c21.23

Galatians 3

Una pillgi djine mo lo karkar yene?

Ye dumo Galesia una nomane dall kaima paro. Asa no ye moi al wo, Jisas Krais iko pera al goi ge no kandja dje pene worpin ye pi, ba alla ipon una ne mal wo ye nomane amblo kull wori ne? Ye pir mo? Na kandja ta paro ge na ye dje piyo. God Murble ye moi al woi ge, no God kandjiye dje aupin ye pillgi dji al ge, une ye moi al woi mo? Mo ye kandja lo dji mal yembe yembon dje yei al ge une ye moi al woi? Ge man! Ye nomane dall kaima paro. Ye kindja wani ge, ye God Murble Jisas boll aike wani, ba ipon ye God murble kere, ye yene yembene al Krais boll aike molo pora djimbon dje pille yenj ge, ale yenj. Ye pille kane yene, asa ye Jisas kandjiye al imb kake molo woi ge kiwa po djinda dje pille na djindo. God Murble ye boll aundo ge ne, une ye boll kogo dongall yendo mal ge, ye kandja lo yembe yei pille une ge nayendo, man. No wo God kandjiye dje aupin, ye pillgi dji pille une ye boll kogo yendo.

Nono Abraam asa yei mal pupon. God kandja dji al ge Abraam pillgi dji pille, une God nale al kiwa moi (Stat 15:6). Abraam embe yei ge, ye embe dje kanne. Una God kandjiye pillgi djine panda, ga porapora moye ge, Abraam wombaye moye. Kamasa God embe dje kani, yene kandja djinda mal epil djell una pillgi djineke, yene nale al kiwa moye. God embe dje kani pille, kandja Baibel al bolo wori pai ge embe dji,

Abraam! Ni gawan ta kogo yenda al ge, na una djell porapora ye wopake ye auna moye we dji.
God kandja dji Abraam pillgi dji mal ge, una pillgi embe dji dal, God Abraam ye wopake ye awi mal embe, une kambono ge ye wopake ye aunda eri.

10 Una kandja lo bolo wori pai mal ge nono ye kune yembona, God nale al kiwa mopon we dje kaninj una porapora moye ge, God to ke ye aunda. Une embe yenda ge Baibel al kandja ta bolo wori pai ge embe djindo.

Una kandja lo porapora bolo wori pai mal ye kune nayei dal, God to ke ye aunda we dji. (Lo 27.26)
11 Baibel al pai ge kandja ta bolo wori pai ge embe djindo.

Kambono God nale al kiwa wanmoye una ge, God kandjiye pillgi dje moye pille God nale al kiwa wanmoye we dji.
Baibel kandja embe djindo pille, nono embe dje kanmon. Una lo ye kune yembona, no God nale al kiwa mopon dje yene ge ale yene.
12 Pillgi paro ge me ta paro. Una kandja lo pille wanmoye ge me djell ta paro. Kandja lo paro al ge embe djindo, ni ye kune ye pagle alla ale nayen dal gun molo pamben we dji.
Pris 18.5


13 Baibel al kandja embe bolo wori pai ba alla, una lo pora pora pai ge, ye kune yembon dje yei, man pai pille, God tonda mal mopin. Ba alla God Krais toi al ge, Krais nono i yem woro awi, God natonda mormon. Ge kandja Baibel al ta pai ge embe djindo.

Una porapora iko al gor ge God toi pille iko al gor. c 
14 God nono tonda mopin ba alla, Krais Jisas wo nono top to i yem woro awi al ge, wal wopake God Abraam auno we dji wal ge, une para epil djell una auno dje yei. Une embe yei ge nono porapora Krais kandjiye al pillgi djipin dal, God Murble dje worno we dji ge dje wordaka nono boll wonda.

God kandja asamoll dje wori yei, Mosis lo are dji

15 Agana ambana kambono! Una singare ege ege yenj mal ge na kandja su ye dje auno. Una soka aglene amblo kandja dje gopa topill dal, kandja djinmell kandja ge kaima panda. Una ta wo kandja gun ta dje pakna worbon dje yene ge, kune nayenda. 16 Kune nayenda mal embe ge, kamasa God wo Abraam moi al kandja dji mal ge kaima pai, kandja gun ta panda ge kune nayenda. God kandja dji ge une Abraam pille, Abraam wombaye pille kandja embe dje awi. Ba Abraam wombaye we dje God kandja embe dji ge, Abraam wombaye merke moye ge une pille nadji. Abraam wombaye taimanta are moya iwa ge pille dji. Ge Krais. 17 Na kandja me djino dje yendo ge embe. God Abraam boll kandja dje gopa to awi mal ge kandja asamoll dje awi. Are kognumb po andret tripela ten (430) wo er pika, Mosis kandja lo ge bolo pagi. Ba Mosis lo ye molo God Abraam kandja dje wori yei ge i worda kune nayenda. God Abraam kandja asamoll dje awi ge ye panda. 18 Mo ye napanda ge, kandja lo yembe yembona, God wal auno dje pille yei wal ge nono aunda mal panda. Ba ge man, Abraam wal i ge God Abraam boll kandja dje wori yei al ge i.

19 Embe yei pille, God nomane namba mal pai pille Mosis kandja lo dje pepa bolo pagi ne? God nomane ge embe mal pai. Asa una singare ke mo wopake yei ge pillpol natoi. Ge pille, ga pille kane yene dje pille, Mosis lo ge bolo pagi. Kambono lo ge karkar ye molo pineke, are God Abraam na womba ta aunaka wonda we dji una ge wonda poke, lo pai ge alla kogo nayenda. Nayenda ge God Abraam moi al kandja dji ge une kandja sigye dje nawori. Une yene po Abraam gume al ge kandja dji. Ba une lo dje Mosis awi ge une asamoll tau agelo kambono dje awi, tau agelo po iwa Mosis dje aumaka, Mosis pille po Juda una dje awi.

Kandja lo me ge ye molo nono kantau ye ipo Krais boll worda

21 Yei mal ge, Mosis kandja lo ge, God kandja dje Abraam awi ge kamblo kal worno dje yenda mo? Ge man! Nono lo taimanta ye kune ye wo er gun bon kune paika, kam asa nono lo ge ye kune ye pagle, God nale al kiwa mopinka. 22 Ba God nale al kiwa namormon mal ge, Baibel al kandja embe bolo wori paro,

Una kuruwo kama porapora makimb al mor ge, singare ke ye waninj al, kaye pa mor we dji.
Ba God wal ta auno we dji ge, una Jisas Krais boll pillgi dji dal, er orko wo ine we dji.

23 Nono pillgi nadjipin poke ge, kandja lo ge nono kaye to wori mopin, are pillgi djimbon me ge, er pene wonda paro. 24 Embe pille, nono pillgi dje molo God nale al kiwa mopon dje pille, kandja lo asa pai ge nono kantau ye dje ipo Krais moi al wori. 25 Ipon nono Krais boll pillgi djipin al ge, lo nono kantau yei pora dji, alla nayenda.

Nono God wombaye mopon

26 Ye porapora Krais Jisas boll pillgi dje mor ge, God wombaye mor. 27 Une kandjiye al nu pai una ye porapora mor ge, ye Krais i konkunom dal woro mor. 28 Una ye mor ge, pende Juda una morka, pende Grik una morka, pende kaye pa boi kogo yenjka, pende boi kogo nayenjka, iwa pende morka, ana pende morka, ye embe ye djelldjell mor ba alla ipon ye Krais Jisas boll aike mor ge, ye kune kune mal embe mor. 29 Ye Krais wombaye moye ge, ye Abraam wombaye moye eri. Embe pille, God Abraam moi al wal ta auno we dje awi wal ge, God ye aunda eri.

Copyright information for `GAM