Acts 18

Pol dumo Korin po kandja dje una awi

Pol Atens kandja dje kere, er Korin pi. Juda iwa ta Akwila we dji moi ge Pol po une kani. Une ge propins Pontus iwa moi. Asa king Sisa Klodius dumo Rom molo kandja embe dje wori yei, Juda una porapora mor ge, ye Rom kere er tambye ta pume! dji. Dji mal ge iwa Akwila yene game Prisila boll er Korin wo mopillka, Pol po soka kani. Soka sel numb to bolo bisnis ye mopill mal Pol asa sel numb to bolo bisnis embe yei pille, soka mopill al une po kogo aike yei. Sabat ege ege yei Juda una lotune numb yei al Pol po kandja dje una awi. Juda una ne, Grik una aike Jisas boll pillgi djine dje pille Pol embe dji.

Sailas ne, Timoti dumo Masedonia kere er wopillka, Pol sel numb kogo ye moi ge kere, po Juda una moi al ege ege God iwa ta dje worda wo ye i yem worda we dji ge, Jisas wale woi we dji. Une kandja dji ge Juda una napille, bakalo aumaka, Pol yene konkunom djengimb moi ge sama to embe dji, ye wamo al pine ge yene kogone, na ye dje awill pora dji. Ipon na epil djell una moye al po kandja dje auno we dji. Dje kere pagle une lotu numb kere po Titius Jastus numbye al pi. Iwa ge God pille pla ye moi iwa. Yene numbye ne, Juda una lotu numb yei ge manda dakalo yepill. Juda una lotu numb iwa kerman kandjiye Krispus we dji ge yene unakye boll Iwa Kerman Jisas boll pillgi dji. Pol po Jisas kandjiye dji ge Korin una merke pillgi dje, nu pai.

Imina pakna pika Pol oukumb dal kani, Iwa Kerman wo embe dji, na ni boll moro. Ni dumo moren al na unakna merke mor, ni kand nagopen. Una wo ni tane kune nayendo. Ni kandja djinden ge nakerben, dje pa mopen we dji. 11 Djika Pol Korin molo, una moi al God kandjiye dje pene worika, takene 18-pela wo pi.

12 Alla are iwa Galyo propins Akaia molo kantau yei poke ge, Juda una Pol kogo yei mal ge ye ke ye aumbon dje pille wo Pol i po Galyo moi al kot ye awo, 13 embe dji, nono God kandjiye amblo pla wornmon mal ge pai mal wornmon ba, iwa ge wo man dje aundo. Kandja lo pai mal ge une kamblo kal woro embe djindo, God kandjiye amblo pla woro aumbon we djindo ge, singare djell ta mal ye aumbon we djindo we dji. 14 Djimaka Pol kandja dje yem worno dje yeika, iwa Galyo Juda una moi al embe dji, iwa ge singare ke ye, geko bolo wanika, ye Juda una kot ye aune ge kune yeika ba, une embe ta nayei. 15 Ye Juda una kandjine pille, kandja kerker dje, yenekne kandja loine pai mal djinj ge kerme! Ye yenekne kot djine, na piyo napro. 16 Kot ipon pora djindo! we dji. Embe dje pagle Juda una dje bekle wori. 17 Dje bekle worika, kambono po, iwa Sostenes Juda una lotu numb iwa kerman moi ge po une amblo, kot dji al ge manda molo toi. Toi ba Galyo kane gok nadji, kane keri.

Pol er yem dumo Antiok pi

18 Pol ege momo dumo Korin moi. Are, une po pillgi dji una moi al dje kune ye awo po, iwana soka Prisila ne, Akwila boll aike er dumo Senkria pi. Po molo yene ngambale ene bale wori. Une embe yei ge une God pille, kandja dongall dje God kogoye ta yeno dje pille, ngambale ene bale wori. Sip ta er distrik Siria puno dje yei ge, kambono er pakna po er pi. 19 Kambono dumo Epesus pillau djimaka, Pol iwana soka ge kere er Juda una lotu numb po Juda una moi kandja dje awi. 20 Awika kambono embe dji, ni no boll ege momo mopen we dji ba une man dji. 21 Sip Epesus kerno dje yei al une embe dji, God kapla we dji dal, na alla yem wonaka kanbon we dji. Je pagle er sip al po er pi. 22 Dumo Sisaria po pillau dje pagle, une sip kere po pillgi dji una kona pla Jerusalem moi al ge une po djembon to awi. Are une dumo ge kere er kal Antiok pi.

23 Pol ege momo Antiok molo, kere er pi. Po distrik soka Galasia ne, Prigia dumo pakna yei al ge une wane, Jisas pillgi dji una moi al po, nomane gi djinda dje pille kandja wopake dji.

Iwa Apolos dumo Epesus molo kandja dje una awi

24 Kune ge Juda iwa ta kandjiye Apolos we dji ge er Epesus woi. Une dumo Aleksandria iwa. Une kandja dje una aundo iwa moro. Kandja Baibel al pai ge une pille keri. 25 Une dumo Aleksandria moi poke ge una Jon nu pagle awi mal ge kandja beke une aumaka, une kandja ge pi ba Jisas kogo porapora yei mal ge une pende pi, boll napi. Une wo dumo Epesus moi ge une po Juda una lotu numb yei al po, kand nagolo, Jon kogo yei mal kandja yembe ye dje una awi. Awika, iwana soka Prisila ne, Akwila ge pille mopill. Une kandja dje awo kerika, soka po une moi al dje ipo, Jisas kandjiyembe pai mal beke aupillka, une pi. 27 Iwa Apolos ge une propins Akaia puno dje pika, pillgi dji una kona Epesus moi ge embe dji, wopake, er ben we dji. Yenekne agane kona dumo Akaia moi ge kambono pepa bolo awo embe dji, Apolos wondo ge ye wopake we dje i numog worme! dji. Pepa ge bolmaka, Apolos i dumo Akaia po molo una boll kogo kerman yei. Ga God wandill goi me ge Jisas boll pillgi dji. Une po kandja dje awo, amblo pille dje awika, ga wopake pille aumaka nomane gi dji. 28 Une po Juda una boll kandja dongall dje awika, kambono kandja dje yem wori mal une yembe ye kamblo kal wori. God kandjiye Baibel al pai ge une kandja pai mal dje awo, God Krais dje worda wonda we dje kandja bolo wori pai ge, Jesus wale woi we dji.

Copyright information for `GAM