Galatians 1

Na aposel Pol. Na pillgi djinj una na boll aike mor ge, no pepa bolo ye propins Galesia pillgi djinj una mor al awo wornmon. Una dje wormaka na wo Jisas kandjiye dje nawill, una ta dje worika na wo kogo nayell, man. Jisas Krais yene yeika, nono Nane God une golo pai i gun wori iwa ge yeika, soka dje worpill na wo kogo yell.

God nono Nane ne, Iwa Kerman Jisas Krais soka ye mor al wandill golo aumbellka, ye ellne tukne arngan yenda molme! Nono Nane God kandja dji mal pille, Krais makimb una singare ke yenj al nono i yem worno dje pille singare ke yepin ge pille goi. Yei ge ege ege God kandjiye kerman pandambe! Kaima.

Jisas kandjiyembe wopake ge taimane yero, ta naparo

Ye yenj ge na aya dje pille gok djindo. Krais wandill golo awi al ge God ye dje i mor. Ba ye mop awo, Jisas kandjiyembe gun djell ta ola dje pupon dje yenj. Jisas kandjiyembe wopake asa pai ge ye keri. Ba Jisas kandjiyembe wopake gun ta naparo, man. Una pende wo Krais kandjiyembe wopake we djinj ge kandja kende dje pakna woro, ye nomane ye ke ye aumbon dje yenj. Asa no ye moi al wo Krais kandjiyembe wopake dume dje, dje aupin. Ba alla are, no wo ye moye al kandja wopake gun ta dje ye aumbon mo, tau agelo ta wo embe djinda ge na man djindo. Una wo embe yene ge God i wamo al worda dje na kandja embe djindo. Asa no kandja djipin mal ipon no kandja ge alla dje ye aunmon. Asa no ye moi al wo Jisas kandjiyembe wopake dje ye aupin ba are no wombon mo, una djell ta wo kandja ge kere, alla kandja gun djell ta dje aupin dal, na man djino. God mangal to awo i wamo al worda dje na embe djindo.

10 Na kandja embe djindo ge una na wopake pille aune dje djindo mo? Mo, una na wopake kanne dje djindo? Ge man. Na God wopake pille aunda dje yendo. Na makimb al una na wopake pille aune dje kogo yellka, na Krais boiye moro ge kune nayeika.

God dji Pol wo aposel kogo yei

11 Agana ambana kambono ye pir mo? Na Jisas kandjiyembe wopake dje awill ge, una kandjine man. 12 Kandja ge una ta na dje nawi, una na beke nawi, man. Kandja ge Jisas Krais yene ombine dje awika na pille wo djill.

13 Asa ye kani, Juda una yenekne lotu ye wani mal na yembe ye wanill. God boll pillgi dji una moi al na po amblo ye ke ye awo, to goyo dje yell. 14 Juda una na iwa kune kambono moi ge, na yembe ye wo er wekle kaima pill. No Juda una gollne lo amblo i wani mal ge, na dume dje yeno dje pille pla kaima ye wanill. 15 Ba alla na mana nakwi poke ge, God na dje i, are une wandill golo awo yau toika na yene wombaye moll. Une embe yei ge 16 epil djell una moye al na po Jisas kandjiyembe wopake dje auno dje pille, yene wariye kaima moi mal une wo pille na ombine dje awi. Une kandja ge dji kune na po una boll dje napill. 17 Una kogo aposel asamoll ye moi kambono kona Jerusalem moi ge na po nakanill, man. Na asamoll ola dje er propins Arebia pill. Are na er dumo Damaskus pill.

18 Po wane mollka, kognumb 3-pela er wo pika, na Pita kanno dje pille er Jerusalem pill. Na une boll aike ege 15-pela mopill. 19 Aposel ta kanill ge Iwa Kerman Jisas age Jems kanill, aposel pende moi ge na nakanill. 20 Na kandja ipon dje ye aundo ge, na kandja kaima djindo, kende nadjindo, God kando.

21 Are na po propins soka Siria ne, Silisia po wanill. 22 Ba Krais boll pillgi dji una distrik Judia lotu numb djell djell moi ge, na gumana djillakena pille kane nayei. 23 Una kandjambe to embe dji, asa iwa ta po pillgi dji una moi al ye ke ye awo wani iwa ge, une nomane ake toi, une asa kandja ge dje kamblo kal worno dje yei ba alla, ipon une kandja ge dje una awo wando we dji. 24 Kambono pille na kogo embe yell ge God kandjiye ge amblo pla woro awi.

Copyright information for `GAM