, Mudaiaïege, nagadaiaïege Dafidilo Geloi Nadoo, dima obeägïla nesegesa. Mida, asigi falagasei amolimage, amase, nagadaia mala dawadigi nefolalebe amolimage, dia hagulahilä, malësä gadoi nefolalebe amolima dia nelebo amoli ulufala olei amogi. 26 Ä dofä, Nado, dihï hamomolö helësëi amo gadola, amala hamoi gabumelë.

27 Nïe Nadoea sulubadela nema gausimelë. Afädëa malö e gowe neala dawadigi made. Nadoea hïdomu dawadigi nea. Amase, afädëa Nado e gowe neala dawadigi made. Malö eamu hïdo dawadigi nea. Amase, Malöea ïe Eedo olemolö helësësebe amolima oleseda, iliage e gowe gabula dawadigimolömelë.

28 Sulubadelaea nelebo yöi dibe amo baagi sëla gaula nefolalebela dilie, ne neebea mofiamo. Mofiaseda, na diligali hele fimolö amo ïmolömelë. 29 Sugua gaoea nelebo afädë gaula dusugamolöïe muugia i damui negela begelo amo gadola, dilia nïe ado hawala nema dawa nimalo. Mida, na dolö odoama hame negela, nihï nagadaialo mala hamolo. Ameada, dili hele namolö beagolemolömelë. 30 Amala hamomolö amoïe mida, nïe i damui negela begelo amoda häuai made, aabei dialea, amase, nelebo dihili neala gaumäia na ïmolö amoda yöi made, hageai dialeala säla ï.

Copyright information for `ETR