1 Corinthians 3

Pol ne Apolos Krais nukogoye una soka

Agana kambono, na ye boll moll kune, na kandja dje una God Murble moya moye una dje auno mal ge, na ye dje nawill, man. Ye Krais boll yake pla napi. Ye makimb nomane pai. Womba kembis mal embe moi. Alla, womba kandja pille ine mal ge na kandja embe dje ye awill. Na ye am awill, kwa dongall auno mal pai ba ye nane kune nayei. Alla ipon ye kwa dongall nane kune nayendo. Ye makimb nomane asa pai ge pa moro. Ye mor al ge, age ta ye molo age ta ke kane aundaka, ye kunda nonga embe yenj ge, ye makimb nomane paro, makimb una singare yenj mal ye embe yenj. Ge una ta kandja embe djindo, na Pol wombaye moro we djindaka, ta na Apolos wombaye moro we djindo ge, ye makimb una kandja djinj mal embe djinj. Apolos ge una ne mal? Alla Pol ge una ne mal? Ge man, no nukogo una mormoll. No soka kandja djipill al ye pillgi dji ba, Iwa Kerman no kogo awi mal yepill, kogo ta man. Na wo umbye yallka, Apolos wo nu boi ba, God yeika, wal bolo er pla pi. Embe mal ge, una wal umbye yaya una mo nu boya una ge, yenekne kandjine naparo. Ba God wal bolo er pla punda una moro ge, yene kandjiye taimane ge kerman paro. Una umbye yaya una ne, nu boya una ge, soka kogo taimane yenmell. Alla soka yenekne kogo yembell mal ge, God top aunda. No soka God kogo taimane yenmoll, ba ye mor ge, ye God numbiye ne, mauye mal embe mor. Nonekne maune man.

10 God na wandill golo awi al ge, na numb takdo una wopake mal moro. Na asamoll ku dongall bolo pill. Alla are una wo numb takbon dje yenj. Ba yenj ge kanpol tane mal paro. 11 Ku dongall iwo boll ge Jisas Krais mal embe boll. Una wo numb takne ba, ku gun ta iwo boye ge kune nayendo. 12 Una wo numb takne panda, gol iwo takne mo, silpa iwo takne mo, ku talang yendo ku iwo takne mo, iko iwo takne mo, angin iwo takne mo, kull iwo takne. 13 Takne ba are God kot ye aunda poke, una numb takne mal kane kune yembon. Kogo wopake yene mo ke mal yene, una porapora kogone ye wanne mal God kogone ge wamo gale kanda. 14 Gayaka, kogo ge do sege nayei dal, God una ge top aunda. 15 Ba alla kogo yene ge do sege yei dal, una kogo porapora yene kogo ge, er take dje punda. Una ge er take dje napine, God i yem worda, ba una wamo al moyeke i yem worne mal ga embe moye. 16 God yene numbiye yero ge ye mor. Alla God Murble ye boll moro. Ye nakaninj mo? 17 Una ta God yene numbiye to ke ye awi dal, God une to ke yenda. God numbiye ge yene wal kaima yero pille God une to ke yenda. Alla ye mor ge, ye God numbiye kaima mor.

Una kandjine amblo pla naworbon

18 Ni nenem kandja kende dje naimben. Ye moye al una ta makimb wal pille kane ye embe dje piya, na nomana kerman paro we dje embe pi dal, une nomane kerman napanda. Une nomane kerman ino dje piya ge une God boll nomane kerman panda. Makimb al une iwa dall mal embe moya. 19 Ge makimb una nomane kerman paro mal ge, God kando, wal dall mal embe paro dje kando. Baibel kandja embe djindo,

Una nomane kerman pandaka, tagemage yene ba tagemage yene al ge God to yem woro aunda we dji.

(Jop 5.13)

20 Baibel kandja ge alla djindo,

God kando, makimb una nomane kerman pandaka po kogo yene, ba kiwa yene, megye natonda we dji.

(Buk Song 94.11)

21 Baibel kandja embe dji pille, ye no kandjine amblo pla naworne! Wal porapora paro ge ye boll paro. 22 Ge Pol, Apolos, Pita, dumo makimb ne, ye gun mor mal ne, are goye ne, wal ipon paro ne, wal are panda ge, wal porapora ge ye boll moro. 23 Alla ye Krais boll mor, pi Krais ge God boll moro.

Copyright information for `GAM