Titus 2

Fädäi neebe amolima olelemalai amo

Amasegi gaso, dihïda Godeïe mala dofä säla negei dibe amo gadolamu udia dolöma säla olelesa namialo.

Dia hä, dolö fädäi neebe amolima gomalä säla olelesa namialo. Ilia nelebo dibe amo sulubadela asigi gäwila hamomalolage, asigi mogoi namialolage, hili ilile asigi sigi namialolage, asigi afädë negei amo made digala gelola namialolage, odoabalä hedabola boba hahamosa namialolage, amase, yöi diëgi, dofea, aso madela namialolage, säla ïaha namialo.

Amo gadola wäla, udia fädäi sefolalebe amolimage, gomalä säla olelemalo. Baagido sämabiolage, gagaolo ödäea asigi made neala gagaomäiage, Godea hamei dibe amo gadola bëgëla hamosa samiäiage, ilia mala hedabi olelemolö galeamelëla säla ïmalo. Amala hamolo amea, udia fädäi amolia udia gafodo gähe sefolalebe amolima olelemolöi dialea. Ilia ilile dolöge, malöge, boba hamomalola olelemolöi dialea. Amase, ilia hilile asigi sigi aligilahilä, Godeïe siigi nigime baai made namialolage olelemolöi dialea. Amase, ilile mosöge malöge sigi aligila, haeafula gauia wewesa nea, ilile egoa hawa namialola olelemolöi dialea. Ilia amala hamosa aligiseda, odoa neebe amolia Godeïe ado nafade gabula made sämolömelë.

Dolö gafodo gähe neebe amolia hamomolö dialeala olelemalai amo

Amo gadola wäla, dolö gafodo gähe nefolalebe amolimage ilile asigi sigi namolö dialeamelëla gelola säla ïmalo. Dihï nelebo sulubadela hamosebego hamosaleada, mala hedabi hamosebego odoaea beala, bëgëla hamomäialahilä, olela hamomalo. Ado säla olelesaleada, ado odoa gegoala made säla, asigi gäwila nea, mogoimu säla olelelo namialo. Odoaea di baagido made sämäia, ado mogola sämolö dibe amo gadolamu säla ïaha namialo. Amala hamoseda, dibalä ado nii nefolalebe amolia nilï baagido sämolö fu made beala, hili ili hewamolömelë.

Hamoi hamolasilo neebe amolia ilile sigi aligilo hawa namolö dialeala olelemalai amo

Dia hamoi hamolasilo neebe amolima gomalä säla olelemalo. Ilile sigi aligilo neebe amo hawa nea, säla obëgëla made, ili neala obeägïlasila ilia säsebe amo sulubadela bëgëla hamola namolö dialeala säla olelemalo. 10 Amase, ilile sigi aligiloïe nelebo muni dibe amogi fa made nimäia säla olelemalo. Hamoi hamolasilo amolia hedabimu hamoseda, ilile sigi aligiloea asigi fodoia gala elelaboi namiäia olemolö. Amala olemolö dialeala hamoi hamolasilo amolima säla olelemalo. Mida, odoaea hamoi hamolasilo amolile mala sulubadela bealahilä, nilïle damula aulo Godeïe mala hedabi amoda momadolasi gabula sämäia.

Yesu misiäia beaha nea, nilïa Godea hamomalola säi dibe amo gadola bëgëla hamomolö amo

11 Godea udia dolö sulubadela damula aulo gaula namiäia, ïe ugila negelo amo ulufala olei. 12 Godema habola baagi ïala nagadaia galu helësëla, domaloea gelola hamelo dibe amoli sulubadela hamomolö, ugila negelo neebe amea nilïa fisisa maademäia olelelomelë. Asigi sigi namolöge, mogola hamomolöge, Gode mi hamola namolöge, nagadaia neebewegi nea, ugila negelo neebe amea nilïa amala hamosa namiäia olelelomelë. 13 Nilïa nagadaiawi amala hamosa nea, nilïa asigia sisiläfülo amo misiäia beaha nefolaleamelë. Amoda nilïle damula aulo Gode edefade Yesu Gelesoea ïe yo hïdo elöi digala ulufadigimäia beaha nefolaleamelë. 14 Ea nilï helësëla ïe namolö fisi. Nilïa nafade hamolo sulubadela dibea amila sigi obëgëmolöïege, hïle udia dolömu namiäiage, amase, hamoi hedabi hamomolö amo gelola hamesa namiäia, ea amala baagola bedefai.

15 Hä, mala amolida udia dolöma säla olelesa namialo. Godeïe geloigi nea, ilile asigi neala gelolasiladigi, nemoladigisa namialo. Udia dolöea di beala made golosomäia.

Copyright information for `ETR