Acts 20

Pol er dumo Masedonia ne, dumo Grik pi

Una merke kandja kerman dji ge pora djika, Pol djika pillgi dji una woi. Kambono nomane gi dje pa moya dje pille une kandja wopake dje awi. Dje awo kere une djekun ye awo embe dji, ye wopake molme! dji. Dje une er propins Masedonia puno dje er pi. Po dumo yei al une pakna po wane molo, pillgi dji una nomane gi dje pa moya dje pille kandja merke dje awi. Embe dje awo kere alla er dumo Grik pi. Dumo Grik pakna ge une takene sokara molo pai. Sip ta wo paika une er pakna po distrik Siria puno dje pi ba, Juda una kui ye molo une wonda to gopon we dje moi we djimaka, Pol kere er yem dumo Masedonia pi. Pol aike pi una kambono moi ge ta kandjiye Sopater (une newoga Pirus ge dumo Beria una moi). Ta dumo Tesalonaika iwa soka mopill ge iwa Aristarkus ne, Sekundus. Ta dumo Derbe iwa ta Gaius moi ne, iwa Timoti moi eri. Propins Esia iwa soka mopill, ta Tikikus, ta Tropimus. Iwa kambono ge asamoll er dumo Troas po molo, no alla wombon dje pille tau moi. No dumo Pilipai mopinka, Juda una ege kerman kandjiye Bret Yis Napai ege yei pora djika, no sip al er pakna po er dumo Troas bon dje yepin. Po sip al mopinka, ege 5-pela wo er pika, alla dumo Troas po pillau djipin. Yei al ge no ege 7-pela mopin.

Womba Yutikus golo alla er wo gun pi

Sande yeika no pillgi dji una boll kwa aike no mopinka, Pol yene kumaike kana er puno dje pille, no mopin al kandja dje awi. Kandja momo kaima dje awika, imina pakna pika une kandja dje pa moi. Rum plato mopin al ge namba tri rum pla kaima yeika, wamo lambo merke gale wori moi. Paika womba Yutikus we dji ta windo al ami dje moika, Pol kandja momo djika, une ou woika pai. Ou dall pa, bera dje yage kal toi. Makimb al paika, una kal po kagle i pla woro kani une kaima goi. 10 Goika, Pol er kal po womba pai al be pa kagle molo embe dji, ye kand nagolme! Womba gun moro! we dji. 11 Dje kere alla er pla po bret tuklo awo, una boll aike kwa noi. Kwa no kere are une kandja momo dje moika kam tagi. Tage au djika Pol kere er pi. 12 Er pika womba gun moi ge una i numb al woro, yenekne ellne tukene arngan kaima yei.

Pol er dumo Miletus pi

13 Pol er pika no alla sip ta pai al ge er pakna po er dumo Asos pupin. Asamoll Pol no mopin al wo embe dji, ye er wekle pineke, na are makimb al wono we dji. Dji mal ge no pille dumo Asos po molo une wonda dje pille tau mopin. 14 Mopinka Pol are wo pillau djika, sip mopin al une er pakna woika, no aike er dumo Mitilini pupin. 15 Tagika Mitilini kere er po dumo kembis Kios we dji ge manda po kere, sip al papin. Tagika er dumo Samos bon dje molo papin. Kumaike kana no po dumo Miletus pillau djipin. 16 Pol nomane embe pai, kune yei dal, nono asamoll ola dje er Jerusalem po moponka, ege kerman Pentakos yendaka kanno dje pi. Embe yembon ge dumo Epesus nambon. Ege kanan propins Esia paknato wane mopon ge kune nayendo dje une embe pi.

Dumo Epesus pillgi dji una kerman kambono moi ge Pol po dje wopake ye awo er pi

17 Dumo Miletus mopinka Pol kandja sigye dje worika dumo Epesus pillgi dji una kerman kambono er woi. 18 Wo molmaka Pol embe dji, na dumo Esia kindja er pakna woll pa pi ipon yendo ge, na ye boll molo yell mal ge ye kane kune ye keri we dji. 19 Ye kaninj, Juda una kune merke na tambon dje yemaka, na imb kake, kune merke kimb yell. Ba na nanam kandjina ge amblo kal woro kere, God kogoye na agle gi dje ye pa moll we dji. 20 Na kandja wopake dje ye awill ge na kandja boll boll dje awill, kembis dje nawill man. Na pene molo kandja dje awo, ye numbine al na para aike po kandja dje awill. 21 Juda una ne, Grik una aike moi al na po kandja embe dje awill, ye God pille nomane ake to, Jisas nono Iwa Kerman moro ge ye pillgi dje yeme! djill. 22 Ye pillme! God Murble na moll al wo dji, na er Jerusalem puno paro. Jerusalem una na ye wopake ye aune mo, ye ke ye aune na nakando. 23 Na embe dje kando, dumo yemyem wane moro al ge God Murble na moro al wo embe djindo, are ni kaye pa, imb kakben we dji.

24 Ba na gun moyo mo goyo, na pille we nayendo. Na wal pille we yendo ge embe, Iwa Kerman Jisas na ombine dje awi kondwe ge, na po pagle, une kogo na yeno dje awi ge na ye kune ye kerno. Une na kogo awi ge embe, na kandja wopake dje una awo, God ye wopake pille, wandill golo aundo we djindo ge na pille we yendo we dji.

25 Ye pillme! Asa na ye boll molo God yene dumoye kantau yendo mal na dje orko worill, ye pi ba alla, ipon na er puno alla yem nawono. Ye na gumana djillakena alla nakanne we dji. 26 Na embe yeno pille na ye pille embe djindo, ye mor al ge iwa ta er take dje pi dal, me ge na boll nayero, man. 27 God nomane pai mal ge na ye dje awo kerill, na kand nagoll. 28 Pillgi dji una mor ge kog sipsip mal embe mor. God Murble wo dji, ye kambono kantau ye molme! dji. God yene warye awika, une goi meyamye al ge kambono pillgi dji. Embe yei pille kambono wopake moye dje pille ye kantau ye molme! dji. Ye yenekne eri, ye wopake moye dje pille kantau ye molme! dji. 29 Na kando, na er puno kune ge are kena kunda yendo una ye mor al pakna wo sipsip ye ke ye aune. 30 Ye yenekne una pende ye mor al kandja kende djimbona, una pende no boll wone dje pille kandja kende yembe ye djine. 31 Ga kaima yene. Na ye boll ege ege molo pillka, kognumb sokara wo pika, ye taimantaiman dje moi ge, ye nomane wopake panda dje na kimb ye, kandja dje ye awill, ye kaninj.

32 Ipon na ye i God agle al wordo. Une ye pille wandill golo yei mal ye piye dje pille na une agle al wordo. Une wandill goi ge, ye pillgi djine ge kune yenda. Yene unakye dje i moi al ge une wandill golo awo, wal auno ine we dji mal ge, ye para aike ine kune yendo we dji.

33 Ye una taimantaiman dje mor ge ye wal silpa mo, gol mo, konkunom ta yei ge na kane ino dje pille noip nagoll. 34 Ye kaninj, na wal kane noll ge nanam aglena al kogo ye i noll. Alla nanam aike moi una boll mopin ge na amblo pille djillka, wale kane nopin. 35 Na embe yell ge ye kanne, una wal kane nanonj una mor ge nono pak to aumbon ge kune yendo. Iwa Kerman Jisas kandja dji mal yembon. Jisas embe dji, una wal inda iwa ge wo piya ba, una wal aunda iwa ge une wo kerman ke piya we dji. 36 Pol kandja embe dje kere, pillgi dji una kantau yei una kerman kambono ge une boll aike gopne boglo kamang yei. 37 Kamang ye kermaka, una kerman kambono po Pol kagle, gume djillake to no, kimb yei. 38 Pol na er puno, ye na gumena djillakena alla nakanne we dji mal una kerman kambono ge pille wandill kerman golo awo, Pol sip al puno dje pi ge kambono boll aike er pi.

Copyright information for `GAM