John 1

God kandjiye ge er wo una kulo po no boll aike moi

Kamasa kaima kupill makimb nayei poke, God kandjiye asamoll pai. Kandja ge God boll aike yeika, kandja ge God yene moi. Kamasa ke kandja ge God boll aike yei. God yene kandjiye al wal porapora beke yei. Wal moi ge kondwe djell ta nayei, kandja ge yene djika wal moi. Una gun moye ge kandja ge yendaka una gun moye. Kandja ge wamo suwa gale aundaka, una nomane al au djinda. Kandja ge wamo suwa gale iwdaka, emill ye paro al do au djinda. Emill yendo ge to gomgno dje yendo ba man paro, wamo ge do au dje pa moro.

Kune ge God dje worika iwa Jon ge woi. Une kandja dje pene worno dje wo embe dji, iwa ta wamo suwa gale iwda iwa ta wonda, ye une ge boll pillgi djime! dji. Jon woi ge iwa ta wamo suwa gale amblo iwda iwa ge une wale nawoi. Wamo suwa kogo yenda mal une kandja dje pene worno dje pille woi. Una porapora makimb al mor ge, kandja ge wamo suwa gale iwo, una nomane amblo au dje aunda iwa ge kaima woi.

10 Kandja ge makimb beke yei ba, makimb al woika makimb una kanpol natoi. 11 Yene unakye moi al woi ba, kambono dje i numog nawori, djembon to nawi. 12 Ba una dje i numog wori una moi ge ne, une kandjiye pillgi dji una moi al ge, une kune we dji, ga God wombaye moi. 13 Kambono God wombaye moi ge iwana wombane kur mal ge embe namoi. Una nomane paro mal pille wombane kur mal ge embe namoi. Ana woge woga boll nomane paro mal pille womba kurmell mal ge kambono ge embe namoi, man. God yene kuika ga God wombaye moi.

14 God kandjiye ge er wo una kulo po no boll aike moi. Une kandjiye kerman pai ge no kanpin, yene Ne dje worika, une taimane woi kandjiye kerman pai ge no kanpin. Une no ye wopake ye awo, kandja kaima dji una moi.

15 Jon iwa ge pille, po una moi al yau to embe dji, na asa kandja ta djill ge, iwa ge pille djill. Na embe djill, una ta na mopna al wonda ge une wo na kamblo aunda we djill. Une na kamblo aunda ge, na namoll kune ge, une asamoll moi. Ge pille une na kamblo aunda we djill.

16 Iwa ge ye wopake ye yei mal ge pille, une nono porapora ye wopake kaima ye awi. 17 Ge Mosis loye pepa bolo nono awi ba, Jisas Krais ge nono wandill golo awo, mambine kaima ge dje pene woro awi. 18 Una porapora God nakaninj ba, God wariye taimane ge une God mal embe moro, une God boll aike mormell pille, God kaima moro mal ge une nono ombine dje aundo.

Jon nu pagle awi una kandja dje pene wori

(Matyu 3.1-12 ne, Mak 1.7-8 ne, Luk 3.15-17)

19 Juda una dje wormaka, opa gale awi una ne, lotu numb kerman kogo yei una Jerusalem kere, er Jon moi al po embe dji, ni una ne mal kaima wonden ne? dji. 20 Djimaka Jon tormang nayei. Une kandja kaima dje awo embe dji, Krais ta wonda we dji ge na wale nawondo we dji. 21 Djika kambono embe dji, na Krais namoro we djinden ba, una ne mal moren? Ni Ilaija moren mo? Jon man dji, na Ilaija namoro we dji. Iwa propet moro ge ni wale wonden mo? dji. Une man, we dji. 22 Djika kambono embe dji, ni una ne mal kaima moren? Ni kaima moren mal dje pene worbenka, no er yem po dje wori wopin una dje aumbonka piye we dji. 23 Djimaka Jon embe dji, propet Aisaia asa pepa bolo embe dji, iwa ta dumo wapra yei al po yau to Iwa Kerman kondweye ye wopake yeme! dji. Aisaia dje pagi mal ge na wale wondo we dji.

24 Una dje wormaka wo moi una ge, pende Parisi una moi. 25 Ga kandja embe dji, ni Krais namoren, ni Ilaija namoren, alla propet ge namoren ba, ni una nu pagle aunden ge, namba yei pille pagle aunden ne? dji. 26 Jon embe dji, na una nu pagle aundo ba, iwa ta ye boll aike moro ge ye kanpol natonj. 27 Are une na mopna al wo Iwa Kerman kaima moya, une kake su kaye piska tano ge kune kaima nayenda we dji. 28 Jon kandja embe dji ge une dumo Betani molo dji. Betani ge nu Jodan kapa konato yei.

Jisas God kogye sipsip wombe moi

29 Kamkumaikekana Jisas Jon moi al puno dje yeika, Jon embe dji, ye kanme! God kogye sipsip wombe er wondo. Une ge makimb una singare ke ye wani ge i woro aunda. 30 Na asa kandja embe djill, iwa ta na mopna al wonda ge une na kamblo aunda. Une embe yenda ge na namoll kune ge une kamasa moi we djill. 31 Une kaima moi ge na asa kanpol natoll ba, ye Israel una kanpol tane dje pille, na ye nu pagle aundo. 32 Jon Jisas pille kandja dje pene woro embe dji, na kanill, God Murble ge ka pulma mal embe kupill al kere pir dje er kal une moi al woi. 33 Une wale woi ge, na kanpol natoll ba, iwa ta na una nu pagle auno dje pille dje wori woll iwa ge, une na moll al embe dji, na Murblena kal wo iwa ta moya al moya, ni embe kanin dal, ni embe dje pupen, iwa ge na Murblena i, una pagle aunda we dji. 34 Alla, na kanill pora dji pille, na kandja dje pene woro embe djindo, iwa ge God wariye kaima moro we djindo.

Jisas kogoye una kindja dje i

35 Tagika Jon yene kogoye una soka boll aike agle molmaka 36 Jisas er wo pika, Jon kane embe dji, God kogye sipsip wombe er wo pundo, ye kanse! dji. 37 Djika yene kogoye una soka Jisas pi al ge are er pupill. 38 Pupillka Jisas agle molo, kane ake to embe dji, ye wal naral wal pille durmell ne? dji. Djika soka kandja embe djipill, Rapai, ni nam kond pan ne? djipill (kandja Rapai ne, kandja tisa ge me taimane). 39 Djipillka Jisas, ye wo kanse! dji. Une kandja dji ge armina 4-oklok mal embe yei. Soka une boll aike po numb pai al ge kanpill. Soka ege taimane ge une boll aike moi. 40 Iwa soka po mopill ge ta ge Saimon Pita age Andru we dji. 41 Une age Saimon Pita moi al asamoll po embe dji, iwa Mesaia God dje worda wo yene unakye i yem worda we dji ge, no kane ipin pora dji we dji. 42 Andru Saimon dje i Jisas moi al pika, Jisas Saimon kane embe dji, ni Saimon Jon wariye moren, are ni kandjin gun ta panda, Sipas we djine we dji (kandja Sipas ne, Pita ge me taimane pai, me ge makimb ku we dji).

Jisas iwa Pilip ne, Nataniel, ye er na boll wose! dji

43 Tagika Jisas Galili puno dje po kani, iwa Pilip ge moika Jisas po embe dji, ni er na wondo al we! dji. 44 Pilip ge yene dumeye Betsaida. Betsaida ge Andru ne Pita dumene aike yei. 45 Pilip po Nataniel moi al embe dji, iwa ta wonda we dje Mosis ne, propet kambono pepa bolo pagi ge, no kanpin pora djindo. Ge Jisas Nasaret iwa moro, une ne ge Josep we dji. 46 Djika Nataniel bakale awo embe dji, Nasaret una mor ge una ta wopake mor mo? dji. Pilip, ni wo kanben we dji.

47 Nataniel Jisas moi al wono dje yeika, Jisas embe dji, ye kanme! Iwa wondo ge Israel una kaima moro, kandja kende nadjindo una moro. 48 Djika Nataniel embe dji, ni namba yei pille na pille kane yenden? Djika Jisas embe dji, Pilip ni yau natoi kune ge, ni iko pik me al ami dje mon ge, na ni kanill we dji. 49 Djika Nataniel embe dji, Tisa, ni God wariye moren. Israel una kingne ge ni wale moren we dji. 50 Djika Jisas embe dji, ni iko pik me al mon, na ni kanill we djill ge, ni na iwa Krais moren dje pren ba, na kandja djill ge wal kembis pai, are ni wal kerman kanben we dji. 51 Jisas embe dji, na kandja kaima dje ye aundo, kupill al au djindaka God tauye agelo wo Una Wombe moro al ge pla po kal wo embe yene ge, ye kanne we dji.

Copyright information for `GAM