Acts 5

Iwa Ananaias game Sapaira boll God nale al kende djipill

Iwa ta Ananaias we dji ta moi ge une game Sapaira boll aike molo, yenekne makimbne ta yei ge soka po ku bolo ipill. Soka ipill ge ku tuge yem seke pagle, ku tuge yem ge Ananaias iwo aposel kakene al wori. Iwo worika Pita embe dji, Ananaias, namba mal yei pille Satan ni kamalin toika, ni pora we dje awo, God Murble kandja kende dje awo, makimb ku bolo in ge ni ku tuge yem ipo seke pagren ne? Makimb yei ge ni ye mon poke ge ni makimbin yei. Alla, are ni ku bolo in ge ku ge ni kuin eri yei. Ni nomanin namba mal pai pille ni singare ke ge yenden? Ni makimb una moi al kandja kende nadjin, ni God moi al kandja kende djinden we dji. Pita kandja embe djika, Ananaias pille, ola dje yage kal to goi. Goika una kandjambe tomaka, una pi ge kand kerman goi. Ananaias golo paika iwa komdill kambono po kon allap iwo, were pagle, i bekle po gull to pagi.

Gull to kermaka olpa nale sokara mal embe er wo pika, Ananaias game gama napille molo, er numog woi. Wo moika Pita embe dji, ni kandja djiye! Ye soka makimb ku bolo ipill mal ge, ye ku boll boll iwo aumell mo? dji. Djika ana ge embe dji, ge wale, iwo aupill we dji. Djika Pita embe dji, ye soka nomane namba mal pai pille Iwa Kerman Murble moi al kandja kende dje awo, une yembe paro mo naparo ne dje su yenmell ne? Ni kane! Una ni wogan ipo gull to pagi una kambono ge er woi. Nub djillake al molo, ni para tublo ipo gull tambon dje woj! we dji. 10 Djika ola dje ana ge Pita kake al yage kal to goi. Goika iwa komdill kambono numog wo kani ana ge golo pai. Paika kambono ana ge ipo, woge goi gull to pagi al manda ge gull to pagi. 11 Wal embe yei ge una pillgi dji una kand kerman goi. Alla una dje pumaka una porapora ge para kand kerman goi.

Ke to pai una ge Aposel kambono po i gun woro awi

12 Aposel kambono po una moi al wal ta mal ye, kogo dongall ye embe yei. Lotu numb kerman gull pakna to, Solomon dumeye we dji yei al ge, pillgi pai una porapora po makai to molo molo yei. 13 Ga embe moi ge una pille pla ye awi ba kand goi, pakna po ga boll aike mopon dje nayei. 14 Una ga boll aike mopon dje nayei ba iwana merke er pakna wo Iwa Kerman boll pillgi dji. Ege ege er pakna wo molmaka, una merke moi.

15 Aposel kambono kogo embe yenj we djimaka, una po ke toi una moi iwo kondwe al wormaka, palbam al molmaka, kunom al molmaka, Pita wondaka yene minman ye molo una ta abi dal, una ge er wo gun punda dje pille una iwo kondwe wori moi. 16 Jerusalem dumo manda moi una ge para aposel moi al woi. Woi ge ke toi una dje i, kum ke tukne al moi una dje iumaka, ga porapora er wo gun pi.

Aposel kambono kaye pai al ge tau agelo ta wo i orko wori

17 Aposel kogo embe yemaka, opa gale awi iwa kerman moi ge ne, yene ye noi una Sadusi kambono moi ge yemaka, kane minj i, wo 18 aposel kambono amblo ipo kaye numb wori. 19 Wormaka pa moi ba, emill paika, Iwa Kerman dje wori, tau agelo ta wo kaye numb kond yapro woro, aposel kambono i orko woro embe dji, 20 ye lotu numb kerman gull pai al pakna po aglo molo, Jisas ye nomane gun awi mal kandja ge dje pene woro auneke una piyebe! dji. 21 Djika kam tagika aposel kambono lotu numb kerman gull pai al pakna po una moi al kandja dje awi.

Kune ge opa gale awi iwa kerman ne, yene ye noi una kambono ge boll aike djimaka, Juda una kot kerman dji al ge, ga Juda una ngambalne pai una er pakna woi. Kambono embe ye molo kandja sigye dje wormaka, una pende kaye numb po aposel dje imbon dje pi.
22 Imbon dje pi ba, po pillau dje kani, kaye numb ge aposel kambono pa namoi. Namolmaka kambono er yem po embe dji, 23 Kaye numb pupin ge dongall pai. Eine kambono numb kond djillake al aglo moi. Ba no kond yapro kanpin ge aposel kambono pa namoi we dji.

24 Kandja embe djimaka lotu numb kerman eine iwa kerman ta yeika, opa gale awi una kerman kambono ge yemaka, kambono kamalne ngujo pille embe dji, namba mal yei pille aposel kambono kaye numb ge pa namor ne? dji.

25 Kandja embe djimaka, iwa ta wo embe dji, ye pir mo! Ye una ipo kaye numb woro pagi una ge, er lotu numb kerman po aglo molo kandja dje una awo mor we dji. 26 Djika lotu numb kerman eine eplye boll po aposel kambono ablo, una no ku to golo djine dje pille aposel kambono kiye dje iwi.

Kot kerman dji al ge aposel kambono kand nagoi

27 Ga embe ye iwmaka aposel aglo molmaka, opa gale awi iwa kerman kot ye awo embe dji, 28 no ye kandja dongall dje aupin. Ye Jisas kandjiye ge nadjime djipin ba, Jerusalem una porapora moi al, ye po kandja dje awi una pi. Ye embe yenj ge ye Jisas gakle al meyam toi me ge no boll worbon dje yenj we dji.

29 Une kandja embe djika Pita ne, aposel kambono embe dji, no God kandja djinda mal yembon ge kune yendo. Una kandja djine mal yembon ge kune nayendo. 30 Ye Jisas ipo iko pera al nil to goi ge God nono gollne godne moro ge, une ye wori, Jisas golo agle er wo gun pi. 31 God Jisas i pla wori, agle woto moro. God embe yei ge Jisas Iwa Kerman moya, Israel una nomane ake taneke singare ke yenj ge kero awo, i yem worda dje Jisas i pla wori. 32 God wal embe yei ge no kane djinmon. God Murble para aike kane djindo. Una God kandjiye pille yenj una God Murble awi ga boll moro.

Kot dji al ge Iwa Kerman Gamalyel we dji ge une kandja dji

33 Pita kandja embe djika, una kerman kambono kubene ke yeika ga to gopon we dji. 34 Parisi iwa kerman ta moi une kandjiye Gamalyel we dji. Une God loye dje awi una moi, alla una porapora une wopake pille awi. Iwa ge agle molo embe dji, ye Aposel kambono dje bekle worneke ege tuge ta molo alla djimbon we dji. 35 Dje bekle woro kermaka, une embe dji, Israel una ye mor ge, ye aposel kambono tambon dje yenj ge pillpol tane. 36 Ge kamasa iwa Teudas we dji ge une yene iwa kerman moyo dje, una 4 andret (400) dje i pakna wori. Ba una po Teudas to golmaka, une wombaye kambono seke po er djelldjell pi. Alla, une wal yeno dje pi ge yage kal toi. 37 Embe yeika alla are, gapman una kandjine boi poke ge, dumo Galili iwa Judas we dji ge wo djika, una merke i pakna woro po Rom una tambon dje yei. Ba una Judas para aike to golmaka yene wombaye seke er djelldjell pi. 38 Una wal embe yei ge pille, na ye kandja embe dje aundo, ye aposel kambono to nagoye. Kiwa moyebe! Ge aposel kambono kogo yenj ge makimb una nomane paro mal pille yei dal, kogo ge yage kal tonda, megye natonda. 39 Ba God dji po kogo embe yenj ge, ye kambono kamblo kal worne kune nayenda. Ye yenekne God boll kunda yene paro we dji.

Une kandja embe djika una kerman kambono pille kune we dji.
40 Aposel kambono alla dje i numog wori. Molmaka, ga djimaka una wo ka prangill iwo tomaka, una kerman kambono embe dji, ye Jisas kandjiye ge alla kaima nadjime! dji. Dje kere aposel kambono dje worma er pi. 41 Kot kerman yei al kere wo pille embe dji, yenj ge, ngandjill gopon mal pai ba God pora we dje pi al, Jisas kandjiye al nono tonj ge wo pirmon we dji. 42 Ege ege aposel kambono lotu numb kerman gull pakna yei al molo, una numbine al po, kandja wopake dje awo embe dji, God iwa ta dje worda wo ye i yem worda we dji ge, Jisas wale woi we dji.

Copyright information for `GAM