Acts 1

Jisas embe dji, na God Murble dje wornaka, ye moye al wonda we dji.

Iwa Teopilus, na ni wopake we dje aundo. Na buk asamoll boll ge, Jisas kogo porapora asa ye wani mal ne, une kandja beke dje una awo ye wani mal ne, une kogo kindja ye pika, are God i pla woro yei mal ge, na kandja ge porapora pepa al boll. God Murble dje wori, wo Jisas moi al kandja dje awika, yene aposelye kambono Jisas dje i ge, une kandja dongall dje awo embe dji, na kogena paro mal ge ye po yeme! dji. Kandja embe dje kerika God dje i er pla kupill al pi. Asa una Jisas ye ke ye aumaka, une imb kerman kake pika, una nil to paglmaka, une golo agle er wo gun pi. Po molo une makimb al ege 4-pela ten (40) wane molo, God yene unakye kantau yendo mal ge une dje una awo, kogo dongall ye wanika, yene aposelye kambono kane, Jisas kaima nagoi, gun moro dje kani. Alla, Jisas yene aposelye kambono boll kwa no molmaka, une embe dji, asa na ye moi al kandja embe djill, na Nena yene Murble dje wordaka ye mor al wonda we djill ge, kaima wonda, ye Jerusalem kere er napine. Ye kui ye molme! dji. Ege yepall ta wo er pundaka, Jon una nu pagle awi mal embe God yene Murble i ye boll pagle aunda we dji.

Are, Jisas aposelye kambono boll makai to molmaka, ga Jisas moi al embe dji, Iwa Kerman, ege ipon yero ge, una Israel una kantau ye mor ge, ni to worbenka Israel una yenekne kantau yene mo? dji. Djimaka Jisas embe dji, wal ipon ta yenda mo are yenda ge, na nena nomane paro mal pille yenda. Ye kogone ta man. Ba alla God Murble dje worda wo ye moye al moyaka, ye yembene dongall pandaka, na ye boll ye wanill mal dje una aune. Asamoll ye Jerusalem una mor al dje awo, are distrik Judia ne, Samaria po una mor al dje awo, alla are ye dumo makimb ulle yom yom po kandja ge djime! dji.

Jisas er kupill al pi

(Mak 16.19-20 ne, Luk 24.50-53)

Jisas kandja embe dje kerika, aposelye kambono kane molmaka, God Jisas dje i er pla kupill al pika, kam kupa ta wo une pi al to pel djika, aposelye kambono alla une nakani. 10 Kambono kane pla woro molmaka, iwa soka konkunom kuruwo worpill una soka wo molo 11 kandja embe djipill, ye dumo Galili una mor ge, namba yei pille aglo molo kane pla kupill al woro mor ne? Ipon God Jisas dje i er pla kupill al pi ye kaninj mal ge, are Jisas embe yem wonda we djipill.

Iwa Matias aposel kambono dje i pakna wori

12 Iwa soka kandja embe djipillka, aposel kambono kamkimb Olip we dji yei al kere, er yem Jerusalem pi. Kamkimb Olip ne, Jerusalem ge nu tupa taimane kona kwa embe yepill. 13 Kambono Jerusalem er pakna po rum plato pa pa yei al ge pi. Ga kambono moi ge embe mal moi. Pita, Jon, Jems, Endru, Pilip, Tomas, Bartolomyu, Matyu, Alpias warye Jems ne, Saimon epil Selot moi iwa ge ne, Jems warye Judas ge moi. 14 Ege ege kambono yemaka, ana pende yemaka, Jisas me Maria yeika, alla Jisas age kambono ge yemaka, kambono porapora ge nomane taimane paika, makai to molo, kamang ye embe ye moi.

15 Kune ge Jisas pillgi dji una moi ge, wan andret twenti (120) mal moi. 16 Embe molmaka, Pita aglo molo embe dji, agana kabono, iwa Judas kaima po una dje iwo Jisas kaye toi al ge, Baibel kandja bolo wori pai ge God dji mal kaima pai kanpin. Kamasa God yene Murble dje wori, wo Depit moi al djika Depit pille Baibel al pepa bolo pagi mal ge, megye toi. 17 Nono una 12-pela mopin al ge Judas aike mopin. Jisas nono kogo yembon dje pille dji mal ge, une Judas ge aike yenda dje pille dji.

18 Ba alla iwa Judas ge une ke yei al ge, una ku iwo une top toi mal ge, une ipo makimb ta top to i, makimb al ge, une po kulngab yage makimb al toika, yene kumbe al billa djika, yene elle ge porapora, tulup to er orko wo makimb al moi. 19 Iwa Judas embe yei ge, Jerusalem una porapora ge pille, Judas makimb top to i al ge, una kandjiye gun ta yei; dumo Akeldama we dji. Kandjiye ge Jerusalem una kandjine dji al ge meyam dumo yero we dji.

20 Buk Song Baibel al paro ge kandja embe dje bolo wori pai. Yene numbye gullye ge wapra yendaka, una ta namoye. Une kogoye ge una djell ta wo i kogoye yenda we dji.

21 Baibel kandja embe dje bolo pagi pille, nono Iwa Kerman Jisas boll aike wanpin una mormon ge, iwa taimanta dje i nono una 11-pela mormon al pakna worbon. Asa Jon Jisas nu pagle awi ege ge ye pa pika, are God Jisas dje i er pla kupill al pi ge, iwa ta nono dje imbon iwa ge, une wal porapora yei kani mal embe dje imbon. No una 11-pela mormon al ge une wo nono boll aike moyaka, Jisas golo agle er wo gun pi mal, no kandja djimbon mal ge, iwa ge para wo no boll molo kandja djinda we dji.

23 Pita kandja embe djika, iwa soka mopill ge una djimaka soka agle mopill. Ta Josep kandjiye ta Barsabas, kandjiye ta Jastus we dji. Alla, iwa ta une agi ge kandjiye Matias we dji. 24 Iwa soka ge mopillka, kambono kamang ye awo embe dji, Iwa Kerman, una porapora nomane paro mal ge ni kane kerden. Judas kogo yenda mal kere er po dumo moya al ge une moi pora dji, ni djimbenka no kanbon, iwa soka mormell ge ta wo aposel mal embe molo, Judas kogo yei mal ge wo yenda we dji. 26 Kambono kandja embe dje kere, ku ta i tukye gakle mal embe ye wormaka, yage toi ge iwa Matias dji mal ge pai. Paika, kambono une dje i pakna wormaka, aposel 11-pela moi al ge une para pakna moi.

Copyright information for `GAM