1 Corinthians 14

God Murble wal wopake aundaka, una propet djinj mal embe dje, kandja djell ta dje embe yene

Ye una boll kane wopake yene ge, yembe yene. God Murble wal wopake aundo ge ye imbon dje yembe ye ine. Une wal aundaka ye wal taimanta asamoll pille imbon dje yene. Ge una propet kandja djinj mal ye God kandjiye dje orko woro una aune, ye embe imbon dje yene. Una kandja djell ta mal djinj ge God boll kandja djinj; una boll kandja nadjinj. Una kandja embe djinj ge, God Murble boll aike molo kandja seke paro ge djinj; una pille ine naparo. Ba alla una propet kandja djinj mal ge, God kandjiye dje orko woro una awinj. Ga kandja wopake mal djineke, una wopake piyeke kumbene arngan yendaka, Iwa Kerman kandjiye al aglo gi dje moye. Una propet kandja djinj mal djindo una ge, une pillgi pai una porapora aglo gi djine dje yendo. Ba una ta kandja djell ta mal djindo ge, yene taimane molo Iwa Kerman kandjiye al aglo gi dje yendo.

Ye porapora kandja djell ta djine ge na wopake piyo, ba ye una propet kandja dje orko worinj mal embe yene ge, na wopake kaima piyo. Ye mor al una ta molo, kandja djell ta djindaka, age ta kandja kep ye aundaka, una porapora pille kune yene. Kandja kep ye aunda una ta namoya ge, kandja djell ta djine ge kune nayendo. Una kandja kep ye aunda una ta namoi dal, una propet kandja dje orko worinj mal, embe djine ge, kogo wekle mal embe yene. Kandja djell ta djine ge, kogo are mal embe yene. Agana kambono, ye Jisas boll aglo gi djine ba, na wo kandja djell ta djinaka, ye pillpol nato moye ge, ye aglo gi djine naparo. Ba alla na ye moye al wo kandja seke dje pene woro, God nomane paro mal dje orko woro, una propet kandja djinj mal embe dje, kandja ta ye beke auno ge, ye Jisas boll aglo gi djine kune yendo.

Gita ne pupnume tambon ge soka ge gun namormell ba, gita paro mal namblo, pupnume paro mal nato, kiwa to pla kal yembon ge, una megye napiye. Alla ami una ta bigul to kune nayenda ge, ami una wal amblokun ye molo po kunda nayene. Yenj mal embe ye una moye al kandja megye boll nandji dal, una namba mal pille ine? Ge man, ye kandja djine ge kopo mage i er punda. 10 Dumo makimb porapora yero al una yenekne kandjine kayekaye dje mor, alla kandja djinj mal yenekne pille kune yenj. 11 Ba alla ga kandja djineke na pille naino ge, ga una gulke mal embe moyeke na una gulke mal embe moyaka yembon. 12 Embe yei pille, ye God Murble wal wopake aunda imbon dje yene ge, ye Krais unakye aglo gi djine dje pille yene.

13 Me ge pai pille, una ta kandja djell ta djinda ge, yene kamang ye God aundaka une kandja kep ye aundaka una piye. 14 Pir mo? Na kandja djell ta djino dje pill dal, na nanam kumbena al kamang yeno, na nomana ge kiwa yenda. 15 Embe panda ge na namba yeno? Na soka aike yeno. Na kamang yeno ge, na kumbena al dje, nomana al dje embe yeno. Na gollang djino ge, na kumbena al dje, nomana al dje embe yeno. 16 Man panda, ni kumben al God wopake we dje aumben ba, agan ge napiya. Ni kamang ye kere amen we djimben ba agan napille moya, une ni boll aike amen djinda naparo. 17 Ni God wopake we dje aumben ge ni wopake yenden, ba ni agan yake pla napundo.

18 Ye una kandja djell ta dje yenj mal na embe nayendo, na merke yendo. Yendo ge na wopake we dje God aundo. 19 Jisas unakye makai taneke na pakna po kandja djell ta ten tausen (10,000) dje aunaka, una pille nai dal, ge kune nayenda. Ba alla, na po kandja megye 5-pela dje bek aunaka, una pille kune yene ge na wo piyo.

20 Agana kambono, una kandja djell ta djine ge ye womba nomane paro mal embe napanda, ye iwana dongall molo yake pla pine. Una singare ke kayekaye yene ba, womba singare ke paro nakaninj mal ye embe moye. 21 God lo dje awi al kandja embe mal paro.

Iwa Kerman kandja embe dji, nanam unakna moye al kandja dje auno. Na una djell ta dje wornaka, ga po yenekne kandjine djine ba, nanam unakna pillpol nato molo, na pille mop aune we dje Iwa Kerman embe dji.

(Aisaia 28.11)

22 Embe dji pille, una propet djinj mal embe djine ge, God pillgi pai una piye dje yei. Una orko una piye dje nayei. Ba alla, una kandja gun djell ta djine ge, God yene yembe pai mal ombine dje awi kanmon. Pillgi pai una piye dje nawi, man. Una orko una piye dje pille awi.

23 Embe yei ba, ye Jisas pillgi djinj una makai to molo, una kandja djell ta djine ge, una orko una er numog wo kani dal, ga kandja embe djine, kambono kandja dall kandja dje mor dje piye. 24 Ba alla ye porapora una propet kandja djinj mal embe dje auneke, una orko una ta numog wonda mo una ta ye yenj mal napille molo er numog woi dal, ye kandja djineke une yene singare ke yendo mal pille kune yendaka, une kumbe boya. 25 Yene nomane ke merke paro ge er pene wondaka, une kake gopye boglo, taimangaus pa, God pille pla ye awo, kandja embe djinda, God ye mor al kaima moro! we djinda.

Lotu yembon ge aulaul nayembon; paro mal yembon

26 Agana kambono, ye lotu yene poke, namba mal yene? Una ta wo gollang dje auneke, ta kandja ta beke auneke, ta kandja seke ta pai ge dje pene worneke, ta una kandja djell ta djineke, ta kandja kep ye aune. Embe mal yeneke una aglo gi dje moye. 27 Ye lotu yene poke, ye una kandja djell ta djine panda, una soka djimbell, mo sokara djine, merke nadjine. Alla djine una porapora kandja kune taimane nadjine. Ta asamoll djinda. Une dje kerdaka, ta are djindaka embe yene. Una kandja djell ta djine ge, una ta kandja kep ye aunda. 28 Una kandja kep yenda una ta namoyaka, ga kiwa moye, kandja nadjine, yenekne nomane al dje, God moya al dje embe yene.

29 Ye lotu yene poke, una propet djinj mal embe dje aune ge, una soka djimbell, mo una sokara djine. Kandja djine mal, una pille molo, God dje awi djinj mo man ne dje omuk tane. 30 Una ta kandja dje aundaka, age ta ami dje moya. Ami dje moyaka God kandja ta dje une awi dal, une kandja ge dje pene worda, age kandja dje moi una alla nadjinda. 31 Ye kandja propet djine poke iwa ta djinda, dje kerdaka ta djinda. Embe djineke ye una porapora pille i pagle, aglo gi dje moye. 32 Una propet kandja djinj mal embe djine una moye ge, yenekne djillakene kantau wopake yene; kandja djine ege wondaka djine, kiwa nadjine. 33 Kiwa nadjine ge God para aulaul nayenda, une kune paro mal yendaka, nono ami dje wopake mopon dje yendo.

Ye God lotu ye aune poke, ana kambono kandja nadjine, kiwa moye. Mosis kandja dji mal pille, ga menameto moye. Mabine djell ta nayero; God unakye dumo yemyem molo lotu ye God awinj ge, ana kambono kandja nadjinj.
35 Ana kambono kandja ta pupon dje yene ge, numb al po yenekne wogane moye al kandja dje piye. Una lotu djinj al ana kandja dje pene worne ge, kune nayendo.

36 Mo, ye Korin una taimane mor ge God kandjiye dje orko wori mo? Mo, God kandja dje ye Korin una taimane mor ge awi ye pi mo? Ge man! 37 Na propet moro we dje pille wanden mo? Na God Murble boll kune moro dje pille moren mo? Ta pin dal, embe kanben: na ye embe yene we dje pepa bolo worill pai mal ge, God yene kandja dji mal paro we dje kanben. 38 Ba alla ni man dje pupen ge, una ni propet kaima namoren dje piye.

39 Embe yei pille, na agana ye mor ge, ye una propet kandja djinj mal embe yembon dje pille pla yene. Alla, una kandja djell ta djimbon dje yene ge, ye man we nadjine. 40 Pi ye lotu ye aune poke ge, ye singare du dje paro mal pille lotu ye aune.

Copyright information for `GAM