1 Corinthians 11

Krais singare yei mal na embe yendo pille, na singare yendo mal ye embe yene.

Ana yenekne ngambalne to bi djine mal

Ege ege ye na we dje pir ge ne, asa na kandja dje ye awillka ye karkar yenj ge, na wopake pro. Ba na kandja ta ye piye dje pille djindo. Iwa mor ge, yenekne ngambalne ge Krais moro. Alla ana ngambalne ge yenekne wogane mor. Alla Krais ngambale ge, God moro. Una makai to lotu yene al, iwa ta yene ngambale to bi dje, kamang yenda ge une Krais ye ke ye aunda. Une ngambale to bi dje kandja propet dje awi dal, une para Krais ye ke ye aunda. Alla, ana ta yene ngambale to bi nadjinda ba kamang yenda mo kandja propet ta dji dal, une woge ye ke ye aunda. Une ngambale to bi nadjinda ge, ana ngambalne ene bale i worinj mal embe ngandjill panda moya. Ana ge ngambale to bi nadjinda ge, yene ngambale ene kelip to woro kerda. Ba alla, ana ngambalne ene kelip to worne mo, balo i worne ge, ngandjill goye. Ga ngandjill golo djine dje ngambalne to bi djine. Iwa mor ge, God minye manye ne, yene kandjiye kerman paro mal, ga su mal mor pille, una makai to lotu yene al, iwa ngambalne to bi nadjine. Ba ana mor ge, iwa kandjine kerman paro mal ge, su mal mor.

God ana gakle ta i, iwa nambeki, man. God iwa gakle ta i, ana beke yei. God ana pille iwa nambeki, man. God iwa pille ana beki. 10 Embe yei pille, ana ngambalne to bi djine. Ga menameto morka, tau agelo molo kaninj pille ga ngambalne to bi djine.

11 Ba alla Iwa Kerman boll mormon al, iwa yene namoya ana boll aike mopell. Alla ana yene namoya iwa boll aike mopell. Iwa ana amblo pille dje auneke, ana iwa amblo pille dje auneke, embe yembon. 12 Yembon me ge embe paro, God iwa gakle ta i pagle ana beke yei mal embe, ipon ana ye molo iwa kur. Alla wal porapora paro ge, God wal me moro.

13 Ye yenekne djine, ye makai to lotu yenj al, ana ta molo yene ngambale to bi nadjinda ba kiwa molo kamang ye God aunda ge, kune yendo mo man? 14 Iwana mor mal nono kanmon ba ye nakaninj? Iwa ta ngambale ene momo moya ge, kune nayenda, una ke kanne. 15 Ba alla ana ta ngambale ene momo worda moya ge ekin wopake dal paro. Ekin wopake dal paro ge, God awi une ngambale kau wopake paro. 16 Pai ba una na boll kandja ge pille nonga djimbon dje yene ge, na kandja embe djino, no singare ta naparo. Alla, pillgi pai una mambine mambine mor al ge ga para singare ta naparo.

Korin una bret ne wain noi ge, ale pai

17 Na ipon kandja manda djindo ge, na ye wopake we dje naundo. Ye makai tonj poke ge, ye singare wopake nayenj, ye singare ke yenj. 18 Una dji pill, ye makai tonj poke, ye nonga dje bill djelldjell tonj. Alla una kandja embe dji ge, kandja kembis ta kaima panda paro dje na pro. 19 Ba alla ye bill djelldjell to nonga dje yei dal, yem ge kandja pai mal djinj dje kane, yem ge man dje kanbon paro.

20 Embe pille, ye makai to molo, kwa mokna aike nambon dje yenj ge, ye Iwa Kerman bretye nambon we djinj ba kune nayendo. 21 Ye yenekne kwaine moknane nambon dje yenj. Pende tau naye, yenekne kwane ola dje nonjka, pende koll gorka, pende nu merke no dall yenjka embe yenj. 22 Ge namba yei? Ye yenekne kwa ne, nu nane numb nayero mo? Ye pillgi djinj una bakale aumbon dje yenj mo? Ye una wal kane nanonj ge, bakale aumbon dje yenj mo? Na kandja namba we djino? Na ye wopake yenj we djino mo? Ge man! Ye ke yenj.

Jisas bret wain i kogoye una awi

(Matyu 26.26-29 ne, Mak 14.22-25 ne, Luk 22.14-20)

23 Na ipon manda kandja dje ye aundo ge, Iwa Kerman na kandja dje awi mal, ye dje aundo. Kunda yem una aglene al aumbon dje yei poke ge, Iwa Kerman Jisas bret ta i, 24 God wopake we dje awo, tuklo awo embe dji, ge na gaklena, na ye pille aundo. Ye embe nane ge, ye na we dje pille nane we dji. 25 Yei mal embe, ga kwa no kermaka, Jisas kap wain ta i embe dji, kap wain me ge embe, God kandja gun dje gopa toi mal ge, na meyamna tulu djindaka, kaima panda we dji. Ye embe nane ge, ye na we dje pille nane we dji. 26 Jisas kandja embe dji ge, une nono ombine dje awi. Ye bret ne wain nonj al ge, Iwa Kerman goi mal ye ombine dje pene woro awinj, ye embe no pa pineke are une yem wonda.

Bret ne wain nambon ge, nono nomane wopake panda nambon, kiwa nanambon

27 Embe yei pille, ye nomane kune napandaka ye Iwa Kerman bret ne wain noi dal, ye Iwa Kerman gakle ne meyamye ye ke ye aune. 28 Ye embe yene mal pai pille, asamoll ye nomane to kune ye pagle bret ne wain nane. 29 Ye Iwa Kerman gakle kane kune naye, bret ne wain kiwa noi dal, ye wambo pandaka, God ye tonda dje pille yenj. 30 Ye embe yenj pille, ye mor al una merke yembene naparo, ye ke tondo, alla una pende gor. 31 Ba alla asamoll nonekne nomane al omuk to pagle are bret ne wain nambon ge, nono wambo napanda. 32 Ba alla God nono wambo paro ge kane imb aundo poke, une nono amblo du dje aundo, makimb una tonda poke une nono natano dje pille yendo.

33 God embe yenda pille, agana kambono, ye bret ne wain nambon dje pille makai to moye ge, ye tau yene, una wo kerneke ye nane. 34 Ye koll kerman tondaka, una wone dje kui yembon dje nayene ge, ye numb al molo kwa nane. Man panda, ye makai to molo kwa naneke, wambo panda.

Pi ye kandja ta panda ge, na ye mor al wonaka, kandja ge djimbon.

Copyright information for `GAM