1 Timothy 4

Una kandja kende beke awinjka una nomane to kull wordo

God Murble kandja dje pene woro embe djindo, ege are ta yendaka, una pende yenekne pillgi djine ge alla kere, gollkende kandja kende djineke una pille ine. Alla, gollkende ga kandja beke auneke una ge piye. Kandja kende beke awinj una ge yenekne embe nayenj. Ga omuk wopake to kanne ba nomane kull po kerdo. Ga iwana mor ge bolo naine we djinj. Kwa mokna pende moro ge ye mapill ye, nanane we djinj. Ba kwa mokna moro ge God ye nono awi. Nono pillgi dje molo kandja kaima paro ge pille kane yenmon una mormon ge nono wopake we dje awo, i nambon kune yendo. Wal porapora God beke yei ge wopake moro, wopake we dje awo imbon, man nadjimbon. Wopake moro me ge God dji wopake moro alla, nono wopake we dje awo nambon al ge God nale al wambo naparo.

Timoti Krais kogoye una wopake moya

Kandja ipon djill ge, ni agan aban kambono dje awin dal, ni Krais kogoye una wopake mopen. God kandjiye pillgi djinmon mal ne, kandja du dje pai ge ni karkar yen mal soka ge yembellka ni yake er pla ben. Kandjambe aulaul paro ne, kandjambe me napai djine ge ni pillgi nadjimben. God singare wopake kando mal ni yembe ye duwe yemben. Una yenekne gaklene yembe panda dje kogo yene ge wopake paro ba ge kembis paro. Ba God singare wopake kando mal nono yembe ye duwe yepin dal, ge wopake kaima panda. Singare embe yepin dal, nono makimb al wopake molo, are kupill al bon ge para wopake mopon.

Na kandja ipon dje awill ge kandja kaima dje aundo, una porapora pillpol tane paro. 10 Ge pille, God gun moro ge nono nomane aupin una mormon. Une ge una porapora i yem worno dje yendo una moro. Alla ga une boll pillgi djine una ge une kaima i yem worda una moye. Kandja ge nono una boll dje aumbon dje yembe yenmon. 11 Kandja paro ge ni dje una beke aumbenka karkar yene mal. 12 Ni iwa komdjill moren dje kaninj ba, ga ale ye kaninj, ni iwa kiwa namoren, man. Ni kandja wopake dje awo, kond wopake wane, una boll wopake kane, Jisas boll pillgi dje molo, God nale al kiwa wane mopenka, pillgi pai una kane karkar yene. 13 Na ola dje nawoll dal, ni embe yemben. Pillgi pai una moye al ni Baibel kere awo, God kandjiye dje orko woro, beke awo pa mopen. 14 Alla God wal i ni awi wal ge ni pillpol tamben. Ge pillgi pai una kerman kambono ni mon al aglene amblo God kandjiye dje ni awi ge ni nakerben, kogo ge ye pa mopen.

15 Na kandja ipon pepa boll mal ge ni nakerben, boll boll pille i pakna woro yemben. Yembenka, ni God pille kogo ye molo yake pla punden ge una porapora pille kane yene. 16 Ni singare ye wanmoren mal ne, God kandjiye dje una aunden mal ge ni pillpol tamben. Embe yen dal, God ni i yem worda alla una ni kandja dje aunden una pille mor ge God para aike i yem worda.

Copyright information for `GAM