Hebrews 1

Ómasímo gipalámini agepa ale vávani okago gakó lo limimó

Ómasi eza gozapá agepagutí gakó liaká a vetini kegepa ale vávani okimikago, keza avotegini nene gakó haitopaitolímini itó gapováa haitopaitolímini li kimiliki iva iva amóza, gamena asú inogo noigo imane gamena nene gipalámini agepa ale vávani okago aí gakó lo utó oko lo limimó. Gipala eza mukí netá matalímini mututonáa loló oko minative loko lota vémini zámuzatunú mukí netá ale utó imó. Ómasímini lapanalámini gonanalivámini luhuváa aitoka utó imó neve. Itó Ómasímo minoko aleko itímini lelegiláa aitoka minokanazo, nenemú ezáa zámuzalaló molo gele minake loaká noi gakó nenémo netá mukí hize lé omiaká noive. Áisi nene lihimate nagamí zelimiaká hozaváa ale asú oake, vozaú vémini agizani lamagaloka voko mitó minoko gizapa oko minamó noive. Lá noike ageló kivilege asú oko minamómámini lelegilaló nene agelolitini kugulizáini avilegeko iteko mina agulizá alimó neve.

Gipalámo ageló kivilege asú noi gakó

Ómasímo gakó makó gipala lo amimó nene ageló makó láa loko lo amesá amive. Makó nene gipala láa loko lo amimóma neve:

Géisi nene gipáne noanize,
nénisi nene itínasa gelémo utó nomuluve.
Itó lá okove:

Nénisi nene amelahina loló oko minatoze.
Itó áisi nene gipáne minative.
Makó nene minoko ganá gipala amiselekago, mikasiuka liminogo noigo, gipalámini gakoláa láa liki luhuva gizinamóma neve:

Ómasímini ageló vegená keza mukitó gupá zi amiki agepoka li amitave.
Itó helegaloka ageló vegenakumú láa loko luhuva gizonoimóma neve:

Ómasímo lokago aí ageló vegenalitini kemetameni ale viligokago hepé kemetameni ali luhiaká niave.
Keza gelekelé izegipala loló o kimikago ló guluma kemetameni ale luhiaká niave.
Lá onoimóza, gipalamú nene láa loko luhuva gizonoimóma neve:

Ómasi geza geí gonanalivagi siá alévoleláaló minoloko voko minanogane.
Itó geí zámuzámini hánusaváa ale minanike geí gasovaló nene ale hehe loko gizapa oaká noane.
Geza nene hee loko minoaká netakumú giviseaká noive.
Itó netá golesamú nene gumu helesá amive. Nenemú Ómasímo geí Ómasi áisi nene gogoliza vizitani netupa hologimikago gigivekagini kivilegekane.
10 Makó nene gipalamú ve makolímo láa loko lonoimóma neve:

Guivahani geza ganatilisi mikasímini guhaiváa molanimóma neve.
Itó okulumakuka keza nene gigizani luhuva ma niave.
11 Keza miniki haha inigave. Itó géisi nene mino alévolé oko minanogo ane.
Kéisi nene luhoaká gó nenéminiki minikanazo, litaha lanigave.
12 Lá iki niko, géisi nene gakeko ale molanogo ane.
Lá okako, keza nene haitó kemetameki lilí inigave.
Lá itamóza, géisi nene noani gemetamenigi áminalokó minanogo ane.
Itó meleke gamenavaka nene ma asú aminogo ive.
13 Itó Ómasímo gipala láa loko lo amimó neve:

Oko nigizani lamagáneloka minoloko voko noako
gala vega kelémo nupa okugo gigisa lapuvauka minanigave
loko gipala lo ami gakó nene ageló makó láa loko lo amesá amimó nenazo,
14 ageló mukí keza sikalahuki netá Ómasímini gelekeleláa nene lugutó vizeakalímini gihiláa ale lá ituni vegená lilími vatí itave lokogó kimiseleaká noive, itó Izesú nene ageló kivilege asú onoive loko gelenoune.
5 Age 2:7; 2 Sam 7:14; 1 Iki 17:13
,
6 Gapo 32:43; Age 97:7
,
7 Age 104:4
,
8-9 Age 45:6-7
,
10-12 Age 102:25-27
,
13 Age 110:1


Copyright information for `GAH