Acts 25

Pol embe dji, na Rom punaka iwa kerman Sisa na kotna piya we dji

Iwa Pestus dumo Sisaria woi ge une distrik Judia gapman kantau moi iwa. Ege sokara er wo pika une Sisaria kere er Jerusalem pi. Po moika opa gale awi una kerman ne, Juda una kerman wo Pol ke yei mal ge dje pene wori. Iwa Pestus no amblo pille dje aunda dje pille ga embe dji, ni dje Jerusalem worbenka Pol wondaka no kot djimbon we dji. Ga kandja embe dji ge Pol kondwe tabye wondaka to gopon dje pille dji. Djimaka Pestus embe dji, Pol dumo Sisaria kaye pa moyaka, ege pende er wo pundaka na nanam dumo ge puno we dji. Ye iwa kerman kambono pende na boll aike bonka, Pol ke ta yei dal, ye Sisaria molo une boll kot djine we dji.

Iwa Pestus pa moika, ege 8 mo, 10-pela wo er pika une Jerusalem kere er dumo Sisaria pi. Kam tagika Pestus kot piyo dje pille djika, una Pol iwmaka, Juda una kerman kambono Jerusalem kere er wo pai una ge wo Pol moi al i pakna woro, kot ninga dje dji ba Pol ke ta yei mal kambono djimbon dje yei ge ale yei. Yeika Pol kandja dje yem woro embe dji, na ke ta nayell. Juda una loine paro ge ne, Rom una iwa kerman Sisa loye paro ge ne, Juda una lotu numb kerman yero ge, porapora na ke ta nayendo we dji.

Ba Pestus Juda una wopake piye dje, Pol moi al embe dji, ni er Jerusalem po kambono boll kot djimben na piyo ge, ni kune dje pren mo? dji. 10 Djika Pol embe dji, ipon kot djinmon ge nono iwa Sisa kotye numb djinmon, ge kune yendo. Ni kanden, na Juda una boll ke ta nayell. 11 Na ke ta yell dal gapman na to goya ge, na man we nadjino ba, una na boll kot kende djineke, ni na ipo kambono aglene al worben ge na man djindo. Ye na dje Rom worne, iwa Sisar na kotna piya we dji. 12 Djika iwa Pestus, nomane kerman pai una boll kandja dji. Dje kermaka, Pestus Pol moi al embe dji, ni Sisa kot piya we djinden ge, ni er Sisar moro al ben we dji.

Pol king Agripa moi al kandjambe toi

13 Ege pende er wo pika king Agripa ambe Bernaisi boll iwa Pestus namba kindja i pille, dje wopake ye aumboll dje Sisaria pupill. 14 Po mopillka ege merke er wo pika ga boll aike moi. Molmaka, Pestus Pol kotye pai mal pille, king Agripa moi al embe dji, iwa Peliks asa moi poke ge, iwa ta kaye numb wori pa moro. 15 Na Jerusalem pillka, opa gale awi una kerman kambono ne, Juda una kerman ge na moll al wo embe dji, iwa ge ke yei, gapman to goya we dji. 16 Dji ba na kandja dje yem woro embe djill, no Rom una mormon ge kot inda una kiwa to nagormon. Kot inda una ne, aunda una aike gumane kane kot djimbell ge kune yenda we djill.

17 Alla na, Juda una kerman kambono boll aike er yem wo Sisaria papin. Kam kumaike kana na ola dje, dje worillka una Pol iwmaka no kot djipin. 18 Ba kambono aglo kot djine dje pill mal ge ta nadji. 19 Ga lotu dji mal ge kandja yemyem dje, iwa ta goi kandjiye Jisas we dji ge, Pol man, ge gun moro we djika nonga dji. 20 Kandja embe djimaka na kot namba mal piyo ne? dje pill. Na Pol moi al embe djill, ni Jerusalem po kambono boll kot djine ge na piyo kune yenda dje pren mo? djill. 21 Djillka Pol man dji, na kaye pa moyaka, ni na dje worbenka iwa Sisa moro al punaka, une kot piya we dji. Une kandja embe djika, na dje worillka une alla kaye numb pa moi. Kondwe ta yei dal, na dje worna Sisa moro al punda dje pill. 22 Pestus kandja embe djika king Agripa embe dji, iwa ge kandja ta djinda nanam piyobe dji. Pestus, kune, kumaike une wo kandja djindaka ni pupen we dji.

23 Kam Kumaike kana, iwa king Agripa, ambe Bernaisi boll ekin wopake gale wopill. Ami una kerman kambono ne, Sisaria una kerman kabono, porapora wo er numog po makai to moi. To molmaka, Pestus djika, una Pol iwo pakna wori moi. 24 Moika Pestus embe dji, king Agripa ne, una porapora mor ge na ye wopake we dje aundo. Iwa ta moro ye kaninj ge, Juda una Jerusalem mor ge ne, Sisaria mor ge, porapora na moll al wo embe dji, iwa ge makimb al namoya, gapman to goya we dji. 25 Dji ba na kanill une ke ta nayei, to gopon kune nayendo. Ba iwa Sisa na kotna piya we dji pille, une Sisa moro al dje worno dje pro. 26 Une ke ta nayei, na pepa bolo iwa kerman Sisa auno ba wal me ge na pill kune nayendo. Embe pai pille na ni king Agripa djill, une wo kandja djindaka, ni pupenka, ye una kerman kambono porapora woi mor ge piye. Embe yeneke na pepa bolo iwa Sisar auno mal kane kune yeno. 27 Man panda, na Sisa moro al kiwa dje worno ge kune nayendo we dji.

Copyright information for `GAM