2 Timothy 3

Ege pora djino dje yendaka una singare ke yene

Pren mo? Ege pora djino dje yendaka, imb kerman wonda. Una yenekne kane wopake ye, ku nomane kerman pandaka, yenekne kandjine amblo pla woro, penang ye, kandja ke dje una awo, nane mane kandja djine ge to worne. Una ye wopake ye aune ba ga wopake we dje nawo, God mop aune. Una ta boll wandill nagoye, ke piye mo nonga djine ge pille pa moye, nakerne. Una kandjine amblo, yenekne pillpol natane, aulaul ye, wandill nagolo, una ngembill aumbon dje ye iyasmas ye, singare wopake ge kane ke yene. Yene ye noi una ye ke ye naune ba alla ye ke ye awo, gokgak dje, na una kerman moro dje pille pla ye, wal wopake pir wal ge eri yembon dje piye ba, God kane wopake nayene. Kandja mambine ge ga gaklene be mal embe panda ba, God yembe dongall paro ge mop aune. Una embe yene ge, ni ga boll aike namopen.

Ga mor ge pende kandja kende dje molo, er una numbine al po, ana nomane gi nadji mor al kamalne to no nomane paro mal yene dje yenj. Ana ge ale merke yepin dje pille imb kakinj. Wal merke yembon dje pir ge ye molo ga ipo kondwe kayekaye worinj. Ege ege ana kambono ge, kandja beke aune pupon dje pille mor, ba una kandja kaima dje awinj pir ge kane nainj. Asa Mosis kandja dji mal iwa Janes ne Jambres po man dje aupill. Man dje aupill mal embe, ga kandja kende dje awinj una ge kandja kaima paro ge man dje awinj. Ga nomane ne, pillgine ge kull pundo. Ga kandja djinj ge wo kerman napunda, man. Asa iwa Janes ne, Jambres kandja djipillka una ga soka dall kandja djinmell we dje kani. Kani mal embe, una embe dje kanne, ga kandja kende dje waninj una ge, dall kandja djinj dje kanne.

Timoti ni God kandjiye amblo gi djimben

10 Embe yenj ba, na ye wando mal ni pille kane yenden. Na God kandjiye beke aundo mal ne, na nomana paro mal ne, na pillgi djindo mal ne, na imb kake ke napro mal ne, na una kane wopake ye aundo mal ne, imb kake aglo gi dje moro mal, 11 dumo Antiok ne Aikoniam ne, Listra wollka una na ye ke ye aumaka ngob goll mal ge, ni kanin. Imb merke pai ge, Iwa Kerman na i woro awi. 12 Na kandja kaima dje ni aundo. Una porapora Krais Jisas boll aike wane, God singare paro mal yembon dje yenj una ge, una wo ye ke ye aune we djindo. 13 Una singare ke yenj una ne, kandja kende djinj una kandja kende dje una aune. Auneke, kandja kende ge wo er ke kaima punda. Ga kandja kende dje awinjka una kandja kaima paro dje pille kandja kende dje yem worinjka ga kandja kaima paro dje pirka embe ye wo ke po kerinj.

14 Ba ni moren ge, ni no kanden. No kandja beke aupin, ni pillgi dongall djin kandja ge ni amblo gi dje mopen. 15 Asa, ni womba kembis molo won ge, ni God kandja bolo wori pai al ge molo won. Kandja ge ye molo ni nomanin wopake aundaka, ni Jisas Krais boll pillgi djimbenka God ni i yem worda kandja ge ni kere pupen. 16 Kandja porapora Baibel al pai ge God Murble djika pai. Kandja pai ge nono kandja kaima dje beke awo, nono singare ke yepin ge ombine dje awo, ale ye djine dje, God nale al du dje mopon kandja ge nono beke aundo. 17 God wombaye mormon ge, nono kandja embe pupin dal, God ye wordaka nono yene kogoye ye kune ye molo, kogo wopake kayekaye yembon kune yenda.

Copyright information for `GAM