Galatians 4

Krais kogo yei al ge nono God wombaye mormon, kaye pa boi kogo alla nayembon

Na kandja djino dje yendo ge embe mal paro. Una ta moya ge yene wal kane nondo wal ge yene wombaye ge are inda. Wal porapora yenda ge yene wombaye waleye mal embe yenda ba une womba moro pille, une nu kogo yenda. Womba ne ge dje wordaka, una pende wo womba kantau yene. Ye moyeke womba ge yake pla wondaka, are ne ege ta djindaka, kambono alla kantau nayene. Yendo mal embe, nono womba mal embe mopin poke, makimb al lo kayekaye pai ge nono kaye to wormaka mopin. Ba alla, God dji poke, yene wariye dje wori woi. Une woi ge, ana ta kui, Mosis loye ge une menameto moi. Molo nono kandja lo menameto molo kaye papin ge, wo nono i orko woro God wombaye mopon dje pille top to i.

Ye God wombaye kaima moi pille, une dje wori yene wariye Murble wo nono nomane al woi moro pille nono kandja embe djinmon, nena, nena we djinmon. Embe yei ge ye kaye pa boi kogo yei ge yei pora dji. Ipon ye God wombaye kaima mor, God wal paro ge ye wal paro.

Pol Galesia una pille nomane toi

Asa ye God pille kane nayei poke ge, ye God pille pla yembon dje yei ge kune nayei. Ye god kende pille kaye pa molo boi kogo yei. Ba alla ipon ye God kaninj poke ge, (mo God ye kando we djino ge), makimb al lo kayekaye pai ge ye pille pla ye, kaye pa boi kogo ye, God kerbon dje yenj ge kerme! 10 Lotu ege kerman ta yero kune ne, takene kindja ta wondo poke ne, kognumb gun ta wondo poke ge, ye lotu ye awo, lo pille we ye pagle, God nale al kiwa mopon dje yenj ge 11 na kand goro. Na ye boll kogo yell ge, kiwa po djinda dje pille na kamalna yendo.

12 Agana ambana kambono na kandja dongall dje ye aundo, ye lo asa menameto namoi mal ge na para menameto namoro, na embe moro ge, ye alla menameto namoye. Ye na ye ke ye nawi. 13 Ye kaninj. Asa na ye moi al wo Jisas kandjiyembe kindja djino dje yell ge na ke to paika na ye dje awill. 14 Alla na ke to pai ge, ye imb kerman kaki, ye ke kane, kerne mal pai ba ye na nakeri. Na tau agelo mal embe moll dje ye embe kani. Krais Jisas moi mal na embe moro dje kane, djembon to awo, i numog woro embe ye na wopake pille awi. 15 Na ye moi al woll ge nono wo pille mopin, na kandja kaima djindo, kune ge ye nalene i worne kune yeika ye polo i na aumaka, ba ipon ge ye wo napir. 16 Na wo kandja kaima dje ye awill ge, Pol no kunda yem una moro dje ye embe dje kaninj kana.

17 Pir mo? Una pende ye mor al wo ye wopake moye dje pille yenj ba kandja kende djinj. Ye wopake moye dje pille nadjinj. Ye no kere pagle, kambono kandja djinj ge pille we yene dje pille, ga nomane embe mal paro. 18 Ye wal ta pille we yene ge wambo naparo. Ba ye wal wopake pille we yene, wal ke pille we nayene. Alla na ye boll namoyo poke ge, ye wal wopake pille awo pa moye mal.

19 Na wombana wopake ye mor ge! Ye Krais boll kaima karkar yene mal pille kane yene dje pille, na imb kerman kakdo. Ana womba kuyo dje ngembill kerman goro mal na imb embe kakdo. 20 Na wo ye boll aike moyo dje pille we kaima yendo. Na ye boll moyo ge, na kandja kosill dje ye auno ba, ipon na kandja dongall dje pepa bolo ye aundo ge, na ye pille nomana merke paraka bolo aundo.

Ana soka Sara ne, Agar yepill mal Pol kandja su djindo

21 Kandja lo bolo wori pai ge ye ye kune yembon dje pille yenj ba alla, kandja lo me ge ye kere nakani kana. 22 Baibel kandja dje bolo pagi ge embe mal pai. Abraam wariye soka mopill. Ta yene boi ana Agar ge kane noi, ta Sara boi kogo nayei ana ge kane noika yepill. 23 Boi ana Agar wariye kui ge ana wombane yene kulo ye mor mal ge womba embe moi ba alla, Sara boi kogo nayei ana wariye kui ge, God kandja dje wori pai mal pille womba ge moi.

24 Kamasa God kandja gopa soka to pagi ge ana soka yepill ge su mal paro. Gopa ta, God kamkimb Sainai molo Mosis kandja dje awi ge, ana Agar ge su embe paro. Agar yene wombaye boll kaye pa boi kogo yepill mal una embe mal moye. 25 Ana Agar ge une kamkimb Sainai dumo Arebia yei al ge embe mal moi. Alla Jerusalem una wombane boll aike kandja lo ge menameto molo, kaye pa, boi kogo yenj pille, ana Agar ge Jerusalem mal embe moro. 26 Ba alla Jerusalem kupill al yero dumo ge, una pakna molo kaye napar, kiwa mor. Kupill al Jerusalem yero ge nonekne mane mal embe yero. 27 Yero ge Baibel al kandja ta bolo wori pai ge embe djindo.

Ana womba ta nakuren ge ni wo pupen!
Ni womban kuyo dje pille ngembill nagon mal ge, ni wo pupen, duso dje, yau to mole!
Ana ta woge boll moya ge wombane merke namoye ba ni womban merke kaima moye we dji.
54.1

28 Agana ambana kambono! God kandja dje gopa toika womba Aisak moi mal ge, God kandja djika ye une wombaye moi. 29 Alla kaye pa boi kogo ana wombaye taimanta moi ge, une wo womba Aisak God Murble kui womba ge ye ke ye awi. Ye ke ye awi mal ge, ipon una kandja lo menameto mor una wo God Murble kui una ye ke ye awinj. 30 Ba alla, Baibel kandja embe dje bolo wori pai.

Ana kaye pa boi kogo yendo ana yene wombaye boll dje bekle wore! dji. Womba ne goyaka, womba ge wal nainda, man. Ana boi kogo nayendo wariye ge wal inda we dji.
21.10

31 Agana ambana kambono! Baibel kandja embe dje wori pai pille, ana lo menameto molo yei ana ge nono mane man. Ana boi kogo nayei ana ge nono mane moro.

Copyright information for `GAM