1 Corinthians 10

Juda una gollne singare ke yei mal nono ye djimbon

Agana kambono, ye pille kune yene dje na kandja djindo. Iwa Mosis moi poke ge, nono gollne kambono molmaka, God kam kupa ta dje worika, wo no gollne kondwe pine mal ombine dje awi. Awika ga po molo nu retsi to pruko dje er kona to orko pi. Retsi pi ge ne, kam kupa kani al ge, ga nu pai mal embe yei. Alla nu pai al ge, ga Mosis epilye moi. Ga porapora kwa noi ge God Murble awika noi. Alla nu noi ge God Murble awi ku al woika ga noi. Kaima, nu woi al ku ge, ga boll aike wani. Alla, ku ge yene Krais moi. Embe pai ba, merke singare ke yemaka, God kane ke pille toika, dumo wapra yei al ga golo ne to moi.

Nono gollne wal noip dje, imbon dje pille pla yei mal ge, wal su mal embe ye wori paro. Nono embe nayembon. Kambono god kende boll lotu ye awi mal, ye embe nayene! Baibel kandja embe bolo wori paro,

Kambono ami dje molo kwa no nu no kere, are agle po god kende pille pla ye awo singare ke yei we dji.

(Kisim Bek 32.6)

Kambono djingdjang ke embe yei mal ge, nono nayembon. God toika, ga twenti tri tausen (23,000) goi. Ga God nono tonda mo natonda ne dje singare yei mal embe nayembon. Are nomaga ke wo tomaka, pende goi. 10 Alla pende God boll tawa djimaka tau agelo tondo una ge wo ga to goi. Embe yei pille nono embe nayembon.

11 Makimb pora djino dje yenda poke nono mormon pille, nono gollne kambono yei mal embe nono kanpol to mopon dje une Baibel al bolo wori paro. 12 Embe yei pille, na aglo gi djino dje una ta embe pi dal, une kanpol tonda. Une kulngab yage djino dje pille kanpol tonda. 13 Ye nomane ke paro mal ge una porapora nomane ke paro mal ye embe paro ba, God kandja dji mal kaima yenda. Ye nomane ke ye molo ye djingjang al worno dje yenda poke ge God ye kond to aundaka ye aglo gi dje moye, kulngab nayagne.

Nono Godne ne, god kende aike lotu ye naumbon

14 Unakna wopake kambono, God embe yenda pille, una god kende lotu ye awinj mal ge, kere seke pine. 15 Ye nomane paro. Na kandja djindo ge, ye omuk to piye kune yenda. 16 Nono kap wain no, God wopake we dje aunmon kap nonmon ge, Krais meyamye nono i taimane na wordo mo? Nono bret tuklo nonmon ge, Krais gakle nono i taimane nawordo mo? 17 Nono bret nonmon ge, bret taimane ge nonmon. Nonmon al ge, nono gaklene taimane mal embe paro. 18 Juda una singare ye waninj ge ye kaninj. Ga alta al wal to golo gale opa ye awinj ge, mindjye pende i nonj al ge, ga i taimane wordo.

19 Ga god kende bekinj ge wal kaima yero we djino mo? Mo, opa gale iwo god kende awinj ge singare pai mal yenj we djino mo? 20 Ge man! Na kandja embe djindo, orko una po alta al wal opa ye awinj ge, God pille opa ye nawinj, ga kum ke pille opa ye awinj we djindo. Alla kambono kum ke lotu ye awinj mal, ye embe nayene dje na nomana embe paro. 21 Ye Iwa Kerman ne, kum ke boll aike kap wain taimane nane ge kune nayenda. Ye Iwa Kerman ne, kum ke boll aike bo al kwa taimane nane ge kune nayenda. 22 God nono elle kumbso aunda dje nayembon. Nono yembene paro, God yembe naparo, dje nayembon.

God nale al wal midjye nambon wambo naparo

23 Wal porapora yembon ge wambo naparo, yembon we djinj ba, wal pende nono ye wopake ye naunda. Wal porapora yembon ge wambo naparo, yembon we djinj ba, wal pende ye wordaka nono Krais boll agle gi nadjimbon. 24 Nono singare yembon ge, nonekne wopake mopon dje nayembon, man. Nono una djell ta wopake moye dje yembon.

25 Wal mindjye iwo maket ta pagye ge, ye nane wambo naparo. Ye nomane to, midjye nambon wambo paro mo man da? dje ye napiye. 26 Nono kanmon,

Dumo makimb yero ge ne, wal porapora pakna paro ge, Iwa Kerman wal ne moro we dji

(Buk Song 24.1)

27 Alla, Jisas boll pillgi nadinj una kwa aike nambon we djineke, ye kambono numbine bon dje piye ge, ye pine kune yenda. Kwa gale aune mal ye kiwa nane, ye nambon kune yendo mo man ne? dje ye nomane to napiye. 28 Ba alla, una ta ye moye al kandja embe djinda, mindjye nonmon ge, una ipo god kende moi al opa ye awi mindjye we dji dal, ye nanane. Ye una ne, iwa ge nalene al, wambo pa djinda dje pille, nanane. 29 Na kandja embe djindo ge, ye nane wambo panda dje pille na nadjindo, man. Na djindo ge, ye naneke, iwa ge nale al ye wambo napanda dje na kandja ge djindo. Na wal nano ba iwa ge mapill paro we djindo ge namba yei pille na kantau yenda? 30 Na God pille wopake we dje awo kere kwa nano. Una kane, ni kwa nonden ge, wambo paro we djine ge kune nayenda. 31 Embe yenda pille, ye kwa mokna nane mo, ye nu ta nane mo, ye singare ta yene ge, ye God kandjiye kerman panda dje yene. 32 Ye singare ta yene ge, ye Juda una ne, epil djell una ne, pillgi djinj una porapora pille, ga kane ke napiye dje pille singare embe yene. 33 Ye singare embe yene we dje na kandja embe djindo ge, na embe ye una porapora kane wopake piye dje yendo. Nanam wopake moyo dje nayendo, una porapora wopake moye dje yendo. Embe yendo ge, God kambono i yem worda dje na embe yendo.

Copyright information for `GAM