a(Lo 25:4)

1 Timothy 5

Iwana moye ge Timoti yene epilye mal kanda

Iwoga kambono moye al ge ni kandja naumben. Ge na nena kambono mor dje pille kandja dje aumben. Alla iwa komdjill kambono moye ge na agana kambono mor dje kane embe ye aumben. Anagama kambono moye ge ni na mana mor dje kane embe yemben. Ambo kambono moye ge na ambana kambono mor dje kane embe ye awo, God nale al singare du dje yemben, wambo napanda.

Ana kangill kantau yembon mal

Ana kangill wandill mor ge, ye kantau wopake yene. Ba alla ana kangill wombane ta moye mo gawane ta moi dal, ni kandja dje aumbenka ga embe piye. Kambono lotu kogone kaima paro ge yenekne nane mane mor al kantau moye. Asa yenekne nane mane kantau molo kambono awi mal embe, ga pak to awo yem woro aune. Singare embe paro ge God wopake kando. Ana kangill wandill moi dal, une nomane God boll panda. Une imina armina God pak to aunda dje pille kamang yenda. Ba alla ana kangill wal ta i nano dje pille pla ye wando ge, une gun moro ba golo keri mal embe moro. Kandja embe djill paro ge ni una dje aumben. Una singare embe yei dal una kane djine naparo. Una ta yene neme kantau namoya, alla yene unakye moye ge para kantau namoi dal, une pillgi pai ge keri mal yendo. Una pillgi napai una mor al ge une singare ke ye er wekle pundo.

Ana kangill moye ge, kandjine pepa al kiwa nabopen. Man, ana singare embe yene. Wogane boll moi poke yenekne iwa taimane gamane moi. Alla ga kognumb 60 molo er pla pi ana moye. 10 Una kanne ga singare wopake ye wane, wombane kantau wopake ye molo, una numb al womaka kwa gale wopake ye awi. Pillgi pai una womaka kakene al nu was ye awo, una wandill moi mal ye wopake ye awo, singare wopake kayekaye pai ge, embe ye wani ana dje kanne.

11 Ana kulou kangill moye ge, ni ga kandjine pepa al nabopen. Ga iwa pille pla ye molo, Krais boll asa moi mal ge mop awo, er iwa bon dje pille kerman yene. 12 Embe yene al ge, wambo paro. Krais boll kandja taimane dje pagi ge alla kerne mal yenj. 13 Singare ta ye waninj ge embe, kollumb ke wane, numb pel dje, nuye i, una kandjine mopne amblo, kandja nadjine mal dje embe yenj. 14 Ge pille, na kandja embe dje aundo. Ana kulou kangill moye ge, er iwa po womba kulo, dumene kantau yene. Embe yeneke, kunda yem una dje ke yene kune nayenda. 15 Ba alla ana kulou kangill pende mor ge, yenekne pillgine kere er Satan boll pi pora dji.

16 Pillgi pai ana pende yenekne unakne moye al ana kangill ta moya ge, yenekne kantau moye. Embe yei dal, pillgi pai una djell moye ge imb nakakne. Ge ana kangill wandill kaima ta moi dal, ga kantau moye kune yenda.

Krais kogoye una kantau wopake yembon

17 Pillgi pai una kerman kogo wopake yenj una mor ge, ye pille pla ye awo, top tane. Alla, God kandjiye beke awo, kandja dje una awo yene una kerman ge, ye top wopake tane. 18 Ye top tane ge Baibel kandja embe bolo wori paro.

Kog kau wal wit tandwane i worbon dje kogo yenj al ge, megye pende i nambon dje yei dal, ye kog kau djillakene kau nakoye we dji. a 
Kandja ta bolo wori pai ge embe djindo.

Una kogo yenj una top paro mal ine we dji. b 
19 Una ta wo pillgi pai una kerman ta ale yei we dji dal, ni napupen. Ba una soka mo sokara wo kandja embe dji dal, ni kandja ge pupen. 20 Pillgi pai una kerman pende po singare ke yei dal, ni pillgi pai una porapora nalene al amblo du dje aumbenka una kanne. Embe yen dal, ga pillgi pai una kerman kambono mor ge para kand goye.

21 God ne, Krais Jisas ne, tau agelo kambono ga porapora nalene al na ni kandja dongall dje awo embe djindo. Na kandja manda djill mal ge ni una boll kandja yero paro mal djimben. Kandja taimane dje una porapora aumben. 22 Pillgi pai una kerman ge ni ola dje, dje kogo al naworben. Una singare ke yene, ni pakna po yenj mal nayemben. God nale al wambo pa djinda kiwa mopen. 23 Ni kumben al ke ege ege paro ge pille ni nu gun kune pende nanamben. Kune pende ni nu wain kembis ta nambenka, kumben wopake yenda. 24 Una pende singare ke yenj ge pene paro, God kot ye awo tonda mal paro. Ba una pende singare ke yenj ge seke paro, are pene wonda. 25 Embe mal ge, singare wopake paro ge pene paro, una kaninj. Singare pende wopake paro ge una nakaninj, ba seke panda naparo, pene wonda.

Copyright information for `GAM