Acts 10

Tau agelo ta wo iwa Kornilius boll kandja dje awi

Dumo Sisaria ge iwa ta moi. Yene kandjiye ge Kornilius we dji. Une ge ami iwa kerman moi. Une ami una wan andret (100) kantau yei. Une amiye epil pakna moi ge kandjine ami Itali we dji. Une ge God pille lotu ye kune ye awika, une game wombaye boll aike molo God pille pla yei. Juda una wal kane nanoi una moi ge une wal merke i awo, kamang eri ye awo embe ye moi. Kune ge 3 oklok mal embe armina yeika, Kornilius ge nale al wal ta kani. Kani al ge God dje wori tau agelo ta woika Kornilius kane kune yei. Yeika tau agelo embe dji, Kornilius! dji. Djika Kornilius kane kand kerman golo embe dji, Iwa Kerman, me namba mal pai pille ni wonden ne? dji. Tau agelo embe dji, ni kamang ye awo, una wal kane nanonj una wal iwo awo yenden ge God kane wopake kani we dji. Ni kandja sigye dje worbenka una dumo Jopa po iwa Saimon kandjiye ta Pita we dji ge dje iwnebe! dji. Pita ge une kog kau gakle kogo yendo iwa Saimon numbye al moro. Nub ge nu solwara djeke yero. Tau agelo kandja embe dje kere er pika, Kornilius djika yene boiye iwa soka wopillka, ami iwa taimanta moi ge une para aike woi. Une God pille pla ye kune ye molo, Kornilius boll aike molo molo yei iwa. Kandja porapora tau agelo wo dji mal ge une kambono moi al dje awi. Dje awo une dje worika, ga iwa sokara dumo Jopa bon dje po molo kondwe tambye pai.

Pita nale al kani

Pa er po molmaka, armina 12 oklok mal embe yeika, er dumo Jopa manda woi. Kune ge, Pita kamang yeno dje pille er numb be po moika 10 koll toi, kwa gapon dje yemaka, Pita nale al kani. 11 Kupill al au djika wal besit kerman mal embe yei ge, ulle 4-pela yei al una amblo kal makimb al worbon dje yei. 12 Besit pakna yei al ge kog kena, med dowa, ka sibill ne, nomaga moi. 13 Molmaka iwa numbke ta Pita moi al kandja dje embe dji, Pita! Ni aglo po wal moro ge to namben! we dji. 14 Dji ba Pita embe dji, Iwa Kerman, man we! Na asa moll ipon moro ge, wal mapill djin wal moro ge na kaima nanondo we dji. 15 Iwa numbke kandja embe dji ge kandja alla dje awo embe dji, God nonj wal wopake moro we djinda ge, ni kane wal ke moro we nadjimben we dji. 16 Une nale al asamoll kani ge are kune soka kani. Ye kerika, besit kerman ge ola dje i pla kupill al wori.

17 Pita wal kani me ge namba mal paro ne? dje pille pa moika, iwa sokara iwa Kornilius dje wori woi una wo una boll dje pi. Dje pille po Saimon numb gull pai al wo pillau dji. 18 Ga yau to embe dji, iwa Saimon kandjiye ta Pita we djinj ge une ba moro mo? dji.

19 Djimaka Pita nale al kani wal ge, me namba mal paro ne dje pille pa moika, God Murble ge wo embe dji, Saimon! Iwa sokara ni pille dulo woj. 20 Ni aglo molo er kal po kambono boll aike pume! Ni nomanin to napupen; na dje worill woi we dji. 21 Djika Pita er kal po una woi al ge embe dji, ye iwa ta dulo wonj ge na wale moro. Ye me namba mal pai pille wonj ne? dji.

22 Kambono embe dji, iwa ta Kornilius we dji ge une ami iwa kerman du dje moi. Une ami una wan andret (100) kantau ye molo, God kandjiye amblo pla woro embe yendo. Alla Juda una porapora nomane awo wopake pille une awinj. God yene tau agelo wopake ta moi ge dje wori une Kornilius moi al wo embe dji, iwa Pita we djinj ge ni dje aumbenka une ni nenem numbin al wo kandja djinda pupen we dji. 23 Kandja embe djimaka Pita kambono dje i numog woro, kwa gale awika kambono no pai.

Tagika Pita kambono boll aike er pi. Jisas kogoye una pende dumo Jopa moi ge aike er pi.

Pita er iwa Kornilius numbye al pi

24 Kambono po kondwe tambye pamaka, tagika, er dumo Sisaria po pillau dji. Iwa Kornilius Pita wonda dje pille djika, numb taimane una ne, yene ye noi una wo makai to moi. 25 Molmaka Pita wo er numog pika, Kornilius wo yene kake gopye boglo Pita kandjiye amblo pla wori. 26 Ba Pita agle woro Kornilius i pla woro, ni agle! dji. Na God namoro, na una kiwa moro we dji.

27 Pita kandja embe djika, soka kandja dje molo po er numog pupillka, Pita kani una merke makai to moi. 28 Pita embe dji, ye epill djell una mor ge kaninj; no Juda una lo ta paro; no ye i numbne al naworo, kwa aike nano yenmon. Ba God na ombine dje awi, na una kane God nale al wopake namor we djino mo, God nale al djengimb paro we djino ge kune nayendo. 29 Ge pille, una na we dje pille kandja sigye dje wori ge, na man we nadjill, na pille er woll. Me namba mal pai pille ye na pille yau toi ne? dji. 30 Djika Kornilius embe dji, kam inasale taman pika 3 oklok yeika, na numb al kamang ye molo kanill, iwa ta konkunom wori pollpall dje paika une ola dje na moll al aglo molo 31 kandja embe dji, Kornilius, ni kamang ye molo, una wal kane nanonj una mor al wal iwo awo yenden ge God wo pro. 32 Ge pille ni una dje worbenka iwa ta Saimon kandjiye ta Pita we dji ge, une dumo Jopa moro, ga po djineke une er wondabe! dji. Iwa Saimon ta kog kau gakle kogo yendo una moro al ge iwa Pita une numbye al pi, aike mormell. Nub ge nu solwara djeke yero we dji. 33 Dji mal ge, na ola dje kandja sigye dje worill ni won ge, wopake wonden. Nono porapora ipon mormon ge God nale al mormon. Alla, God kandja dje ni awi pin mal ge, ni no dje aumbena pupon we dji.

Epil djell una Kornilius numbye al moi ge Pita kandja dje awi

34 Djika Pita embe dji, na embe dje kaima kando, una ta moya ge God awo kune yendo, una kuruwo kama porapora mor ge une singare ye kune ye aundo. 35 Una singare du dje yenj ne, God pille kand golo mor ge, God wopake pille aundo. 36 God kandja wopake dje Juda una awi ge ye kaninj. Ge Jisas Krais, una porapora yenekne Iwa Kerman moro ge, yene kandjiye al una God boll aike ellne tukne arngan yenda we dji. 37 Ye kaninj, Jon nu pagle awi una kandja asamoll dje pene wori, are Jisas distrik Galili molo kogo mambine bolo ye po distrik Judia dumo porapora pakna ye wani. 38 Ye kaninj, Jisas Nasaret iwa moi ge God dje wori woi. God Murble ne, yembe dongall bolo awika, Jisas i una moi al po ye wopake ye awo, una Satan ye ke ye awi una moi al ge une po i gun woro awo embe yei. 39 Une Juda una dumene al wane molo, Jerusalem wane yei mal ge no pille kane yepin pille, kandja djinmon. Una wo une ipo iko pera al nil to goi. 40 Ba, ege sokara er wo pika, God ye worika une aglo alla er wo gun pi, una kani. 41 Una porapora nakani, man. Wal yei mal pille kane yei una ge kani. Ge no una. God asamoll no dje ika, une golo aglo er wo gun pika no une boll kwa nopin una mormon ge. 42 God no dje worika no dumo porapora po yene kandjiye dje una awo, una gun morka golo pinjka yenj ge, Jisas ge God dje wori kot piya we dje aumon. 43 Propet porapora iwa ge pille pepa bolo embe dji, une kandjiye al una pillgi djine una moye ge, singare ke ye wani mal ge God kere aunda we dje pepa embe boi we dji.

God Murble epil djell una moi al ge woi

44 Pita kandja dje pla woro yeika, God Murble dje worika, wo kambono nomane al pakna po puka toi. 45 Una kandjine kayekaye pai mal ge kambono kandja embe djimaka, God kandjiye dje pla woro embe yei. Yemaka Juda pillgi pai una Pita boll aike woi ge kane gok dje pille embe dji, God dje worika yene Murble ge wal gorwulle mal embe wo epil djell una moi al aike woi we dji.

47 Djimaka Pita embe dji, no Juda una God Murble ipin mal embe ga para aike i. Embe pille, nu pane kune yendo, Juda una man we nadjine. 48 Ye Jisas Krais kandjiye al nu pame dji. Pa kermaka, ga Pita moi al embe dji, ni no boll aike ege pende mopen we djimaka, une kune we dje ege pende moi.

Copyright information for `GAM