Acts 8

Una Stipen to golmaka,Sol kane, pora to gor dje pi.

Sol po una pillgi dji una ye ke ye awi

Kune ge una po Jisas pillgi dji una Jerusalem moi al tomaka, seke er djelldjell pi. Pende er distrik Judia pakna ge pumaka, pende er distrik Samaria pi. Ba, aposel kambono Jerusalem molo pai.
Stipen golo pai ge una God pille pla yei una wo kimb kerman ye molo ipo gull toi. Embe yei ba Sol po Jisas pillgi dji una moi al tano dje yei. Une numb ta po, ta po, iwana amblo ngujo ipo, kaye numb woro embe yei.

Pillgi dji una er dumo Samaria po Jisas kandjiye dje una awi

Dumo Jerusalem kere seke po moi una ge, dumo porapora pi al God kandjiye dje una awi. Iwa Pilip er dumo Samaria po Krais
Una Grik kandjine pall ge Krais we djinj, Juda una kandjine pall ge Mesaia we djinj
kandjiyembe to una awi.
Une po kandja dje, kogo dongall ye moi mal ge, una kane pille pille moi. Pilip po kandja djika, kum ke una merke tukne al moi ge pille yau kerman to er orko pi. Una kakene aglene goi una ge alla aglo er wo gun pi. Wal embe yeika dumo Samaria una kane wo kerman pi.

Kune ge iwa Saimon we dji ta moi. Une ge dumo Samaria una moi al kudja ye wanika, una kane aya dje pi. Na una kerman moro we dje wani. 10 Una kerman ne, una kandjine napai una porapora pupon dje embe dji, God yembe dongall paro we djinj mal ge Saimon boll embe paro we dji. 11 Ege ege une po kudja embe eri ye wanika, una kane aya dje pille, une kandja dji mal ge kambono pille kane yei. 12 Una embe ye moi ba Pilip wo God dumoye kantau yendo kandja wopake ge djika, una iwana porapora Jisas boll pillgi dje, nu pai. 13 Saimon yene pillgi dje molo, nu pai. Pilip wani al Saimon para aike wani. Pilip po kogo dongall ye, wal ta mal ye moi ge Saimon kane aya dji.

14 Samaria una God kandjiye pillgi dji we djimaka, aposel ga Jerusalem moi ge pille, Pita ne Jon dje wormaka, soka er dumo Samaria pupill. 15 Soka po pillau dje pagle Samaria una God Murble ine dje pille kamang yepill. 16 Soka yepill ge, God Murble moi ge Samaria una moi al nawoi. Kiwa, Samaria una Iwa Kerman Jisas kandjiye al nu pai; God Murble ga boll namoi. 17 Soka kamang embe mal ye kere, Samaria una moi al aglene pla woro abpillka, ga God Murble ge i.

18 Soka aglene pla woro God Murble er kal woi mal ge, Saimon kane ku iwa soka auno dje ye embe dji, 19 ye yembene paro mal embe ye na aumbellka, na una moye al po aglena woro abiyaka, God Murble ge ine we dji.

20 Djika, Pita embe dji, ni nenem kuin ge boll golo er take dje bell! God Murble ge nono kiwa aundo ba, ni ku awo ino we djinden ge kune nayendo. 21 God nale al ni nomanin ke paro ge kune nayendo. Ni no boll kogo aike yembon ge kune nayendo. 22 Ni nomanin ke paro ge kere, Iwa Kerman boll kamang yembenka, ni nomanin ke pai ge une kere aunda manda. 23 Ge na kando, ni una boll minj i, djingjang boll kaye pa moren we dji.

24 Pita kandja embe djika, Saimon embe dji, ye Iwa Kerman moro al kamang ye, wal na boll wonda we djinmell ge nawonda we dji.

25 Pita ne Jon Samaria molo God soka aglene al kogo yei mal dje una awo, God kandjiye dje awo embe yepill. Dje kere, soka er Samaria dumo kerker yei al po Jisas kandjiyembe wopake dje una awo kere, are er Jerusalem pupill.

Dumo Ityopia iwa ta moi ge Pilip kandja mambine dje awi

26 Kune ge Iwa Kerman tau agelo ta Pilip moi al wo embe dji, ni aglo er dumo wapra yei al dumo Jerusalem kere er Gasa pinj kondwe ge, po mole! dji. 27 Djika, Pilip po kondwe tambye kani iwa ta moi. Iwa ge dumo kerman Ityopia iwa kerman moi. Dumo Ityopia kantau yei ana kerman kandjiye Kandasi ana ge, yene kuye porapora moi ge une kantau yei. Une ge Jerusalem po God kandjiye amblo pla woro pagle, alla er yem yene dumoye al puno dje pi. 28 Une yene karye kog os ngujo i pi al ge, une er pakna po ami dje molo propet Aisaia God kandjiye buk al bolo wori pai ge une kere kane embe ye moi. 29 Kar ge er po moika, God Murble wo Pilip moi al embe dji, kar pundo al ge, ni para une boll aike piye! dji. 30 Djika Pilip muk dje po manda molo pi, iwa ge propet Aisaia pepa boi mal kere moi. Moika Pilip embe dji, ni pepa kere moren ge ni pille kune yenden mo man ne? dji. 31 Ityopia iwa ge embe dji, na namba mal piyo? Na kandja beke aune una ta namor. Ni pla wombenka nono aike mopoll we dji. Pilip er pla pika soka aike mopill.

32 Tambye ta Baibel al kandja dje bolo wori pai une kere kani ge embe dji,

Sipsip kandja nadjinj, una to nambon dje i er pinj mal une embe molo kandja ta nadji.
Sipsip wombe kandja nadjinjka una ene balo i worinj mal ge, une embe molo kandja nadjika una wo i er pi.
33 Una bakalo awo, ipo kandja kot kende dje awi.
Une wombaye ta namoya. Yene wombaye ge embe mal mor we dje una kandja embe djine ba, una wo une to golo pagi ge une wombaye ta namoi
Aisaia 53.7,8
we dje Baibel kandja embe dji.
34 Iwa ge Pilip moi al embe dji, ni djye! Propet pepa boi iwa ge, une yene pille pepa boi mo, mo iwa djell ta pille pepa boi ne? dji. 35 Djika Pilip propet Aisaia pepa manda boi ge dje iwa ge awo pagle, Jisas kandjiyembe wopake pai ge dje awi.

36 Iwa soka embe dje kondwe po kanpill, nu erim ta moi. Ityopia iwa ge embe dji, nu paro, kane! Ni na nu pagle aumbenba! dji. 38 Iwa ge kandja embe dje pagle, yene karye abi iwa ta moi al ge une, ni kar ba able! dji. Embe djika kar ge po paika, soka er kal po nu erim moi al ge pupill. Pupillka, Pilip iwa ge nu pagle awi. 39 Awo kerika soka kere er orko wopillka, God Murble wo Pilip dje i er pi. Ityopia iwa Pilip alla nakani, er take dje pi pai. Nakane molo, une wo pille kondwe er puno dje pi al ge alla er pi. 40 Pilip po kani, une dumo Asdot pakna moi. Molo dumo porapora po Jisas kandjiyembe wopake dje una awo wane molo, dumo Sisaria po pillau dji.

Copyright information for `GAM