1 Thessalonians 5

Iwa Kerman wonda dje amblokun yembon

Agana ambana kambono, wal embe pillau djinda ge olpa nale ne ege ge, pepa bolo ye ta dje aumbon naparo. Ye kaninj, Iwa Kerman egeye wonda ge, imina kunumb una waninj mal embe wonda. Una embe djine, ege wopake yeraka nono wo pille wopake molo molo yenmon we djine ba, wal ye ke ye aunda wal ola dje kaima pillau djinda. Ana womba kindja kupon dje ngembill gor mal embe ola dje wondaka seke pine kune nayenda. Ba agana ambana ye mor ge, ye emill yei al namor. Kunumb una wonjka ye wai kulo gok djinj mal embe, ege djinmon al ge ye embe nayene. Ye porapora armina au dji al waninj una mor. Nono imina ne, emill pai al wanpin una man. Embe pille, una ou par mal nono embe napambon, nalene to gun yendaka nomane au djinda mopon. Una ou par ge emill paro al par, alla nu no dall yenj ge para emill paro al yenj. Ba nono au djindo al wanmon una mormon pille, nomane au djindaka, nono pillgi djinmon ge ne, agane ambane kane wopake yenmon ge, i kon pakna dongall dal woro, God nono i yem worda dje kui yenmon ge, kon pula dongall dal kakbon. Ge God nono elle kumbso, tano dje nayei, man, nono Iwa Kerman Jisas krais kogo yei al ge, nono er take dje nambon, une nono i yem worno dje yei. 10 Une nono pille goi pille, nono gun mopon mo gopon ge, une boll aike molo pambon. 11 Embe pille, ye yenj mal embe ge, agane ambane kandja wopake dje awo nomane to gi dje aune.

Pol kandja dje ulle yeno dje embe dji

12 Agana ambana kambono, no ye embe dje aumon, una ye boll molo amblo pille dje awinj ge, ye nomane gi djinda dje, Iwa Kerman kandjiye al kantau yenj pille, ga kandja djine mal ye pille kalto moye. 13 Ga kogo yenj al ye pille pla ye kane wopake ye aune. Ye porapora kumbene taimane panda moye. 14 Agana ambana ye mor ge, una kiwa waka wane yenj ge ye ga wane djine dje man dje aune. Una kand gor ge, ye kandja wopake dje awo kand golo djine dje, dje aune. Una nomane al mo, gaklene al kogo yenj kere nadjindo una, ye amblo pille dje aune. Ye una porapora ye aune ge, ye kiye dje molo ye aune. 15 Una ta ye ke ye awi dal, ye ye yem woro naune. Ege ege ye yembe ye molo pillgi djinj una ye wopake ye awo, alla una porapora para ye wopake ye aune. 16 Ye ege ege wo pille, 17 kamang eri ye pa moye. 18 Wal porapora ta pillau dji dal, ye wopake we dje God aune. Ge ye Krais Jisas boll mor ge, embe yene dje God nomane embe paro. 19 God Murble ye boll wal ta yeno dje yei dal, ye man nadjine. 20 Una propet kandja djinj mal, ye kumbene ke yendaka mop awo djine. 21 Wal porapora omuk to kanne, wal wopake kani dal, amblo gi djine, 22 wal porapora ke mal pa dji dal ye pakna po nayene.

23 God arngan ye aundo una ye wordaka ye wopake ta mal moye me ge ye boll pandambe. Are nono Iwa Kerman Jisas Krais yem wonda poke ge, ye murble ne, nomane ne, gaklene paro ge une ye wopake ye aundaka ye wambo napanda moyembe. 24 God ye une wombaye moye dje pille yau to i ge, une djindo mal yendo una moro pille kaima yenda.

25 Agana ambana kambono, ye no pille kamang ye aune. 26 Nono pillgi pai una molo yenmon mal ye yenekne numbkane kaglo djembon tane. 27 Iwa Kerman kandjiye al na ye kandja embe dje aundo, pepa ge ye kere aune agane ambane kambono pora piye. 28 Nono Iwa Kerman Jisas Krais wandill golo aundo ge ye boll panda moye.

Copyright information for `GAM