2 Corinthians 9

Korin una wal makai to God unakye amblo pille dje aune

Nono God unakye Jerusalem mor al wal aumbon dje yenmon ge, ye pille kane yenj. Embe pille, na pepa momo bolo ye nauno. Ye una amblo pille dje pille pla yenj mal ge na kane, una Masedonia moi al ye kandjine amblo pla worill. Na embe djill, dumo Korin
Kandja Grik ge Korin we nadjindo. Dumo Akaia we djindo. Propins Akaia yei ge Korin pakna yei.
pillgi pai una wal aumbon dje pille pla yenj. Kog numb asa ga nomane embe pai ge ipon pa moro we djill. Ye wal amblo pille dje yenj mal ge, Masedonia una merke mor ge para wal aumbon dje yenj.
Na ye kandjine amblo pla worill mal ge kandja kiwa po djinda dje pille, nono agane mor ge ye mor al dje wordo. Ku makai to yei we djill mal ge, ga wo kanne. Wal amblokun yei we djill ba alla ye wal amblokun nayeneke, dumo Masedonia una na boll aike wo kanpin dal, no ngadill gopon alla ye para ngadill goye. Ge pille, nono agane kambono ye mor al asamoll dje worno dje pro. Ye wal aumbon we dji mal ge, nono agane kambono wo ye boll wal amblokun ye worne merke moya. Ye embe yei dal una embe dje kanne, ga wal ke pille nawi, wopake pille awi dje kanne.

Ye pille kane yenj. Ye kwa yepall yai dal, ye kwa yepall wallkne. Alla ye kwa merke yai dal, ye kwa merke wallkne. Una wopake pille wal awi dal, God wopake kanda. Ge pille una wal aumbon dje yene ge yenekne nomane paro mal wal aune. Una elnge ye worneke kumbene ke boll wal aune ge man. Alla God ye kollkamang kerman ye aunda kune yendo. Wal merke pandaka, ye kune moye. Ege ege kogo porapora yene al ge wal merke plato pandaka, kogo wopake yene. Ge pille Baibel bolo wori pai ge embe djindo.

Una po una wal kane nanoi una moi al kollkamang ye awi
Ga singare du dje paro mal ge, God ege ege pille pa moya pora nadjinda we dji. (Song 112:9)
10 Alla una kwa umbye ipo yar mal ge God i aundaka yar, kwa i aundaka nonj ge, une para ye kwa umbye merke aundaka ye ipo yale pagle, singare du dje yene mal ge bolo er pla wonda.

11 God kondwe kayekaye yero al ge ye wopake ye aunda. Wal merke pandaka ye una merke aune kune yenda. Alla ye wal aumbon dje yenj ge, no ipo Jerusalem una aumbon al ge, una merke wopake we dje God aune. 12 Ge pille ye God unakye mor al wal aune ge, wal soka mal paro. Ta ga wal moya nane. Alla ta, ga wo pille God wopake we dje aune. 13 Ye una wal aune ge ye singare wopake yenj ge pene wonda una kanne. Ye kollkamang ye kambono awo, una porapora awo yenj mal ge, Jerusalem una kanne. Krais kandjiyembe wopake paro ge no ipin mormon we djinj mal ge ye kandja kaima dje, karkar wopake yenj dje kanne. Embe yene al ge God kandjiye kerman panda. 14 Alla God ye kollkamang kerman ye awi ge, ga kane pagle, kamang ye God aune kune, ye wopake uro kaima pille awo kamang ye God aune. 15 God nono kollkamang kerman plato ye awi mal ge, nono wopake we dje une aunmon.

Copyright information for `GAM