Acts 12

King Erot po Jems to golo, Pita i kaye wori

Kune ge king Erot dje worika una po Jisas pillgi dji una moi al ye ke ye aumaka, une kandja djika ami una po Jon age Jems ge bainat to goi. Une Jems to goika Juda una wopake pille aumaka, Erot dje worika po Pita ambi. Erot embe yei ge, ege kerman kandjiye Bret yis napai ege. Erot Pita amblo kere ipo kaye numb wori. Ami una 16-pela moi al djika, ami 4, 4 dje wo Pita kantau yei. Erot embe dje pi, ege kerman Pasopa pora djindaka, una nalene al na Pita iwo kot ye auno we dji. Une nomane embe paika Pita kaye pa moi ba, Jisas pillgi dji una God moi al Pita pille kamang ye moi.

Tau agelo ta wo Pita kaye pai al i orko wori

Kam kumaike kana, Pita kandja kot Erot boll panda paika, imina pai al ge ami una kasen soka iwo Pita kaye toi. Pita ami una soka mopill al pakna molo ou pa moi. Kod djillake al ami soka aglo kantau mopill. Embe molmaka Pita rum kembis pai al God tau agelo ta ola dje worika dumo tago au dji. Au djika tau agelo po Pita dambe al to mage embe dji, ni ola dje agle! dji. Djika kasen soka Pita agle al to pagi wok to yage kal toi, tau agelo embe dji, ni konkunom woro, kaken su wore! dji. Djika Pita wal worika, tau agelo embe dji, ni kon momo ge i gaklen al woro, na wondo al are we! dji. Djika Pita are po molo embe dje pi, tau agelo wo embe yendo ge une kaima yendo mo, na ou pa molo oukumb kando ne? dje pi. 10 Tau agelo ne Pita ami iwa soka kond djillake al mopill ge i woro po, ami una pakna moi ge eri i woro, po kond er dumo kerman pakna pundo al kond djillake ain ta pai ge, soka pupillka kond ge yene yaprika soka er bekle pupill. Po kondwe ta pupillka, tau agelo Pita kune taimane kere er pi.

11 Tau agelo er pika, Pita kane kune ye embe dje pi, ipon na kando ge kaima pai. God Iwa Kerman tau agelo dje worika, iwa Erot na abi ge tau agelo wo na amblo pille dje awika, Juda una na kot ye aumbon dje pi mal ge pora djindo dje pi. 12 Pita er Jon megama Maria numbye al pi. Jon kandjiye ta Mak we dji. Ga merke makai to molo kamang ye moi. 13 Pita manda wo kond djillake al to guno djika, boi ana ta kandjiye Roda we dji ge une pille kond yaprno dje pi. 14 Pita numbke dji mal ge ana Roda numog molo pi, wo kerman ke pi ba kond nayapri, muk dje po una moi al embe dji, Pita woi bekleto moro we dji. 15 Dji ba ga ni ana dall moren we dji, ambo kandja yembe ye dje embe dji, ge man! Une kaima woi moro we dji. Djika kambono embe dji, tau agelo ta une kantau moro iwa ge woi moya moro we dji.

16 Djimaka Pita bekle to molo kond to guno dje pa moika, kambono po kond yapro kani, Pita kaima wo moika ga kane aya dji. 17 Kambono kandja nadjine dje pille Pita agle pla woro, God Iwa Kerman wo une kaye pa moi ge i orko wori mal, une dje ga awo embe dji, na kandja djindo ge ye Jems dje awo, nono agane kambono mor ge dje aume! dji. Dje kere, une er tabye ta pi.

18 Kam kumaike kana Pita kaye numb pa namoika, ami una kane yemyem po, kakene aglene to, Pita er nam pi ne? dje dulo pi, man pai. 19 Paika Erot kane kandja dje worika una dulo wani man paika, Erot ye molo ami una kaye numb kantau ye moi una ge wo kot ye awo djika una to goi. To golmaka Erot dumo Judia kere er dumo Sisaria po moi.

Iwa Erot goi

20 Dumo Tair una ne, Saidon una Erot agle al kwa mokna top to noi. Ba ipon Erot ga boll elle kumbso awi. Ge pille ga une boll kandja dje alla er taimane bon dje woi. Kambono asamoll po iwa Blastus moi al pi. Une ge King Erot boiye wopake moi. Kambono une moi al po embe dji, no kwa top to no mormon ge Erot kond tugo dje djinda dje pille wonmon we dji. Djimaka iwa Blastus kune we dje pille, kambono boll aike er Erot moi al po kandja dji. Erot, kapla, ege ta djimbon we dji.

21 Erot dji ege ge yeika, une wo konkunom wopake iwa king worinj mal embe woro, sia king al po ami dje molo, kandja kangup to una awika, una pille embe dji, 22 une kandja djindo ge una kandja djinj mal embe nadjindo, god kandja djinj mal embe djindo we dji. 23 Djimaka Erot God kandjiye amblo pla worno dje nayei pille, ola dje God Iwa Kerman tau agelo ta dje wori wo Erot toi, kagrin nomaka une goi.

24 Goi ba, una God kandjiye dje pa molmaka, kandja ge er kerman po wai dji.

25 Alla Barnabas ne, Sol po kogo Jerusalem yemboll dje pupill kogo ge ye kere, alla er yem dumo Antiok pupill. Pupill ge soka iwa Jon kandjiye ta Mak ge dje ipillka, soka boll aike er pi.

Copyright information for `GAM