Colossians 1

Na Pol, God nomane pai mal pille, na dje worika Krais Jisas aposelye moro. Ye God unakye pillgi djinj una dumo Kolosi mor ge, nono agane Timoti boll pepa bolo ye aunmoll. God nono Nane wandill golo aundaka, ye ellne tukne arngan yenda moye.

Kolosi una pillgi dji

No soka kamang yenmoll kune, nono Iwa Kerman Jisas Krais Ne moro al ge, no ege ege wopake we dje awo, ye pille kamang ye aunmoll. No kamang embe yenmoll ge me embe paro. Una dji pupill, ye Krais Jisas boll pillgi dje, God unakye porapora kane wopake kaninj. Ye embe yenj ge, God wal wopake ye ine dje kupill al wori yero ge, ye imbon dje pille kui ye mor. Ye asa Jisas kandjiyembe wopake kaima pai pillgi dji poke, ye wal wopake ge pille kui ye moi, ipon ye pa mor. Jisas kandjiyembe wopake ye pillgi dji ge, una dumo yemyem kandja ge dje wani al, una merke pillgi dje singare wopake pai al karkar yenj. Yenj mal ye embe yei, asa God djingdjang pai una wandill golo awi ge kandja kaima pai we djimaka ye pillgi dji, ipon dje pa mor. God kandjiyembe wopake pai ge, no wopake kanmon iwa Epapras wo ye beke awi. Une no boll kogo taimane ye, ye boll kogo ye awo, Krais kogoye wopake yendo iwa. Alla, God Murble ye worika, ye una boll wopake kaninj ge, Epapras wo no kandjambe to awi pupin.

Kolosi una aglo gi dje moye dje Pol kamang yei

Embe pille, asa una wo kandja ge dje no awi pupill ge, no ege ege ye pille kamang ye pa mormoll. God Murble ye wordaka, ye nomane wopake pandaka, ye wal pille kane ye, God ye yene dje pro mal, pille kane yene. 10 Ye embe yei dal, Iwa Kerman unakye singare yene mal ye embe ye moye. Iwa Kerman wopake pro mal ge ye embe eri pille ami dje moye. Ye kogo wopake eri ye moyeke megye wopake to pandaka, ye God pille kane yenj ge ye yake pa moye dje no kamang embe yenmoll. 11 God yembe dongall wopake une boll paro ge ye boll panda, ye moye al imb ta pai dal, ye kiye dje molo kakne. Yene unakye dumo au djindo al mor ge, wal wopake ine mal, God Nane ye kapla mor we djindaka, ye para aike ine. Ine pille, ye wo pille wopake we dje Nane God aune. 13 Emill nono kantau yei mopin ba, une nono i woro awo, yene wariye wopake kani iwa dumoye kantau yero al ge, une nono i pakna wori mormon. 14 Warye ge nono top to i yem woro, nono singare ke yepin ge une pille kere awi.

Krais er welke po pla kaima moro

15 Nono God kanbon naparo ba, wariye ge yene moro mal embe moro. Une asamoll moi, er welke po wal porapora beki yei ge kantau yendo. 16 Kupill makimb wal porapora beki yei ge wariye agle al beki yei. Wal kanmon ne, nakanmon, tau agelo dongall ne, kupill al wal dongall mor ge ne, wal yembe paro ge ne, kandjine paro wal ge, God yene wariye pille, wariye agle al wal porapora ge beki. 17 Wal porapora nayei kune ge wariye ge asamoll moi. Wal kayekaye porapora mor ge une kantau yendaka, kogone paro mal yenj. 18 Pillgi pai una mor ge wariye gakle paro mal embe mor, une ga ngambalne molo, yene me mambine molo, una goi mor al une asamoll aglo er wo gun pi. Embe pille, wal porapora paro ge une wal ne moro. 19 God nomane pai ge, yene elle tukye nomane porapora wariye to puka to awi. 20 Wariye kogo yei al ge God wal porapora une boll ellke ellke moi ge i taimane wori, arngan yei. Ga makimb al moye mo kupill al molo God boll kunda yene ge, God wariye iko pera al goi meyamye toi al ge, kumbene er kal pi pora dji.

21 Asa ye nomane ke pa singare ke yei ge, ye God boll kunda ye djelldjell molo pai. 22 Ba alla ipon, yene wariye una gaklene mal embe i goi ge, ye God boll i taimane wori. God nale al wambo napanda, me ye boll napanda, ye kiwa moye dje une i taimane wori. 23 Ba God kandjiyembe wopake una dje awi ge, ye nakerne. Ye pillgi dje kui ye pa moye. Una dumo yemyem po God kandjiyembe wopake dje una awo wani ge ye pi. Alla, na Pol, na kandja ge dje aundo iwa moro.

Pol Kolosi una pille kogo yendo

24 Na ye pille imb kakdo ge na wo pro. Alla, una pillgi pai una Krais gakle mor ge, une ga pille imb kake pora nadji. Imb tuge ta pai ge na pillgi pai una pille kake i po ye kune yeno dje yendo. 25 God yene dji, Krais boll pillgi dji una mor ge, na ga kogone una moro. God na dje wori ye God kandjiye porapora dje auno dje yendo. 26 Kamasa God kandjiye seke wori yei, una nakani. Ba ipon i pene wori, God unakye kaninj. 27 God nomane pai ge embe pai, kandja seke pai ge yene unakye moi al i pene worna kanne we dji. Kandja ge wopake kaima paro, una porapora pille wopake moye. Kandja seke pai me ge embe paro, ye epil djell una Krais boll mor ge, ye para kupill al po God boll wopake moye. 28 Embe pille, no Krais ye wani mal dje una aunmon. No nomane wopake paro ge, Krais kandjiye beke, kandja dongall dje awo, God nale al Krais epilye molo pora djine dje beke aunmon. 29 Embe pille, Krais yembe dongall awi al ge, Krais epilye una God nale al kune moye dje na kogo sipje ye pa moro.

Copyright information for `GAM