Acts 24

Juda una kerman wo Pol kot ye awi

Ege 5-pela er wo pika, opa gale awinj kantau yendo iwa Ananaias ge er Sisaria pi. Ga une boll aike pi una ge, Juda una kerman kambono yemaka, Rom lo nomane kerman pai iwa ta kandjiye Tertulus ge yeika, ga porapora er Sisaria pi. Ge gapman kantau yei iwa moi al Pol ke yei mal dje pene woro awi. Kambono kandja dje pora djimaka, gapman kantau yei iwa ge embe dji, Pol er wondambe! dji. Djika Pol iwo pene wormaka, iwa Tertulus kot ye awo embe dji, iwa Kerman Peliks, ni ege momo no Juda una pak to awin, no ami dje wopake mormon. Asa no wopake namopin ba, ni nomanin wopake pai pille kogo yen, ipon no wopake mormon. Ni kogo embe yen ge, no kanpin, no ellne tukne arngan yei. Ni wopake uro kaima we dje aumon.

Ni kogen merke pai iwa moren, no kandja momo nadjimbon, tuge djinmon mal ni wopake pille aumben. No kanpin iwa ge djingjang yendo iwa moro. Dumo porapora po kandja djindo al, Juda una pille kunda kakinj. Nono Juda una lotu yenmon ge une kere, lotu gun ta kandjiye Nasaret we dji ge une kantau yendo iwa moro. God lotuye numb kerman gull pai al une pakna po to djenimb ye auno dje yeika, no po une abpin. Embe yei pille ni kandja djimbenka, une dje yem worda ni pupen. Kot me paro mal ni pille kune yemben we dji. Iwa Tertulus kandja embe djika, Juda una kerman pille kandja dje taimane woro embe dji, une kandja djindo ge kandja kaima djindo we dji.

Iwa Peliks kot pi al ge Pol kandja dje awi

10 Iwa Peliks Pol dumo awo worika Pol kandja embe dji, kognumb merke wo er pi al ge, ni no Juda una jas mal embe moren. Ga na kot ye awij, ni dje yem woro na dumo aunden ge na wo pro. 11 Ni una dje pupen, asa ege 12-pela wo er pika na lotu djino dje er Jerusalem pill. 12 Po mollka na kot ye awinj una kambono ge kani. Na lotu numb kerman gull pai al pakna po moll. Na kiye dje molo, una boll nonga nadjill. Kambono kani na lotu numb yei al po kandja dje wanill ge ne, Jerusalem pakna wanill al na kandja djill al ge una pille kunda nakaki. 13 Ipon kambono kot ye na awinj ba yembe yene ge kondwe nayero, kandja djinj ge me nayero.

14 Ba alla kandja taimanta djinj ge kaima paro. Jisas kondweye gun yero kune nayendo we djinj ge, na pakna moro, no nane kambono Godne ge na pille pla yendo. Iwa Mosis lo no dje awi mal ne, propet pepa boi mal na pille pla yendo. 15 Alla kambono God wal ta kaima yenda kui ye molo kanbon we djinj ge na para kui ye moro. Una goi wopake moi mo, ke moi ge porapora God to magda, agye we dje kambono kui ye mor ge na para kui ye moro. 16 Na nomana embe pai pille ege ege God nale al na ke ta nayeno. Para una nalene al na wambo ta pa djinda dje pille we yendo.

17 Kognumb merke er wo pika, alla er yem Jerusalem wo nanam unakna ku kane nanoi una moi al ku pak to awo, God opa gale auno dje yell. 18 Kambono wo na kani poke ge na lotu numb kerman yei al pakna molo, lotu singare pai mal ye, God nale al kiwa moyo dje yell. Embe ye mollka una merke wo na boll aike namoi, una kunda nakaki. 19 Ba Juda una propins Esia moi una pende wo ni moren al na kot ye aune ba kambono ge nawoi. 20 Nawoi ba Juda una kerman kot pir una Jerusalem molo kot ye na awi ge, una ipon wo mor ge aike moi pille, ni dje auneke pupen. 21 Kot yei al na kandja ta djill ga pende ke pi. Ge God yendaka una golo pi ge alla aglo er wo gun pine we dje na kandja embe djill al ge una ke pi. Embe pille ga ba wo na kot ye awinj we dji.

22 Jisas kondweye pillgi dje moi una singare yei mal ge Peliks pille kane yei. Embe pille, Pol kandja dje pora djika Peliks embe dji, ipon kot djipin pora djindo. Alla ami una kantau yei iwa Lisias wondaka, kot ge alla pill dal pora djinda we dji. 23 Peliks ami iwa kerman ta moi al embe dji, ni Pol ipo kaye numb worben ba yene unakye wo une kanbon we dji dal, ni man nadjimben, ga pakto aune ge kune yenda we dji.

Pol kognumb soka kaye pai

24 Ege pende wo er pika Peliks game Drusila boll wopill. Ana ge Juda ana moi. Iwa Peliks ge kandja djika, Pol iwmaka una Krais Jisas pillgi djine mal une kandjambe to awi. 25 Una singare wopake yene mal ne, una yene gaklene kantau yene mal ne, are God nono kot ye aunda mal une kandja embe dji. Djika, Peliks pille kand golo embe dji, pora, ni er ben. Are ege wopake ta yei dal, na djinaka ni wo kandja alla djimbenka piyo we dji. 26 Une kandja embe dji ge, Pol na ku aundaka kaye pai dje orko worno dje pille, une kune merke djika Pol iwmaka soka kandja djipill.

27 Kognumb soka wo er pika Peliks nambaye i iwa Porsius Pestus aumaka, Juda una na wopake kanne dje pille, Peliks Pol kaye pai ge kane keri, pa moi.

Copyright information for `GAM