2 Timothy 2

Timoti Jisas Krais ami una wopake moya

Na warna mal moren ge, ege ege ni Jisas Krais wandill golo awi ge, ni ye dongall ye aunda mopen. Na kandja porapora una merke nalene al dje awill ge, ni dje una God kandjiye amblo gi dje mor una aumben. Ga ge para una beke auneke piye.

No imb kakmon mal ge ni Krais Jisas ami una wopake molo imb para kakben. Ami una yenj mal ni kanden. Ga kogo yenj ge kogo ta aike nayenj, man. Kogo wopake yeneke ami kantau yendo una kane wopake kanda dje yenj. Yenj mal embe, una er wekle po top imbon dje muk djinj ge, kondwe paro mal pille muk djinj. Man panda, top panda mal naine. Alla una ta yembe ye, mau to kwa mokna yaya boi dal, une asamoll wallke nonda kune yendo, una ta man. Na kandja ipon djill ge ni wopake pille mopen, Iwa Kerman ni nomanin amblo au dje aundaka ni wal ge pille kune yemben.

Ni ege ege Jisas Krais we dje pupen, une golo aglo er wo gun pi. Une ge King Depit epilye moi. Ge Jisas kandjiyembe wopake paro mal na dje una aundo. Na kandja embe dje aundo pille, una na geke bolo wanden dje kane, ye ke ye awo, to kaye worinj. Ba God kandjiye ge kaye pa namoya. 10 Embe pille, na imb porapora kakdo ge God dje i una pille kakdo. Na ga Krais Jisas i yem woro, une boll wopake ege ege molo pane dje yendo. 11 Kandja kaima ta paro ge embe:

Nono une boll gopin dal, nono une boll aike gun molo pambon.
12 Nono imb kake molo i pupin dal, are Jisas boll aike king mopon.
Nono une mop aupin dal, une para nono mop aunda.
13 Nono Jisas boll pillgi djimbon we djinmon ba nono djinmon mal nayepin dal, une yene kandja dje wori paro mal ge kaima yenda, kandja kende nadjinda.

Timoti God kogoye una kaima moya

14 Na kandja ipon djill ge, ni una nomane to mage aumben. Ni God nale al kandja dongall dje aumbenka ga kandja megye kerker paro mal pille nonga nadjine. Ta dji dal, kokas kulo yene, una nomane to ke yenda. 15 Ni kogo yenden ge, God kane wopake yenda dje pille kogo dongall yemben, ngandjill nagopen, God kandjiye kaima dje kune ye una aumben. 16 God wopake nakando kandja djine ge, ni pakna namben, mop awo kerben. Kandja embe paro ge una ngundjo ipo kondwe ke wordaka, po ga God boll mop aune. 17 Kandja embe beke awinj ge killngambo buro killang ke yendo mal embe, po una ye ke ye aundo. Una kandja embe djinj ge iwa soka Imeneus ne, Piletus mormell. 18 Soka kandja kaima pai ge kere er po kandja embe djinmell. Una goi alla aglo er wo gun pi pora dji, una alla nagye we djinmell. Kandja embe djinmell ge una pende pillgine to ke ye aunmell.

19 Kandja embe djinmell ba, God numb taki ge numb tuminj dongall boll taki. Tuminj ge kandja embe dje bolo wori pai, Iwa Kerman yene unakye mor mal ge une kane pora dje kerdo we dji. Kandja ta bolo wori pai ge embe dji, una Iwa Kerman kandjiye piye una mor ge, singare ke panda al ge, mop aune we dji.

20 Nub kerman ta yendaka, numogto yero al ge dis kopa pende moro. Ta gol silpa pall beki. Ta iko pall beke, ta makimb nganba i beke ye wori moi. Dis pende moro ge una i kogo wopake mal yene, alla pende ge una i kogo kiwa mal yene. 21 Embe mal ge una ta singare ke keri dal, une gol dis yero mal moya. Une God wombaye molo, Iwa Kerman kogo porapora aunda ge une ye kune yenda.

22 War ambo bombon gor mal ge, ni mop aumben. Ni singare du dje, pillgi dje, una kane wopake ye, ellin tukin arngan yenda mopen. Una kumbene kuruwo yendaka Iwa Kerman pak tonda dje yau tane una moye ge, ni ga boll arngan ye wane mopen. 23 Una wal pillpol nato, kandja napai mal djinj ge, ga una boll nonga djinj. Alla ni kanden, una embe yenj ge una boll nonga eri djinj. Ni molo ellke worben. 24 Iwa Kerman kogoye una moya ge, une una boll elle kumbso nonga nadjinda. Singare wopake ye una porapora awo, God kandjiye dje una beke awo, ke pille pa namoya. 25 Une kandja dje aundaka una to wori dal, une kiye dje molo una nomane amblo du dje aunda. Ge God kond aundaka ga nomane ake to kandja kaima ge alla kanne manda? 26 Ta kani dal, Satan kuwo koi to pa kandja dji mal pille karkar yei ge, alla pille kune ye, kere er orko wo kiwa moye.

Copyright information for `GAM