Acts 3

Iwa ta kake ke yei ge alla wopake yei

Kune taimanta taman pika 3 oklok mal embe yeika, Juda una kamang ye ye yei poke ge, Pita ne Jon po lotu numb kerman gull pai al pakna boll dje yepill. Lotu numb kerman una pakna po po yei al ge gull djillake ta yei, kandjiye gull djillake wopake we dji. Yei al ge, kake ke yei una ta moi. Me kui kune ge embe ye pai. Lotu numb kerman pakna po po yei al ge, una iwa ge iwo wormaka, une pene molo ku kokane eri dje moi. Une embe ye moika, Pita ne Jon er pakna womboll dje yepillka, une kane embe dji, ye na wal ta ause! dji. Djika soka une kane pagle Pita embe dji, no kane! dji. Une soka ku aumbell dje kane moika, Pita embe dji, na ku ta naparo ba, na wal ta paro ge ni auno imben. Na Jisas Krais dumo Nasaret iwa kandjiye al ge na kandja dje ni aundo, ni agle, kond er piye! djindo. Pita kandja dje kere une iwa ge agle woto amblo i pla wori. Ola dje une kake tukye ne, kake nale al ge aike wopake yei. Embe yeika une plo dje, agle molo kond kamblo er pika, Pita ne Jon boll aike er lotu numb kerman pakna pumaka, une kond kamblo duse dje molo, God ni na ye wopake ye awin we dji. Une kamblo kond po God kandjiye amblo pla woro yei mal ge, una porapora lotu numb kerman pakna moi ge kani. 10 Asa gull djillake kandjiye wopake we dji yei al ge, une ku kokane dje moika, una kane kane yei ba, alla ipon une kiwa moi ge una kane gok dje, aya dji.

Una lotu numb kerman pakna yei al moi ge Pita po kandja dje awi

11 Wal yei mal ge una kandja ge pille, gok dje muk dje wo iwa ge kanbon dje woi. Woi al ge dumo ta yei ge Solomon dumoye we dji yei. Yei al ge, iwa ge po Pita ne Jon soka aglo mopill al kagle moika, una wo kani. 12 Una wo moi al ge Pita kane embe dji, Israel una ye mor ge, ye namba yei pille iwa ge kane ye gok djinj ne? Ye namba yei pille ye no kane kolo yenj ne? Iwa ge kake al wopake yei ge no soka yembene dongall pai pille une kake wopake yei mo? No God nale al wopake mopill pille une kake wopake paro mo? Ge man! 13 God yene yeika, une kake kiwa yei. God ge Abraam, Aisak, Jekop Godne ne, no gollne Godne moi iwa ge, une boiye Jisas kandjiye amblo pla wori. Ye Jisas kaye to ipo iwa Pailat moi al kot ye awo man dji. Une kaye pai al ge Pailat dje orko worno dje yei 14 ba alla, iwa wopake kaima moi ge, ye man we dji, iwa djell ta una to golo golo yei iwa moi al ge, ye po Pailat moi al embe dji, iwa ge dje orko wore! dji. 15 Una nomane gun aundo iwa ge ye ipo to goi ba, God i yem wori, no kane djinmoll. 16 Iwa ye pille kane yenj ge no Jisas kandjiye al pillgi djipill pille yembe dongall indo. Jisas yene yeika no pillgine al iwa ge wo er gun pi ye kaninj.

17 Agana kambono mor ge na ipon kando. Ye Jisas ipo ye ke ye awi ge, ye napille yei, alla ye iwa kerman kambono para napille yei. 18 Asa God propet kambono moi al dje worika, wo ye gollne moi al kandja dje pene woro awo embe dji, God Krais dje worda, wonda ge una to goye we dji. Dji mal ge, ye Jisas to golo yei ge, propet asa dji mal ge kaima pai.

19 Ye singare ke embe ye waninj ge ye nomane ake to God moro al wome! Ye embe yei dal, ye singare ke ye waninj ge God kill gulo woro kere aunda. 20 Ye embe yei dal, une ge yene yembe dongall ge iwo ye mor al aunda, alla une ye pille, iwa Krais Jisas dje worda, ye mor al wonda. 21 Krais moro ge une kupill al molo pa moyaka, God wal porapora gun yenda kune ge, iwa Krais alla wonda. Wal porapora gun yenda kune ge, kamasa ke God yene propet kambono moi ge kandja ge dje pepa bolo pagi.

22 Iwa Moses asa kandja taimanta dje pepa bolo pagle embe dji, ye Iwa Kerman God ge dje wordaka ye moye al ge propet na moro mal embe are ta wonda. Alla une kandja porapora djinda mal, ye pille kane ye molme! dji. 23 Alla ye pille kane embe ta nayei dal, God yene unakye mor al ge i orko woro to goya we dje Mosis pepa embe boi.
Lo 18:15, 18-19, Wkp 23:29
24 Propet Samuel pepa ge bolo po goika, alla propet kambono are bolo pumaka, kambono porapora ipon ege manda mormon ge pille pepa bolo pagi.

25 Propet wombane mor ge, ye mor. Alla God ye gollne boll kandja dji ge, une ye pille dji eri. Une embe dji, na ye Godne moyaka ye na unakna moye we dji. Kandja ge God dje Abram moi al awo embe dji, ni womban taimanta molo yendaka, una dumo porapora yero al moye ge wopake moye we dji. 26 God ye wopake ye auno dje pille, yene boiye iwa dje wori woi. Une ye moi al ge asamoll woi. Ye singare ke ye waninj ge kerne dje pille dje wori woi we dje Pita embe dji.

Copyright information for `GAM