2 Thessalonians 2

God lo to worda iwa wonda

Agana ambana kambono, nono Iwa Kerman Jisas Krais er yem wo nono i makai to yene boll mopon kandja embe pai ge, no ye gok dje nomane soka pa djinda dje kandja ye dje aunmon. Una ta kandja propet djine mo, kandja ta dje worne mo, pepa ta bolo Iwa Kerman yem wonda ege, ge woi pora djindo we dje no kandja embe dje bopin we djine ge ye napiye. Una wo kandja kende embe dji dal, ye kaima kaima napiye. Ege wonda ge are wonda, asamoll, una merkeke God pille mop auneke, iwa ta God kandjiye lo to worda iwa ge wonda. Iwa ge Iwa Kerman i dumo ke worda moya iwa. God moro we djine ge une man we dje awo, wal lotu ye pille pla yenj wal ge une man dje awo, yene kandjiye i pla woro, God lotu numbiye kerman al numog po ami dje molo, na nanam God moro we djinda.

Asa na ye boll molo kandja ge dje awo kerill ba ye napi paro. Ipon iwa ge er pene wonda ba wal kondwe pel dje paro ge, ye kaninj. Are une egeye yenda kune wonda. Alla ipon kandja lo to worda una ge kogo gulo seke ye moro. Une embe ye pa pundaka, kond tugo pel dje moro una ge tugo worda pa pundaka are God i worda poke, iwa kandja lo to worda una ge er wo pene punda. Ba Iwa kerman Jisas er yem wondaka yene talang kerman ta mal ge yembe yendaka iwa ge to derpall yenda, Jisas djillake mulnge al dje wordaka, iwa ge goya. Una kandja lo to worda una wonda ge Satan yembe bolo aundaka, kende kulo djep kayekaye ye, kogo dongall ye embe yenda. 10 Une singare kerawa ye woro, kandja kende dje aundaka, una golo take dje pine una ge piye. God na ye i yem worno we dje kandja kaima dji ge ga djembon to naune, kane wopake nayene. 11 Embe pille ga nomane God to kull wordaka, kandja kende pai ge pillgi djine. 12 God embe yenda ge, una kandja kaima pai ge pillgi nadjine. Singare ke paro ge wopake pille yene ge, God kot ye awo tonda.

God ye i yem worno dje kamasa dje i

13 Ba ye agana ambana kambono, Iwa Kerman ye kane wopake kani una ye mor ge, kupill makimb beke yei kune ge, God ye dje i. God Murble ye aundaka ye are kond du dje wane, kandja kaima panda ge ye pillgi djine dje pille, i yem wori. Ge pille, no ege ege ye pille God wopake we dje aumbon paro. 14 Nono Iwa Kerman Jisas Krais yembe kerman pandaka, kandjiye kerman pandaka, yenda mal, ye para aike panda dje pille, no ye God kandjiyembe wopake dje aupin al ge, une ye yau to, i. 15 Embe pille, agana ambana kambono, no God kandjiye porapora dje aupin ge, no djillakene al djipin mo pepa bolo ye aupin ge, ye pillgi dje, aglo gi dje molo pa pine.

16 Alla nono Iwa Kerman Jisas Krais ne, God nono Nane, yene nono kane wopake kane, wandill golo awika, nono ege ege aglo gi dje, gun molo pambon dje kui yenmon ge, 17 soka ye worbellka, ye ellne tukne arngan yendaka, ye nomane dongall pandaka, ye embe molo singare wopake ye, kandja wopake dje wane molme.

Copyright information for `GAM