Acts 7

Kot kerman yei al ge Stipen kandja dje awi

Opa gale awi iwa kerman ge Stipen moi al embe dji, kambono kandja djinj ge kandja kaima djinj mo? Djika Stipen embe dji, nena, agana ye mor ge, na kandja djindo ge ye pillme! Nono gollne Abraam moi ge une dumo Aran namoi poke, une dumo Mesopotemia pa moi poke ge, God Iwa Kerman kupill al moro une Abraam moi al wo embe dji, Ni dumin ne, agan kambono kere, dumo gun ta na ni ombine dje auno al ge po mopen we dji. Kandja embe djika, Abraam dumo Kaldia kere, er dumo Aran pi. Po moika yene newoga goika, God alla djika une Aran kere, er Judia, ye ipon mor al ge woi. God Abraam moi al embe dji, na ni dumo ge nauno; dumo kembis ke pakna yero ge ni naimben ba are, dumo manda yero ge imbenka, ni womban gawan kambono are moye ge dumo ge i moye we dji. Une kandja embe dji ba Abraam ge wombaye ta namoi. God a  Abraam moi al kandja dje embe dji, ni womban gawan kambono are moye ge dumo djell ta yenda al po moye. Una mor ge wo ye, ye ke ye awo, to kaye worne. Kambono nune kogene paro ge ye po yeneke, kognumb po andret (400) mal embe wo er punda. Ba una ye to kaye woro, nu kogo djine una ge, na tano. Are ye dumo ge kere er wo orko po dumo manda yero al ge na kandjina amblo pla worne we dji. Asa God Abraam moi al embe dji, ye gaklene kelip taneke na nanam kandjina ni boll gopa to pagro mal una kanne we dji. Djika, Abraam warye Aisak moika ege 8-pela er wo pika, Abraam warye gakle kelip toi. Are, Aisak warye Jekop moi. Are Jekop wombaye kambono moi ge nono Juda una nane 12-pela moi b .

Ga moi ge yenekne agane Josep boll minj i awi. Josep una djell nune kogene yenda dje pille, age kambono ipo ku bolo i. Imaka una Josep to kaye to, i er dumo Isip pi. Ba God Josep ge nakeri. 10 Josep imb porapora kake moi ge God pak to awika, Josep nomane wopake paika, dumo Isip king iwa kerman kandjiye Paro we dji ge, une Josep kane wopake pille awi. King Paro Josep moi al embe dji, dumo Isip dumo porapora yero ge kantau yemben; na numbina gullna ni para aike kantau yemben we dji.

11 Are Isip ne, dumo Kanan yei al ge kam koll kerman yei. Nono nane kambono imb kerman kaki, kwa napai. 12 Embe yeika, Isip ge kwa paro we djimaka, Jekop pille no nane kambono dje worika er Isip pi. 13 Po kwa i er yem pi. Are dumo Isip alla kune soka pi. Pi ge, Josep yene moi mal megye dji, asa tormang yei ba age kambono alla womaka une embe dji, ye agane Josep we dji ge na wale moro we dji. Dji ge yene age kambono wo moi ge una djimaka iwa King ge pille kane yei. 14 Josep kandja sigye dje worika, yene newoga Jekop ne, yene epilye porapora moi ge er dumo Isip woi. Ga woi ge una 7-pela ten paip (75) pora moi. 15 Jekop Isip molo goika no nane kambono 12-pela moi ge para aike molo goi. 16 Kambono golo moi ge una i er yem dumo Sekem gull to mogi. Gull to mogi makimb ge kamasa Abraam ku silpa pende ipo iwa Amor warye kambono moi al awo i.

17 God Abraam boll kandja dje gopa to pagi mal megye tonda ege ge manda yeika, no Juda una dumo Isip mopin ge una merke kaima mopin. 18 Kune ge dumo Isip king gun ta moi ba, une Josep asa kogo yei mal nakani. 19 Une tagemage ye, no Juda una mopin al ye ke ye awo, ye wombane ta moye ge, to bekle woro to golme! dji. 20 Embe ye pumaka Mosis me ge une kui. God wopake kanika, Mosis epilye kambono to bekle nawori; ga numog molo womba kantau ye molmaka takene 3-pela wo er pi. 21 Pika ga womba Mosis i bekle wori moika, Isip king abore wo womba Mosis ge kani. Womba ge nanam wombana mal moya dje pille, ipo yene numbye al kantau yei. 22 Mosis kerman moika, Isip una nomane kerman pai una kandja dje beke aumaka, une kandja dongall dje awo, kogo dongall ye wani.

23 Une embe ye wanika, kognumb 4-pela ten (40) moi kune ge, yene age Juda una moi mal une kanno dje er pi. 24 Une po kani, Isip iwa ta ye molo Juda iwa ta toika soka kunda bolo mopill. Mopillka Mosis kane age pille to yem worika Isip iwa ge bolo goi. 25 Goika Mosis kane embe dje pi, God na dje wori na agana Juda una amblo pille dje aunaka ga kaye alla napane we dje kanne we dje Mosis embe pi ba une age Juda una embe napi. 26 Alla kam kumaike kana ge, Mosis wo kani Juda iwa soka yenekne kunda bolo mopill, Mosis kane abis yeno dje po embe dji, iwa soka, ye age age mormell, namba yei pille kunda bolo mormell ne? dji. 27 Kandja embe dji ba, age ta kunda kaki una ge une Mosis amblo pup to woro embe dji, una ne mal dji pille ni wo no boll iwa kerman molo kot piyo dje yenden? 28 Ina ni Isip iwa ge to gon alla ipon, ni para embe ye na to goyo dje yenden mo? dji. 29 Djika Mosis pille kand golo, dumo Isip kere, seke po er dumo Midian pi. Po molo ana ta ika yene warye soka mopill.

30 Kognumb 4-pela ten (40) er wo pika, Mosis po kamkimb Sainai dumo wapra yei al po kani, iko kembis ta wamo do pai. Do pai al ge tau agelo ta wo moika 31 Mosis kane aya dje, na kannoba dje pille manda pika, Iwa Kerman ge embe dji, 32 Mosis ni asa gollin una moi ge na kambono godne moro. Abraam ne, Aisak ne, Jekop godne na moro we dji. Djika Mosis gakle purpur djika, kake agle toika, kane koi worno dje yei ge keri, kand goi. 33 Iwa Kerman ge embe dji, makimb ni kamblo moren al ge, na djill mapill yei makimb yero. Ni kaken kau ge gulo i wore! 34 Isip una ye ke ye awinjka na unakna imb kake, kimb ye mor ge na kando. Na kal wo ga kaye pa mor ge i orko worno dje wondo we dji. Embe yei pille, ipon na ni dje dumo Isip wornaka ni er yem ben! we dji.

35 Asa Mosis age kambono une mop awo embe dji, una ne mal dji ni kandja kot pille, iwa kerman moyo dje yenden ne? dji. Dji ba iko kembis ta wamo do pai al ge God tau agelo wo embe dji, Mosis, Juda una mor ge ni kantau yemben. Ga kaye pa mor ge ni po i orko worben we dji. 36 Djika Mosis er dumo Isip po molo, Juda una kaye pa moi al ge une po dje i orko woro, wal ta mal ye, kogo dongall yei. Nu solwara Retsi une po kogo dongall ye, dumo wapra yei al Israel una kognumb 4-pela ten (40) er wo pi moi al ge, une po kogo dongall yei. 37 Mosis Israel una moi al po embe dji, God dje worda ye agane propet ta wonda, na moro mal embe moya we dji. 38 Israel una dumo wapra yei al molo wani ge, Mosis kambono boll aike wane, kamkimb Sainai ge Mosis er pla po moika, tau agelo ta wo une boll God lo dji pai mal nono imbon dje awi. Kandja ge una gun moye kandja pai.

39 Ba Mosis kandja dji ge nono nane mop awo, yenekne nomane paknato ge embe dje pi, nono er yem dumo Isip mopin al po moponba dje pi. 40 Ga Aron moi al embe dji, nono dumo Isip kaye papin ge Mosis wo nono i orko wori ba, ipon une er nam kond pundo ne? Une er pi al ge nono nakanmon. Ge pille, ni god kende pende ye bekbenka ga er wekle po kondwe bon al nono ombine dje aune we dji. 41 Kandja embe dji mal pille, kambono god kende ta beke yei. Kog kau wombe mal embe pai. Paika, kambono wal opa iwo gale awo, yenekne aglene al ye beki wal ge kane wo pille yei. 42 Kambono embe yemaka, God mop awo embe dji, olpa ne, takne ne, kam kandjip ne, moro ge, ye amblo pla worbon dje yene ge, pora, yeme! dji. God kandja embe djika, propet ga pepa are bolo embe dji,

Israel una ye mor ge, ye kognumb 4-pela ten (40) dumo wapra yei al molo wani ge,
ye na we dje pille kog kau to opa gale awi mo?
43 Ge man, ye embe nayei. Sel lotu numb take sellke i ye wani al ge, ye numog po na kandjina amblo pla nawori.
Ye god kende Molek pille pla yei.
Ye god kende Repan une kam kandjip moi mal ye beke i wani
ye god kende ye beke ye ga kandjine ge amblo pla wori.
Ye una embe yenj ge pille, na ye to wornaka, ye er ellke po dumo kerman Babilon kola to pine we dje propet pepa embe boi.
44 No nane kambono dumo wapra yei al pi ge God sel lotu numb boll i wani. Sel lotu numb yene su ye pai mal ge God ombine dje Mosis awika Mosis pille pai mal ye beki. 45 Are God welke po epil djell boll kunda boika, Josua nono nane kambono boll are wo kunda ye makimb yero ge i. I ge God sel numb boll aike i wani. Alla, sel numb ge molo pa yeika are King Depit 46 God une wopake pille awi una moi. Une kamang embe yei, God, na ni pille lotu numb ta take aunaka, Jekop wombaye wo ni kandjin amblo pla woro aune we dji. 47 Depit kandja embe dji ba yene warye Solomon wo lotu numb ge take awi. 48 Soloman God numbye take awi ba, una numb takinj mal embe ge God pla kaima moro una ge une gale naparo. God embe yendo ge propet asa pepa bolo embe dji,

49 Kupill paro ge na sia king dal embe paro,
makimb paro ge na kakena wordo al yero.
Embe yero ge, ye na numb ta take aune ge kune nayendo.
Ye numb takneke na wo waka moyo ge kokas kulo moyo.
50 Ge man, kupill makimb porapora yero ge na beke worill yero
Aisaia 66.1-2
we dje God embe dji.
51 Stipen kandja dje una moi al awo embe dji, ye kandja napir una mor! Ye ellne tukne ne, nomane God nawinj, ye una orko mal embe mor. God Murble moro ge kandja djika, ye nane kambono mop awi mal ye para embe yenj. 52 Ye nane kambono po propet porapora ye ke ye awi. God dje worda iwa wopake uro kaima ta are wonda we dji iwa propet kambono ge ye nane kambono po ga to goi. Alla, iwa wonda we dji ge kaima woi ba, ye ipo kunda yem una aumaka to goi. 53 Tau agelo kambono wo God kandjiye lo pai mal dje ye awi ba ye dji mal nayei we dji.

Una Stipen ku to goi

54 Stipen kandja embe djika, iwa kerman kambono ellne kerman kumbsika kasmane kogi. 55 Ba, Stipen ge God Murble une boll moika, kane pla woro kani, God moi al au djika, Jisas God agle woto aglo moi. 56 Une kane embe dji, ye kanme! Na kanill, kupill al au djika, God agle woto Una Wombe aglo moro. 57 Stipen kandja embe djika, una kamalne amblo bi dje molo, yau kerman to muk dje po Stipen Jerusalem pakna moi al amblo ngundjo, 58 i orko woro, ku to gopon dje yei. Kune ge, ga yenekne kon momo wori ge gulo ipo iwa komdill ta kake al wori yei. Iwa ge kandjiye Sol.

59 Ku to pa molmaka, Stipen kamang ye awo embe dji, Iwa Kerman Jisas, ni na nomana iye dji. 60 Yene yage kake gopye boglo, yau kerman to embe dji, Iwa Kerman, ga singare ke yenj ge ni kere awe! Une kandja embe dje kere goi.

Copyright information for `GAM