2 Corinthians 1

Na Pol, God nomane pai mal pille na i djell worika na Krais Jisas Aposelye moro. Na ne, agane Timoti boll pepa bolo ye Korin pillgi pai una aunmoll. Alla propins Akaia pillgi pai una mor ge para aunmoll. God Nane ne, Iwa Kerman Jisas Krais nono wandill golo aupill mal ge ye boll pandaka, ye ellne tukne arngan yenda moye.

God amblo pille dje awi al Pol wopake we dje awi

Nono Iwa Kerman Jisas Krais Ne God moro ge yene kandjiye kerman panda be! Une nono Nane molo, nono wandill golo awo, nono nomane amblo u dje aundo ge God wal me moro. Imb porapora no kaknmon ge une amblo u dje aundo. Aundo pille, una imb ta kaki dal, God no amblo u dje awi al ge no kambono amblo u dje aumbon kune yendo. Krais imb kerman kaki al no boll wondo ba, Krais no amblo u dje aundo ge no boll puka tondaka tulu djindo. No imb kakpin ge, ye imb amblo u dje aumbon dje kakpin; ye God i yem djinda dje pille kakpin. God no imb amblo u dje awi ge, ye imb amblo u dje auno dje yei. God embe yei ge, no imb kakmon mal ye para aike kakinj ge, une amblo u dje aundaka ye kiye dje molo kake pine. No nomane kerman paro ge ye aglo gi dje moye dje paro. No kanmon, nono ngembill aike gormon. Alla, God no amblo u dje awi mal ge, ye para aike amblo u dje aundo.

Agana kambono, no propins Esia wane imb ta kakpin ge ye piye dje pille dje aunmon. Imb kerman kakpin ge kune nayei; no gopon paro dje kanpin. Imb kerman ke pai ge, no to golo pora djinda mal pai. Ba imb kerman woi ge no yembene al kakbon dje nawoi, man. God una gor i gun wordo iwa ge une yembe al kakbon dje pille woi. 10 Imbge no to goya mal pai, ba God no i yem wori. Alla are imb ta pa dji dal no i woro aunda. Une no i woro awo pa moya dje pille no nomane une boll awo kerpin. 11 Ye una merke no pille kamang ye auneke God no i woro aunda. Une wandill golo embe ye aundaka una merke kane wopake we dje God aune.

Pol yeno dje yei ge kere ta yei

12 No nomane al wal wopake kaima pirmon ge embe: no makimb una boll molo singare du dje pai mal ye wanpin, alla ye boll mopin ge no singare wopake ye er koi to pupin. Ge God no awi. No embe ye wane, makimb una nomane paro mal pille nawanpin, man. God no wandill golo awi mal pille singare ge ye wanpin dje kanmon. 13 Alla no pepa bolo ye mor al aupill ge kandja me pene pai, ye kere piye mal pai. Kandja me ta bopon dje nayepin. Na kando, kune ta no pepa bopin mal ye pille kune nayei ba alla, are ye no pille kune yene dje pro. Ye embe yene ge are Iwa Kerman Jisas Krais ege yenda poke, no ye pille wo pirmon mal embe, ye para no wo pille aune. 15 Ye na wopake pille aune mal pille, na ye kune soka kanno dje pille moll. Embe yeno ge God ye kune soka wopake ye aunda dje pill. Na asamoll wo ye kane pagle, er propins Masedonia po wane, er yem ye mor al wono dje pill. Embe yenaka ye na amblo pille dje auneke na er distrik Judia puno dje pill. 17 Na nomana embe pai ba alla na ye kune soka nakanill al na kandja aulaul djindo dje ye pir mo? Makimb una kandja kende kaima dje yenj mal na embe djindo dje ye pir mo? Ge man. 18 God yene kandja porapora djindo ge yene kaima yendo mal embe, no kandja dje ye aunmon ge kapla we djinmon, man we dje naumon, man. 19 God wariye Jisas Krais moro ge, Sailas ne Timoti ne, no une kandjiye dje ye aupin ge, Krais pora we dje, man we dje nayendo, man. Ege ege une pora we djindo. 20 God kandja embe yeno we dje kune merke dji al ge, Krais pora we dji. Pora we dji pille, nono Krais kandjiye al God kandjiye amblo pla woro, God embe panda we dji ge panda be! djinmon. 21 Alla ye no boll Krais kandjiye al aglo gi djinmon ge, God yendo. Une nono dje i, 22 yene unakye mopon dje pille su ta ye awi. God nono wal porapora are aunda mal ge asamoll tuge yem awi. Ge yene Murble awi. Are une nono boll auno dje Murble awi.

Pol dumo Korin er napi

23 Na God kandjiye al kandja kaima djindo, na er yem Korin napill ge ye pille urup dje djine dje er yem napill. 24 No kandja embe djinmon ge ye pillgi paro ge iwa pla ye kantau yembon dje nayenmon, man. Ye pillgi djinj al aglo gi dje moi pora dji. No kogo yenmon ge ye wo piye dje yenmon.

Copyright information for `GAM