2 Corinthians 2

Na nomana embe pai. Na er yem ye mor al woll dal, ye asa urup pi mal ge alla piye paro. Ge pille na nawoll. Alla na wonaka ye urup dje pi dal, una ne mal yendaka na ellna tukna arngan yenda? Na ye urup awill una mor ge ye na ellna tukna arngan ye aune kune yendo. Ye yeneke na wopake piyo una mor. Ge pille na asa pepa bolo ye awill ge, na ye mor al wo urup i djino dje pepa boll. Na embe dje kando, na nomana wopake inaka ye para nomane wopake i moye. Na ye pepa bolo awill ge, na nomana to, kimb merke ye molo boll. Na ye urup auno dje namboll, man, na ye wopake kaima kando mal ge ye piye dje pille pepa boll.

Iwa ta ale yei ge Korin una kere aune

Na kandja dongall djino dje nayendo, iwa ge imb awi ba une na pille imb nawi, une ye porapora pille awi. Ba iwa ge alla ye djinda dje pille, ye una pende merke man dje urup awi ge pora awi, alla naune. Embe pille, ipon iwa ale yei ge ye kere awo, amblo u dje aune. Une urup kerman kake, pillgi pai ge kere djinda. Embe pille, ye une wopake kane pa moye. Na pepa asa boll ge na ye su mal ye awill. Kandja porapora djino al ge ye karkar yene mo man dje pille pepa boll. 10 Ye une djingjang kere awi dal, na para kere auno. Une ale panda na kere auno ge, na ye pille Krais nale al kere auno. 11 Kere auno ge Satan nono kamalne to djinda dje na kere auno. Une nomane pai yendo mal nono pille kane yenmon.

Pol Taitus kanno dje pi

12 Na dumo Troas wo Krais kandjiyembe wopake dje una auno dje yellka, Iwa Kerman na kond yapro kogo ge yemben we dji. 13 Ba na agana Taitus kane naill, na nomana to moll. Ge pille, na Troas una dje kune ye awo er propins Masedonia pill.

God yembe al pillgi pai una Satan kamblo kal woro keri

14 Krais Satan to kal woro keri pille, une King molo er welke pundaka nono are po yau to, kondjpol to yenmon mal ge na wopake we dje God aundo. Une ye worika nono mirang wopake yendo mal embe mormonka, una God pille kane yenj ge wai dje er pundo. 15 Krais mirang wopake yendo mal embe mormonka Krais no i God opa mal aundo. No mirang wopake mormon ge God i yem djindo una pirka wamo al pine una para pir. 16 Wal mirang wopake yendo ge, er wamo al po mor una ge embe dje kaninj, una goi killam ke paro dje kaninj. Ba alla kam al pinj una mor ge embe dje kaninj, ge mirang wopake yendaka no wo er gun bon dje kaninj. Alla no yembene al yembon kune yendo mo? Ge man. 17 Una merke ku imbon dje pille God kandjiye dje waninj. Ba no embe nayenmon. No Krais boll mormon ge God dje wori una mormon, God nale al kandja du eri dje una aunmon.

Copyright information for `GAM