2 Corinthians 4

Aposel sin galla mal mor

God no wandill golo awi al God kandjiye dje una aunmon. Embe pille no yembene nakosdo, kogo ye pa mormon. Una seke molo ngandjill singare yenj mal no mop awo kerpin. Kandja kende nadje, God kandjiye al kandja gun ta pakna nawormon, man. No God nale al kandja kaima dje pene wormonka, una porapora omuk to kanne. Ba na no Jisas kandjiyembe wopake tonmon mal pille naine ge, dumo ke pine una mor. Satan makimb una god kende moro iwa ge, una pillgi nadjinj una nomane al to pel dji, piye naparo. Krais God moro mal embe molo kandjiyembe wopake sua gale kandjiye kerman awi ge pille ine napai.

Embe pille no kandja dje una boll aunmon ge nonekne kandjine dje naumon, man. No Jisas Krais ge nono Iwa Kerman moro we djimon. No Jisas pille ye nune kogone yenmon we djimon. Djinmon ge, God asa embe dji, emill pakna do au djinda be dji. Dji una ge, une no nomane amblo au dje awika, no God kandjiye kerman paraka, talang yendo mal ge no Krais gume djillake al kane kune yenmon.

Kog mogoi kerman galla nume worbon ba kune nayendo; galla nume kosill paro. Kosill paro mal embe no aposel ge embe mormon; God kandjiye wopake uro kaima no boll paro ba no gaklene kosill paro. Kosill paro al ge una kanne, yembe kerman no boll paro ge no yembene man, ge God yembe paro we dje kanne. Imbmerke mopine gone al pora wondo ba no aglo gi dje mormon. Nomane merke pai ba nakerpin. No Jisas wombaye mopin pille toi ba God no kere nawi. Una no to kal wori ba pora nadjipin. 10 Ege ege imb kakmon al ge Jisas goi me ge no gaklene al i wanmormon. Embe yenmon ge Jisas gun no gaklene al moro ge una kanne paro. 11 No gun mormon una Jisas kogoye yenmon al ge una to gopon dje eri yenj. Yenj al ge Jisas no makimb gaklene boll gun moro ge, una kanne paro. 12 Embe pille, una gor mal ge no aposel boll kogo yendo ba, God ye boll kogo yendo ge, ye gun molo par.

13 Baibel bolo wori pai ge embe djindo,

Na pillgi djill pille, na kandja dje pene worill we dji.
Bolo pagi mal embe, no nomane al pillgi paraka no una boll kandja dje pene wormon.
14 Ge no kanmon, God Iwa Kerman Jisas golo pai i pla wori iwa ge, une no Jisas boll aike i pla woro, no ye boll Jisas moi al worda mopon. 15 No imb porapora kakpin ge ye amblo pille djimbon dje kakpin. God wandill golo awi ge una merke ege ege inj. Inj al ge wopake we dje awo, God kandjiye amblo pla worne.

Aposel kambono pillgi dje molo aglo gi dji

16 Embe inj pille, no kogo ye pa mormon; yembene nakosdo. No gaklene goi mal yendo, ba nomane pakna God ege ege i gun woro aundo. 17 Ge no imb kaknmon ge, kembis paro, kanan napanda. Ba kaknmon al ge no kupill al po ege ege wopake ta mal molo pambon. 18 Embe pai pille, wal kanmon wal ge, nono nomane al imbon dje napirmon, man. Wal nakanmon wal ge nono nomane al imbon dje pirmon. Ge wal kanmon wal ge ege tuge ta kanmon ba alla wal nakanmon wal ge ege ege molo punda.

Copyright information for `GAM