1 Corinthians 16

Korin una ku iwo Jerusalem God wombaye aumbon dje yei mal, Pol kandja embe dji

Una ku iwo Jerusalem God wombaye moi al aumbon dje yenj mal, na ipon ye boll kandja embe djino dje yendo. Na propins Galesia po God wombaye moi al kandja dje awill yei mal, ye embe yene. Sande ege ege ye taimantaiman dje mor ge, ye waka kogo yenj mal ku kembis i djell worne yenda. Ye embe yei dal, na are wonaka, ku gun alla makai natane, ye ku i djell wori mal i pene woro makai tambon. Na wonaka, ye una pende djineke, na ga kandjine pepa al bolo aunaka, ga ku pepa boll aike er Jerusalem pine. Alla na aike er Jerusalem puno we dje na embe pill dal, ga kambono na boll aike bon.

Pol dumo Korin una kanno dje pille moro

Na asamoll popins Masedonia pakna yero al wane pagle, are na ye mor al wono. Na wo ye boll pende kanan moyo mo man, na napro. Ege bi kopo yenda kune na ye boll molo pano, mo na napro. Na wo ye boll moll dal, are ye na amblo pille dje auneke, na er tabye ta puno. Na ege tuge ta ye boll moyo dje nayendo; God kapla we dji dal, na pende kanan ye boll moyo dje pro. Na kunda yem una merke mor ba, God kond kerman ta yapro awi, na God kogoye yeno paro. Na dumo Epesus moro al moyo. Are ege kerman Pentakos yendaka, na ye mor al wono.

10 Timoti ye mor al woi dal, ye wopake ye auneke, une kand nagoya, kiye dje molo kogo yenda. Na Iwa Kerman kogoye ye wanmoro mal une embe yendo, ye wopake ye aune. 11 Ye una pende Timoti kane una kiwa moro dje pille mop naune, man. Une na moro al wonda poke, ye pak to awo, kandja wopake dje awo worneke, une na moro al arngan ye wonda. Ge une age pende boll aike wone dje na tau moro. 12 Alla nono agane iwa Apolos wanmoro ge, na une moi al kandja yembe ye dje embe djill, no agane er Korin una mor al pine kune ge, ni kambono boll aike po kane! djill. Ba, ipon une punda nayei, man dji; ege are ta yenda na po kanno we dji. 13 Ye kanpol to molo; pillgi dje pa moye. Ye aglo gi dje molo kand nagoye! 14 Ye wal porapora yene mal ge, ye una kane wopake ye awo kogo yene. 15 Ye kani, propins Akaia pillgi dji una moi al iwa Stepanas epilye moi ge, asamoll pillgi dji. Dje molo, yenekne nomane pai mal pille, ga po pillgi dji una moi al amblo pille dje awi. Agana kambono, 16 na kandja dje ye aundo, iwa Stepanas epilye mor ge, ye una mor mal embe menameto moye. Alla una ga boll wo kogo taimane yene ge, ye para menameto moye.

17 Ye wo na amblo pille dje aune kondwe nayei ba ye na ye wopake ye aune mal embe, iwa Stepanas ne, Portunatus ne, Akaikus wo kogo yei al na wopake pill. 18 Ga na nomana ye wopake ye awo, ye nomane para aike ye wopake ye awi. Una mor mal embe ye pille pla ye aune.

19 Pillgi pai una propins Esia mor ge, wopake we dje ye awinj. Iwana soka Akwila ne Prisila ne pillgi pai una soka numbine al makai to mor una ge, Iwa Kerman kandjiye al ye wopake kaima we dje awinj. 20 Agane kambono porapora ba mor ge, wopake we dje ye awinj. Nono God wombaye molo yenmon mal ge, ye yenekne djembon to awo, gumane djillakene to nane.

21 Na Pol, na ye wopake we dje awo, pepa ulle al bolo aundo ge, na nanam aglena al boro.

22 Una ta Iwa Kerman wopake nakani dal, une golo seke punda! Iwa Kerman, ni er yem we! 23 Iwa Kerman Jisas wandill golo awi ge, ye boll panda. 24 Jisas Krais kandjiye al na ye porapora wopake kane aundo. Kaima.

Copyright information for `GAM