Matthew 7

Odoaea hamose amo mogesebe amoïe säi

(Ulugu 6.37-38, 41-42)

Yesuea ado aso, sähamu neamu sähalea, Godea dilia hamosebego mogeloea, odoaea hamosebe amoge made mogemalo. Mida, dilia odoaea hamosebe amo beala memelelo amo gadola, dilia hamosebe amoge beala memelemolömelë. Amase, dilia odoa beala mogelo amo gadola, dili bealage amo gadola wäla mogemolömelë. Amaimo, dilia dilile didooïe sihidoa gëgelë holöbö dibe alogola sälo amo, amai dihilile sihidoa i gäi gadoi dibe amo helësëla made sälo amoda edoïe. Dilia dihilile sihidoa i gäi gadoi dialea wäla, oböla dilile didooma sähalea, Dïe sihidoa gëgelë holöbö dibe alogo neahagola abeahäla sämolö gabu. Asigi fea negelo nefolalebela dili, dihilile sihidoa i gäi gadoi dibe amodale neadigilahilä, hobeala dilile didooïe sihidoa gëgelë holöbö dibe amo hedabola beala nimolöi bimolömelë.

Nelebo Godema odala ïlo dibe amogi, dilia ügülogali ïmabio. Amase, dilile helebe näia gadoi hedabifalï hïdo elöi difolalebe amoli suguagali sadia idogomabio. Amala hamoseda, ilia nelebo amolida emoea daiasala obëgëia welahilä, dili emosala nolealela mihimolömelëla säla ï.

Ïmola sämolöge, hogomolöge, idi gai dugimola sämolöge

(Ulugu 11.9-13, 6.31)

Yesuea ado aso, sähamu neamu sähalea, Ïmola sämalo. Ïmoseda, diligali ïmolömelë. Hogosa namialo. Hogosa aligiseda, dilia beagolemolömelë. Idi gai dugimola säha namialo. Idi gai dugimola säha aligiseda, di digamäia idi gai doga negesimolömelë. Mida, udia dolö sulubadelaea ïmosa nefolalebe amolia nimolömelë. Hogosa nefolalebe amolia beagolemolömelë. Amase, idi gai dugimola säha nefolalebe amolima idi gai doga negesimolömelë. Malö eedo nefolalebego, dilile malöea wahalo ïmola säseda, dili afädëa igi neala ïmolöle. 10 Amase, malöea eedoma seme ïmola säseda, dili afädëa dabaea neala ïmolöle. 11 Eedola dihilidilida nafade hamolo nea gaso, dilile malöma hedabi ïlo amoda dawa. Amo gadola made, dofä baagila awäla, dilile Diado selesaia mosöa neebe amea ïmola säsebe amoma nelebo hedabi ïmolömelë.

12 Odoaea mala sulubadela dilima hamomäiala hamelo amo gadola, amase, diliage odoa ilima amo gadola wäla hamomalo. Mida, Mosese nebegi Ado säla negei amoge, bea sälo nefolalo amolia ado säla negei amoge, amolia säi amoïe iso gäwida gomelëla säla ï.

Dilida idi doga negei dedeleigi digamalola säi

(Ulugu 13.24)

13 Yesuea ado aso, sähamu neamu sähalea, Idi doga negei dedelei holöfalï amogi digamalo. Mida, nafadelo segea aulo idi doga negeida edefade dialea, amase, idi amoge uahabai dialea. Udia dolö yafieda amogimu awäha nea. 14 Amai gaso, namolöfalï segea aulo idi doga negeida dedelei holöfalï dialea, amase, idige nelebolei dialea. Udia dolö afädë afädëlaeamu amo beagolelo neala säla ï.

Wäfalï bea sälo nefolalebe amolile säi

(Ulugu 6.43-44, 13.25-37)

15 Yesuea ado aso, sähamu neamu sähalea, Wäfalï bea sälo nefolalebe amoli helësëla, idihë namialo. Ili sugua sibi aeai gadoi, dili neebea mulo nea gaso, iso asigida nufudaha maadelo ilua ügülo gadoi nea. 16 Ilile gägä negesebe amo dilia bealahilä, wäfalï bea sälo gabula helësëmolömelë. Gufaeo gadoi neebe amomada, gägä hedabi ëi gelebi negesegi failole. Amase, buudi äyo ëfë gadoi amomada äfäeo gägä negesegi failole. 17 Amo gadoi, i hedabi nefolalebe amoli sulubadelaeada gägä hedabi negelo nea gaso, i nafade nefolalebe amoliada gägä nafade negelo nea. 18 I hedabi nefolalebe amoliada, gägä nafade negemolö ulï nea, amase, i nafade nefolalebe amolia gägä hedabi negemolö ulï nea. 19 I gägä hedabi made negelo nefolalebe amolida, sagai eedoea sulubadela abalahilä, nulogi sadia galo. 20 Amaimo, ilile gägä negesebe amo dilia bealahilä, golida wäfalï bea sälo gabula helësëmolömelë.

21 Sulubadelaea ne wesalea, Dafidilo Geloie, Dafidilo Geloiela säha nefolalebe amolida, Hebeni Beaha Maadela Sigi Neebea ami made digamolö. Nïe Nado selesaia mosöa neebe amea hamesebe amo gadola hamosa nefolalebe amolimu digamolömelë. 22 Godea gudimolö segeyo amo gala, udia dolö yafiea nema sähalea, Dafidilo Geloie, Dafidilo Geloie, dïe ëigila nilïa ado bea sälage, amase, dïe ëi säla nilïa mugabe fedai nesiladigilage, amase, geloi melëlo made gadoi yafiege dïe ëigila hamosa nelo amodala sämolömelë. 23 Amala säseda, na ilima sähalea, Dilida na dofä dawa made. Mala nafade hamolo dili, ne neebeawi made, bahïla afiamola sämolömelëla säla ï.

Dolö äudäea mosö uliïe säi amo

(Maga 1.22, Ulugu 6.47-49)

24 Yesuea ado aso, sähamu neamu sähalea, Amaimo, sulubadelaea na ado säsebeweli nabala bëgëla hamosebe amolida, dolö afädë asigi gäwia igidaia mosö uli amo gadoi nefolalea.
7.24 Giligi adoea dëdëida, igidaia mosö ulila säi. Mida, Isilale iliada igidaia mosö olelo amo helësëla amala säi. Nilïada igaudaia mosö olelo amo gadola.
25 Amala uli nebegi, hä, sege digalage, ödä bëi nedalage, fo guula maalage, mosö amo gelola nidäla asi gaso, made dagaboi. Mida, igau geloidaia uli nelo amea. 26 Amaimo, sulubadelaea na ado säsebeweli nabala made bëgëla hamosebe amolida, dolö afädë asigi made gäwia ödä bosedaia mosö uli amo gadoi nefolalea. 27 Amala uli nebegi, hä, sege digalage, ödä bëi nedalage, fo guula maalage, mosö amo gelola nidäla awäsebegi, mosö dagabola digala nafademolöi nafadeila säla ï.

28 Yesuea ado amoli sulubadela säha maadesebegi, udia dolö yafie negegila nefolalo amolia ea olelei amo nabalahilä, asigigi fudugisa sefolalo. 29 Mida, ilile mala dawadigi nefolalo amolia säla olelelo amo gadola made, eada geloi gaulahilä, geloi hïdo elöi säla olelei amogi.

Copyright information for `ETR